18 Grams-鹹鬆餅

Onion Bacon Muffin

第一次食鹹既Muffin

洋蔥味唔重，只有少少清甜味

煙肉味道完全融入muffin到，香濃但有點膩

整體係好濕潤既，烤焗過既微微焦香味好吸引

不過就真係內外都好油，同埋有d痴口

千両-新鮮食

話說以前食過好多次千両

因為我呀媽好中意食，成日都搵我去XDD

重點係我覺得係幾好食，但真係貴

不過佢中意唔通我唔俾咩XD

今次就係同佢去淺嚐一下過下口癮:^)

炙燒黑椒帶子　$42

帶子開半都仲成1cm咁厚，睇落去又大大塊咁，只講份量又抵既

炙燒後帶子上有少許焦痕，食落帶淡淡焦香味

外表只有少少燒過，因此我估只有表面1mm係有點熟

入面仲係好嫩滑爽甜，鮮味十足，仲有d清甜味

另外黑椒唔多，只有淡香味

加埋d醬酸酸甜甜，就算偏creamy都唔會好膩

飯粒黏得穩，不散不爛，仲有點彈牙咁:^)

西京銀鱈魚　$118

睇MENU已知佢份量係少既，因為本身個價都偏貴

當我知道細個食開既「銀鱈魚」，原來係Catfish之後，都有d驚外食會濫竽充數呃錢

不過千両畢業under大集團，就算質素欠佳都唔會賣假野既

果然信者得救（講呢啲

上桌見佢燒過後金黃色調好吸引

不過一夾開個樣好似好老好散咁，心感不妙

豈知食落魚肉仲係滑嫩帶點膠質，近魚皮既部份尤甚

曾經食過西京燒，味噌落得重手，鹹之餘仲蓋過食材原味，唔知食左咩咁

然而呢到就唔會調味過濃，食到好淡既鹹味，更重既反而食甜味

仲有既係調味帶出左魚肉既鮮味，魚油既甘香

最後我地都冇點到個醬，就咁單純品嚐左一整塊燒魚:^)

