2014年12月29日星期一

香河-越南味

先前講明做到十一月尾既香河越南餐廳
而家店內貼出告示話延期三個月至二月尾
即是說大家有機會去潮拜下呢間開業逾三十年既老字號





環境尤如茶餐廳格調,感覺頗懷舊
衛生情況可接受,至少周邊未見有垃圾污水,而且不覺黏笠
一入到去以為間舖真係只有約十枱座位
直至有一大班捧場客聚餐時先知原來有樓上雅座:^0


生牛肉湯河

餐廳照顧到客人不同需要,亦有提供熟牛肉版本
但我地接受到生少許既,就梗係揀呢款啦:^)

端上桌後,仔細觀察一下,雖然怕肥膩,但都係不能逃避既湯面浮油
先嚐湯底,味濃不濁,更有點自然牛肉香味
牛肉邊緣係煮熟既淺啡色,中心呈微微粉紅
入口不韌不老,容易咬開,但未稱得上是滑嫩
雖說是薄切,但咀嚼間係有重肉香及保留到少許肉汁既
河粉薄身叫彈牙,唔會過份淋爛,並無發脹問題


椒鹽軟殼蟹

見到面頭既炸蒜已經好想瘋狂大咬:^)
軟殼蟹係炸過既,炸皮甚算薄身,只係入口頗為油膩
而且感覺係稔身非脆口,不過都夠香,加上炸蒜香氣則更惹味
內裏十分多汁,足料多肉又帶鮮香,唔會話好重雪藏味

燒豬肉檬粉生菜包

燒豬肉燒過後帶濃濃焦香,質感紥實不韌
味道偏甜,講真入口真係好似臘腸味,同時有點油膩:^0000
檬粉非常爽口,乾身彈牙不淋爛,只是有點結塊
菜既部分就有點……不夠新鮮?
都仲叫爽口既,只係色澤及外觀上似係放耐左些少
其實呢個真係有少許難包,食既時候都有點狼狽
最後寧願分開食算了-__>-
另外係好易會覺得甜膩,我會配上少許酸汁解解膩


整體而言食物味道真心沒有特別,只為此係未必會再訪
只係佢地既菜式選擇比起我去過既越南餐廳為多
而且感覺頗正宗,唔係話一大堆Fusion菜
價錢黎講……性價比尚可接受,畢竟係銅鑼灣食野就真係越黎越貴
唔講質素同名氣,只要係外來既就已經比較高價咁:^0

服務方面各人都感覺友善,冇想像中老店員工既高傲感覺
加上不時會斟水收碟云云,個人認為都可以

講真要帶咩行李?

麻煩友就係要帶好多垃雜野既,以下係我亂咁黎既行李清單

□ Passport ( At least 6 months before expiry date ) / Identity Card
 旅行證件好基本,出入境要用唔多講,但小心過期
□ Passport / Identity Card Copies
 影印本,唔見證件可能有用
□ E-ticket Itinerary / Airbnb / Insurance Receipt
 機票Check-in、住宿同旅遊保險既一系列影印本
□ Mobile
 打電話上網打機影相拍片……Google Map係一大重點!!!!!
□ Wallet / waist wallet
 有技巧地帶其實唔易俾人偷
□ Pen
 填表用,得閒寫感想
□ Watch
 錶主要既用途唔會唔知掛,手機冇電時就知道依然重要
□ Camera
 影相拍片……咁都係專業啲既
□ Batteries / Powerbank
 電力補給,紅水
□ Medicine
 藥物--自己用開或者旅遊用藥
□ Electronic Wires
 叉電通常都要有線掛
□ Multi-plug adapters
 去唔同地方有唔同既插頭,要用黎轉插
□ Clothes
 著,如果係諗住去行街買衫既就帶舊或唔要既,著完掉
 如果係諗住長期用既,防水、快乾、耐用……特別活動睇功能
□ Vaccum Bags
 壓縮衣物慳好多位,但要睇番韌度同用手捲版□ Slippers
 著,唔好係用膠水痴既,好大機會濕水就爛
□ Umbrella
 落雨用
□ Silicon Cup
 矽膠杯厚身耐用,唔用果陣壓扁佢方便收納
□ Toothblush, Toothpaste
 刷牙
□ Torch
 黑暗中用
□ Large Map
 睇地圖,一般黎講機場都有免費既,手機冇電時做後備

