自從剛升大學時搬去大型商場附近就冇再嗌外賣，因為太方便落樓就有得食
數年後，懶得過份，加上特別想吃久未重逢的Pizza Box，忽發奇想下叫外送
近年興起多個訂餐App，包括Foodpanda、Deliveroo及UberEats，今次就試試用熊貓
其實有少許擔心出現漏單或付費上的問題，但手機落單後大概十幾分鐘就有回應
重覆訂單，確認後由App、電話到Email都有發出提示，感覺幾可靠
而最後又真係同佢預計時間一樣一個鐘左右就送到，費用照扣信用卡，亦冇其他錯漏
只係外賣訂單金額需達$200，我們再加兩支大汽水就剛好二百出頭，開車！
有趣的Pizza盒設計，可以將面層沿線撕開當碟，特別係開Party時一路食一路四處移動時
慳番唔使用即棄碟，又唔使洗，環保一點，當然又可以好似我咁直拎唔墊
雖然只有兩人分，但我們還是一次過點了三至四人的份量驚喜超值套餐 $169
優惠限星期一至五，內含一個自選大批，以肉食者角度選了豐富的多寶 $168（原價）
批面以餡料堆砌，薄片不膩的Pepperoni及略帶嚼勁的意大利腸帶來鹹香肉感，不算辣
另加入了青椒、洋蔥及蘑菇，食感比較清，配合以上肉料及熱熔芝士都未會滯
批底照常傳統批，厚身富咬口，未會輕易水濕浸軟，兩人輕鬆解決三分二個大批
明顯地大批原價與套餐只差一蚊雞，而且套餐亦再包一款小食
自家製雞肉丸配芝士醬 $50（原價）一份十粒，有少許似宜家肉丸，但少油乾爽一點
調味不重，入口軟身，加上稍黏的芝士醬可裹實，添上一分潤
不過也不要期望芝士醬等於芝士本身，味道上一定有差別，同出面啲芝士醬撈麵食味相似
最後更有重口味的肉醬千層闊麵 $75（原價），約有五意麵分層，以肉醬相間
可惜闊麵已經很淋身，幸好尚未似粉糊，與大量香潤白汁及酸甜肉醬同食豐盈不已
未算非常合意的出品，卻因那肥潤的食感頓時過了口癮，徘徊在合格邊緣
不過就著整個套餐的份量及質素計算性價比，差不多有六折，食得夠飽試得過
沒有留言:
發佈留言