北京水餃-少少食

吃過午飯，同朋友係尖沙咀周圍遊走，順便睇下下次約去邊（吃貨就是這樣

一路行，見到之前講過想試既呢間北京水餃

因為食完正餐已經飽飽地，朋友又話唔想食鹹食，仲要留肚食甜品（咩胃？

最後我只係點左一份獨毒樂:^)（月

牛肉卷餅

自從係馬家莊食過就念念不忘

呢度卷餅只有牛肉冇羊肉版，餡餅就兩款都有

一路睇住老闆娘（見店外剪報係佢XDD）煎熱蔥油餅

聞住微焦既香味已經好想即刻食

牛肉餅到手，似乎唔太熱，係暖暖地咁:^|

可惜了，如果熱d更可以帶出餅同蔥既香味

而家既味道相對淡點，並帶點韌度

牛肉其實係牛腱，薄薄兩片，份量少

勝在肉質不過韌，味濃，非常入味

本身餅皮係帶點甜味，加埋牛腱既濃鹹味，冇另外加幾多醬汁都夠哂

總括而言，要快手買快手食既我會揀呢間既

要慢慢嘆慢慢嚐既我就另有心水

La Creation de Gute-莓果盒

食完好多鹹野，個甜胃又蠢蠢欲動

以前經過呢間，見到佢display果d相有吐司盒

但又唔見有大MENU寫有，因而遲遲未試

最近見到原來佢真係有provide，諗起就即刻去XDDDD

入座之後諗左陣，究竟食其他甜品定係toast box

本身揀左Banana Chocolate Version，但佢話冇香蕉……

Strawberry Vanilla Toast Box

莓果份量不少，酸甜清新，感覺好新鮮唔係放左好耐果d

雲尼拿雪糕味道好自然，睇得出食得出主要用雲尼拿籽天然食材帶出香味

吐司係Danish Toast，外皮酥脆仲有陣陣焦香

內部剛是較濕軟，重牛油香，有酥皮既層次感

整體份量比以住食過既都細好多，大概係平時買四片方包既大小同厚度

不過只計味道，還是可以一試既

茶木-女孩日

同中學識既好朋友出街XDDD

久違的……成兩年幾三年冇咁出黎一聚

由於大家各自用過午膳，因此最尾都係去食甜品坐住吹下水

約左去銅鑼灣，去既都係cwb分店

只有切片吐司盒選擇

草莓蜜糖吐司

吐司切片後焗得金黃焦脆

中心切左粒，仲加左糖漿，清甜香口

草莓用料都可以，起碼賣相靚又冇爛，酸甜清新

忌廉的確係油左膩左

不過有草莓果醬，酸甜味十分重，可以解下膩

雪糕、果醬同忌廉既濕潤感令到吐司冇咁刮口

熱水果茶

茶香好濃

加上好多水果粒粒，酸味重

整體感覺清爽

剛好中和番吐司既甜膩感

平日下午茶時段，加上附近好似又開左分店（黃金果邊

唔使等已經有位

不過服務就麻麻，感覺上仲係之前好忙果陣既低Attentive

Oliver's-紅絲絨

食完飯本身諗住番屋企

但突然見到Oliver's又想試佢d蛋糕（食下午茶果次已經想加點

好多人又冇fd幫手霸位

最後同人搭枱下試左最近新寵:^)

Red Velvet Cake

我覺得賣相幾靚，佢有d裝飾同埋暗紅好靚

cheese部分香而不膩，最後微酸感好解膩

蛋糕體帶點點濕潤，朱古力味輕淡

整體還可以既，唔係雪到乾哂硬哂，但唔會專登再食囉:^|

Chocolate Cake

其實個全名就真係唔記得左，好似係咩truffle咁既

一睇個色水好濃，係深啡黑色，似乎會好膩咁

面頭有朱古力粉，偏苦，但唔會過多而黏口

朱古力味香濃，整體感覺濕軟細滑

蛋糕體部分層層分隔，厚薄適中，因此中和到朱古力本身既膩感

Metropark Hotel Mongkok-雅敍閣-改變了

曾經聽過旺角維景既Buffet好平

但質素、服務同環境都強差人意

有聞而家重新裝潢後，食物同各方面已經大大改善

既然係咁，點可以唔試下呀？

一入到去，staff好快就安排左座位俾我:^)

順道說服務，Staff收碟快，幾Attentive

經理（我諗係啦）都有問食物質素如何，同埋請我幫手填問卷

環境好寬敞，同埋光線多，好舒適

三文魚刺身

不時會放一堆切片出黎

不過平日午餐似乎唔多人，都係要拜托師父即切，感覺上衛生同新鮮d

三文魚甘香爽口，而且唔會過肥膩

涼拌茄子

茄子個心稔，外皮爽口

鹹中帶甜，有點辣味

茄子好吸味，整體不算油膩

燒火腿

外皮焦脆微甜

入面係乾身但唔算太柴，同埋都夠味

炸魚柳

炸粉不厚，金黃微焦賣相佳

可惜犯左通病，失去脆度

有keep temp，但外皮已經軟化左

肉質稔嫩冇雪味，加上醬汁酸甜味重會好食d

蕃茄肉丸

肉丸好夠味，不過感覺膩左d

鴨胸

唔太難咀嚼，不過醬汁痴得唔夠，味道偏重係鴨胸味同埋佢既少少腥味

焦糖燉蛋

表面焦糖層香脆，睇個色水烤到好吸引

燉蛋頗creamy，甜度適中，係幾好食既

檸檬撻

酸甜不膩，味道唔人工

撻皮夠香脆

一口大小真係令人欲罷不能

三層蛋糕

蛋糕體濕潤不膩

中間吉士夾心係布甸質感，甜滑可口

芝麻糕

芝麻味香濃

近睇好多芝麻粉

甜度適中

紅豆糕

清甜

足紅豆料，睇到好多紅豆皮，唔係好膩既豆蓉

質感較粉，不過都係好滑既

杏仁茶

香甜濃郁，比較稠滑

人工味唔重，冇粉粒

普光齋-自助素

其實係呢間素食食左好多次啦

除左晚市單點、自助，仲有午市、茶市自助都試勻哂

我又唔係好Keep相

唔少相都已經冇左，但我都會講下d冇相既食物既

以下係午市茶市自助既食物:^)