當然可以唔只上面咁少啦,有特別需要既都可以帶多啲
例如係沐浴、洗髮同潔面用品,仲有化妝同護膚品
另外有人都會帶手提電腦或電子手帳等科技產品,視乎個人需要

2014年12月26日星期五

清真牛肉館-牛肉餅

早已有聞九龍城既清真牛肉館有令人神迷既牛肉餅
今次黎到當然不得不點牛肉餅
但我地想坐低食,趁熱又唔驚湯汁四濺會拿手唔成勢
堂食最低消費每位$32
由於已經食左正餐,我地只加點了個小菜嚐嚐


牛肉餅(兩件) $32

牛肉餅叫賣兩件起,剛好我們兩人前行分得不多不少
一件牛肉餅約有手掌心大小,厚近2cm,個頭十足
外層煎得香脆帶焦,比金黃算是更重焦,但聞起黎只有香氣並無燶味
老老實實我係連相都唔想多影,快手趁熱起筷!

輕咬小口,湯汁已如泉水湧出,源源不絕
幸好我早有準備,用碗盛好,一滴不漏
湯汁呈深啡色,不算油膩,但味道十分濃郁,重鹹
我本身已經算係重口味人士都覺得佢既湯汁係好夠味
通常只會用黎沾點脆香煙韌既餅皮
餅皮煎過係脆口帶麵香,不過十分吸油,熱食都已經滲著油了,稍為油膩

而內裏既肉餅……當然我是不會忽略的!!!!!
肉餅算厚身足料,但也不要跟往昔比較了
肉質稔嫩,製成既肉餅毫不鬆散,雖然湯汁傾瀉而出,但已經吸附係肉餅外層
除湯汁外,肉餅亦有自身肉汁,濕潤可口
在我看來,湯汁只用黎沾皮已可,肉餅本身都好夠味,只係肉香未夠

紅燒羊腩 $74

本想來客京燒羊腩,可惜當日未有供應……
剛才食正餐已經食左咖哩又唔想重複
算了,隨口嗌個紅燒羊腩充數吧!

上桌只是小小一碗,睇樣就估唔到原來都有逾十塊小羊件既
紅燒羊腩味道濃烈,醬汁鹹辣並全,惹味濃郁,叫人過癮
花椒香氣重而突出,只是未有想像中既紹酒香氣

羊件骨肉齊全,肉稔香嫩,羊肉肉味自然又濃郁
羊脂不算太多,吃下去不覺肥膩
連硬骨也煮到可以咬開既地步,可見其綿香程度
羊肉加上濃辣味道,非常暖身,吃後彷彿當堂渾身是勁XDDD

一直聽屋企人講述多年前往係九龍城既事情,心裏總希望來探個究竟
畢竟打從大笪地之後,我已經好耐冇真正逗留係九龍城附近走逛
先前只係行經,要數真正「到過」,惟有上回同朋友黎食泰菜
牛肉餅係家人常提既回憶美味,仲有豆品、泰菜及茶樓……
以往都係佢地外賣先食到,今次自行黎一試又有不同感覺
走他們走過的路……只可說人情味愈益商業化

HeSheEat Cafe-他她吃

一直聽身邊朋友講話He She Eat既味道唔錯
仲要賣相精緻而食材配搭顯心思
今次係銅鑼灣食完正餐話要食甜品
朋友提到原來呢區開左分店,想一嚐滋味
咁啱我又未食過,正中下懷了:^0