沙律

可能我中意沙律醬，酸酸甜甜好開胃

同埋佢既蔬菜粒偏大，唔似係平時frozen既大小，食落去仲清新爽口

炸春卷

春卷皮薄香脆，入面多芋蓉，滑而不膩

加埋酸甜汁就唔會咁劑了

酸齋

有點油，不過酸甜汁都好開胃，算係冇咁膩既

齋鴨腎

質感較硬，好易整損口咁

又唔會好油膩，夠哂入味

齋叉燒

齋叉燒幾入味，唔算好假

同埋硬度都有少少似既:^)

齋滷味

滷汁太淡味

食落去都幾油膩

炸芋頭

做成卷既外形

芋蓉細滑清香，而中間既腐皮脆薄香口

講得炸物，係咪會吸油架啦，視乎多少姐

呢個感覺上又唔會油淋淋既，但食食下都係膩

燒賣

係就係有d料既

粉漿太多了，食落好漿口

粉果

皮好厚，料多，但好油

韭菜餃

韭菜切碎量多，味道新鮮濃郁

只怕太油了，一咬開除左水分仲見到有點油光/__>

叉燒包

包體香甜軟稔

可惜唔係太配齋叉燒d味

瑤柱西蘭花

瑤柱絲味形質感俱似

醬汁濃稠但菜爽脆，唔會咁膩

炒飯

我個人最中意係呢個炒飯

有點濕糯仲鹹香味好重，加上有雜豆粒冇雪味好好食

粉絲

多蔬菜，粉絲唔會太稔爛，但有點油

蛋散

香甜酥脆，仲要冇油膩感，加埋糖漿真係好滋味

桂花糕

好足料，多杞子多桂花

清清地唔會過甜

馬豆糕

甜香不膩，同埋幾清又唔易散爛

馬蹄糕

清甜，馬蹄不少又好爽口

芒果布甸

芒果粒都有既，但味道幾人工

焗西米蓮蓉

西米香稔微糯，焗得金黃，焦香味重

蓮蓉細滑，亦甜而不膩

芋頭西米露

清甜之餘西米又有d糯感，粒粒分明

格仔餅

有staff會幫手整，不過好香脆又足料，唔會好油膩

試左唔同既sauce同配料，最中意都係花生黃糖同埋煉奶:^)

—————————————————————————————————

終於搵得番小小一張晚餐既相XDDD

普光齋晚餐除左有點菜版，仲有任食版選擇

任食既話外面會有午餐、下午茶buffet出現既沙律同凍齋

另外仲會有湯有飯等等，更為豐富

任食晚餐仲有點餐紙，都係任點既小菜

當然會細份d，可以試多幾款

上行：

醬燒玉茄好夠味

除左面頭有少少焦香，仲有茄子本身既香味（唔係青味

茄子內裏仲有點實，咬落去有水份有汁

紅燒鮮竹焦香可口，不過真心太油，食過一件已經冇翻兜既意欲

醋溜黃金扒質感像真

酸酸地好開胃，醬汁微稠好痴食材（Y）

不過整體感覺有點油膩:^|

沙拉薯角唔係脆版既，尚算有薯仔香味

佢用既沙律汁比較creamy，真係淺嚐就算了

黃金琵琶好香口，入面既豆腐嫩滑，有d豆香

都係果句，膩了點

燒汁三寶真係個樣似，味道都唔算好似，主要係調味料既味

上面既釀餡有點硬實，食落個配搭怪怪地

豉汁鰻魚用紫菜包住扮係魚皮XDDD

講真食落又幾似，質感同味道都係

好鬆軟，似係可以抿開既，本身食材調味再另加豉汁真係似

但我覺得豉汁太濃稠太多，搞到好似浸住咁過重味

脆皮素鴨就唔好提到似唔似啦

味、形都不搭軋，同埋「脆皮」其實已淋……

黑椒牛柳粒個調味幾似

加上佢既牛柳粒有點硬度，同齋鴨腎係朋友

下行：

金粟鯪魚件又幾似葷食

首先個汁一定冇甩拖，味夠稠度夠，加上粟米粒甜甜地幾好食

鯪魚件又係有d軟稔，同真魚質感相像

鹵水豆腐冇咩特別啦XDDDD

好多非素食既地方都有得賣，冇大分別

鯪魚球調味得宜，可惜食完一粒已覺得劑:^(

咖哩貢丸主要都係咖哩味搶先

不過丸真係dense左d，好易會覺劑（葷素皆是

醬爆黃螺質感好似葷食，都係彈牙有嚼勁，大概係用蒟蒻（？）

脆皮豆腐角乾身脆口，香而少膩，豆泡都唔會老到難咬開:^)

西……汁魚鬆，打個名真係怪怪地咁A__>A（唔好咁

酸酸甜甜開胃又鮮膩，其實味道都ok

白汁時蔬用既蔬菜好新鮮清甜，白汁creamy左d，可能會有點膩

麒麟冬瓜賣相不錯，冬瓜清甜綿密，又唔係好濕爛果種:^)

千両-交託了

講起日本菜，食得最多一定係壽司手卷太卷

再唔係就魚生刺身鐵板燒

你問我仲有d咩我都唔識答了

今次竟然有機會試到「御任せ」，聽朋友講原版既冇千千聲走唔甩

雖然話係經濟抵食版，但我諗都唔會隨便得去邊既

原意係選材及烹調等都交由廚師作主

俾我呢d唔見慣大場面既小朋友食就話唔識野姐

如果係大人物就真係押埋廚師既名譽落去架啦（認真貌

開場白講太多都係無謂，入正題吧

蒲燒鰻魚蛋卷

甜蛋濕潤並帶清甜，微暖

甜蛋既水份熱力令紫菜變軟，不過都唔會有韌感

鰻魚只有薄薄一片，加上蛋既甜味，令人難以嚐得出味道

一口和牛

和牛粒外面輕輕烤熟，中心呈粉嫩紅色，冇咩筋既同時入口即溶

牛肉油香四溢，調味不多，好清楚嚐得到牛既鮮味

灑上既蒜片味道不濃不嗆，配埋一齊食既味道好夾，不過蒜片份量少d更佳

油甘魚伴香蒜麵豉醬

油甘魚厚薄得宜，亦唔會太多筋難嚼

油香濃而不膩，魚肉爽口彈牙，甚為鮮美

香蒜麵豉醬晶瑩剔透既啫喱狀配上稠醬坐底，賣相精美

可惜味道似乎不太協調，解膩既效果不顯著

築地精選五點刺身盛

整體黎講刺身切得厚薄適中，清甜鮮美，用料新鮮

我個人就中意牡丹蝦，鮮甜爽口，肉質嫩滑彈牙

刀功好又夠細心，蝦腸少少痕跡都唔會有

至少感覺上好清潔衛生，放心食冇事既

另外要數吞拿魚，講真部位我唔多識分（真係唔點食生）

只見肉質結實而幾乎無脂肪，食落口係爽滑彈牙

我估係赤身掛，拖羅似乎會更肥美一點:^|

精選築地時令煮魚

其實係汁煮魚鮫

魚鮫個頭大，魚肉軟稔入味，一抿即可

膠質十分重，入口即化並帶黏性

醬汁味濃但不油膩，屬清爽感，帶清甜味，不會蓋過魚鮫鮮美

海膽醬燒赤海蝦

海蝦開邊燒得焦香金黃，賣相吸引

可惜比較薄身，稍為燒過頭了，蝦肉水分少而變得乾身黏殼

海膽醬味濃鮮美，但似乎落重手左，食唔出蝦肉應有既鮮甜爽口

精選築地時令壽司

象拔蚌壽司似乎不常見

味道清甜爽脆，肉質豐厚

四款入面，我較喜歡金目鯛

白裏透紅既顏色已經先拔頭籌

加上魚鮮味美，有淡淡油香，卻無腥膩感

稻庭烏冬

烏冬彈牙重麵粉香，毫無稔爛感

除此之外，烏冬帶微甘甜，完全唔會有酸味

湯算清淡，因此不會感到heavy及人工味

和風清酒煮蜆湯

湯底不濃濁，有淡淡酒香，無醉眩感覺

可以解腥膩，帶出蜆肉清甜及自然海水味

雪糕糯米糍

一點都不馬虎，賣相及心思已經加哂分

糯米皮軟糯有彈性，不太黏牙，甜度低，感覺輕盈不膩劑

雪糕係紅豆味同綠茶味

前者甜香味重，有紅豆粒，足料之選，配上糯米皮可口清新

後者甜中帶苦，整體食落唔會過甜，忍不住一口接一口

環境方面，九龍酒店分店比其他寧靜舒適

大概人流較少，卡位亦清晰分隔，多點私人空間

而且呢度既感覺高級d，俾錢都覺得抵番既

一杯屋-好禮貌

上網睇到一杯屋係有好多牛舌既菜式
仲要有每日限量套餐，感覺好吸引咁喎
有日好得閒就踩左上去試啦