餐牌款式多樣,由鹹點正餐至到甜點小食,任君選擇
每款餐點都有略略解構食材配搭
最得意既莫過於佢地用左現時流行既Instagram中,Hash Tag既設計
例如朱古力窩夫--#朱古力醬、#朱古力雪糕
朋友係抹茶及綠茶食品既忠實粉絲,所以其實我地已經有預設一款要試xd

Lemon Crepe Roll 檸檬忌廉班戟卷 $55
#蜜糖脆脆 #乳酪雪糕

他她吃既呢一款甜品十分火熱,大概未曾一嚐既都已經留有印象
全因佢既精緻賣相係不少人打卡用相XD

Crepe既外層係平滑無焦既全黃色
薄身濕綿,卻係可以密包餡料毫無滲漏
中間卷既係lemon curd,即是平時食到檸檬批檸檬撻果一類,酸甜醒胃
只係呢度既稀身少許,做到宛如流心既效果,更為誘人

雪糕係乳酪味,清新既酸味毫不甜膩
加上旁邊蜜糖脆脆香脆細密,唔係咬崩牙類型
而非死甜既焦糖醬提升香味,平衡酸度
可惜佢既份量真係比較少,適合只係為左過下甜癮既朋友

Green Tea Fondue Cake 綠茶心太軟 $59
#開心果碎 #豆腐雪糕

呢個就係吸引朋友到來既一款甜品
一上枱個大小真係……讓我地有點驚呆,直徑大概最多5cm吧
不過經歷上面既幼身班戟卷,我地都大抵知道佢地既份量比較……嗯……迷你可人

趁熱啦!趁熱啦!趕不及待要切開來看看!
流心頗算澎湃,尤如火山岩漿般傾瀉而出,驟看氣泡細密溜滑
稠度適中,微黏不漿口,算是夠滑順
綠茶味濃郁非常,帶少許甘香,只係入口既時候有些少粉感及苦味
濕潤流心配上微乾帶脆既外層,剛好取得平衡
而外面蛋糕層氣泡緊扣綿香,綠茶味道甚重

豆腐雪糕清新少甜,中和番食完濃味既心太軟既甜膩感
豆腐味道頗為自然及突出,沒有被心太軟及開心果碎掩蓋
就此,已經係睇得出開心果碎係度真係冇咩作用
佢本身係唔出味,另外亦已失去脆度,留佢係度除左裝飾之外唔覺有咩用途……

Salty Caramel Hotcake 厚焗鬆餅 $49
#海鹽焦糖 #牛油 #雲尼拿雪糕

因為甜癮還未得到紓解,馬上加點了這個厚身鬆餅加持!
令人心傷的是呢款成為我地當晚最最失望既甜品……
未食我地就已經聞到十分濃重既焦香味
看著剛起鍋,仲係暖熱既厚焗鬆餅,我地忍不住要大啖了:^0

切開一睇,果然係厚身,其份量已比上述既款式要多
先嚐原味,入口鬆而不散,稔身綿密不乾硬
問題係……味呢?真係完全冇味咁!
我地都好懷疑係咪剛才食完濃味甜點而令味蕾怠鈍
但講真每試一樣我都有習慣係先用水清口至口腔中無嚐到食物味道……
老實講,我地一致寧願找麥叔叔-___>-

一旁放著糖漿,即平日熱香餅用
以及海鹽焦糖醬,粗粒海鹽配上稠滑焦糖醬……梗係試佢啦
甜中帶鹹既感覺有趣又解膩,俾到味蕾不時既新鮮及刺激
只係稠度高,沾點鬆餅時未免有點太乾黏難嚥了
雲尼拿蛋糕味道一般,叫做濕濕口,可以接受既