一入到餐廳已經有位staff好好禮貌仲要鞠哂躬咁，仲送上熱毛巾
其後幾乎每次佢serve都會鞠躬又係咁日文道謝

話每日限十份既Menu

 3月限量套餐　$118+10%

麵豉汁算係清版，味道不過濃不覺多味精，飲完都冇點口渴

刺身有兩款，三文魚魚油甘香不膩，醋鯖魚微酸開胃，都幾新鮮咁

可惜係切得唔夠離，難夾

凍豆腐好清新解膩，尤其係當食過麵豉汁及魚生豉油既濃味後，可以清清味蕾

醃瓜只有幾片，但味道酸中帶甜，而且仍有點爽脆

牛油帶子重牛油香味，不失帶子鮮甜

且帶點焦香味道

帶子既體型頗大，加埋裙邊及籽，大概都有半個掌心大小

薯蓉入面有顆粒，質感有微微對比

淋上微酸醬汁後完全無膩劑感，凍凍地好香口

清酒牛舌未能嚐到清酒香味

牛舌厚切同時仲保持到肉質稔嫩，易於品嚐

不覺油膩，加上中心有少少鹹味，非燒烤既重鹹，更能帶出鮮美同香濃既牛味

大麥飯米香清新帶微甘

煮得軟硬適中，有少少嚼勁，不錯

份量大，差不多是個湯碗大小

完食。

順帶一提

用膳會有免費飲品任飲

熱飲大致有咖啡、茶及水

冷飲有橙汁等，最特別是有可爾必思，日本乳酸飲品，似益力多但偏甜，亦比較稀

Oliver's-午茶間

食lunch見到超級三文治有位又有set

即刻叫埋朋友過黎一齊食餐肥仔餐XDD

話說回來，我地除左個湯同飲品之外

咩都落勁多芝士粉（月（其實係我落，我錯了

南瓜湯

南瓜味乏乏，感覺只是一般忌廉湯，亦冇咩清甜味

芝士牛肉焗薯

芝士味香氣撲鼻，而且係芝士醬既質感，放耐左都唔會太過凝結

牛肉份量都多，加上芝士真係會有點膩

不過一旁有新鮮爽脆既凱撒沙律，酸甜沙律醬減低膩感

焗薯份量大，起碼一個拳頭

外皮乾而不韌，薯仔心既熟又不爛，好香既薯仔味，冇青味澀味

因為佢既醬汁同材料主要係面頭，配埋沙律同薯仔d味會清少少

南瓜燒雞扁意粉

醬汁清甜，微酸既味道好開胃

稠度剛好夠沾滿意粉，不會過濃味過油膩

南瓜鬆軟香甜，配上調味得宜既雞塊，無違和感:^)

意粉煮得不錯，起碼係冇發脹冇濕爛，條條分明有彈性

菠菜香腸闊麵

醬汁有點Creamy，幸好稀稠度適中，唔會沾附太多，唔會過膩

腸仔濃味但唔肥，仲有少少脆皮，配上清甜既菠菜可以中和番

麵條扁闊而不稔爛，仲有適當韌度，合格的

放學得閒去食下下午茶啦

以前見過Oliver's既promotion advertisement

又係一路都冇去試

 今次同fd一齊終於試左:^)

鹹點

三文治入面我地最中意既係蛋沙律三文治

食落去蛋香超濃，仲有點creamy同rich

佢既麵包好重麵粉香並帶點濕潤，食完都唔會覺得好油膩

其實仲有煙三文魚包

鹹味重，油香稍遜

我地都係覺得三文治更吸引

牛角酥牛油香好重，十分酥脆，未見油膩

甜點

有兩款味道既鬆餅：提子及朱古力

提子味比較清，甜味不太濃，亦冇咩人工怪味

朱古力味就濃味點，算係偏甜既

兩款都係外脆內微微濕潤，因而容易入口，未會過於黏牙

蘋果撻外皮香脆，帶微微烤過後既焦香

內餡香甜微溫，非常可口

brownie感覺好濃郁，味道層次多點，上面既frosting由一開始既重甜去到微苦

蛋糕好濕軟，朱古力味濃而不膩