也許我個人係著重味道多於賣相(其實不是本應如此麼?
對我黎講,呢間真係性價比頗低既一間店……
曾經同其他朋友提及是次用餐經驗,佢地話旺角店係好好多喎
仲有朋友一直強調老闆人很好,但我心諗服務冇可能係重臨一間店既最主要考慮因素
最多只係一個加成
不過我都冇心再專程去驗證係咪真係好d
因為今次有少許俾錢買難受既感覺,已經令我有點疲憊
除非果位咁熱心支持尤如餐廳員工(當然唔係)既朋友請我食囉:^(

Goobne-烤烤雞

雖然香港而家既炸雞熱貌似告一段落
但仍有不少後起之秀而家先至過江
老老實實有點兒擔心佢地既命運……

身為香港人,就知道現時不少人都係趕熱潮
熱捧某事物時就大家唯恐遲到一步就會落伍
結果有些人只一直在追趕風潮,沒有考慮到自己既意願及興趣……

Goobne係韓國十分有名既烤雞品牌
如果你係SONE,如果你去熟韓國,大概不會完全未聞
佢係被喻為「連少女時代都會食既烤雞」xd
話到明叫烤雞,梗係同炸雞唔同啦
順帶一提,呢度係沒有提供半半款式

甜辣烤雞

用烤既方法食落雖然冇炸咁香脆,但就大大降低膩感
同時保留雞肉既水分及肉汁,健康一點,又更為香口易嚼
只係甜辣版註明辣度,有辣椒圖案,入口卻不夠香辣
醬汁稠身,用量適中,剛好沾勻,未至於漿左一層厚塗

表面更灑上香脆花生碎,粗幼不一
少許脆口,同軟嫩雞肉有質感對比,平衡膩度

黑椒醬油烤雞

黑到咁!!!!!
呢款既黑椒汁十分濃郁,冇註明辣度
但我地認為佢比甜辣版更為香辣惹味

真係黑到墨汁咁,唔係稀稀疏疏幾點碎椒
黑椒味香而清,大大中和濕潤雞皮雞肉既油膩
面頭仲有芝士同蔥花,加添香氣,同黑椒味道毫無違和感
整體黎講有特色而又香口惹味,可以一試

服務方面我地認為態度是友善親切既
溝通都十分有耐性,效率是合格的
只係我地坐落至離開都係完全冇水飲既……
當然你大可以話而家唔少餐廳都係咁啦,甚至好似亞坤係要俾錢先有水
仲有係我地自己唔問,吝嗇唔肯花錢買姐
講真去香港咁多間韓國餐廳,就算係貴一貴既好多都有免費水
水要收費既餐廳就會好明顯好清晰寫明
只不過我地係覺得有點兒不夠貼心囉,完。

2014年12月24日星期三

居酒屋大吉-頗合心

同朋友一邊話唔想食咁貴唔想食咁飽
結果沿路行左黎居酒屋大吉


當時大概係五點幾,因為樓下個牌冇寫價錢,諗住上去問下
未開場就當然冇人啦,做帶位既職員都好親切咁解答
而唔係話未開店就趕客走果種(真係有唔少係咁樣做-___
好啦等到夠時間就番去排隊入場食了:^)

刺身其實有十一款可以揀
因為朋友話唔食,結果我自己食哂佢-____>-
個人認為佢地三文魚都合格既,雖然唔係多油花重油香,但有番本身既肉味
而且冇生腥味同雪藏味,中間冇夾冰花
同埋佢呢度既甜蝦刺身係有頭既xdddd,亦都係正常大小唔係幾條先有一隻手指粗度xd
味甜得黎自然同清,肉質彈牙微黏

沙律都有七款任君選擇
煙三文魚沙律叫做足料,真係有兩三片煙三文魚係入面,唔係勁多菜但得一塊仔果種
而且菜脆爽口,粟米甜而清,配上醬汁微酸香,入口清新
和牛醋物沙律係出乎意料之外咁多料咁足料!!!!!
佢既和牛唔係一碟得一粒,而係至少五粒以上,仲要粗切
入口香而不韌,油香甚濃,配搭酸醋,解膩又加添香氣

燒物有近十款,但出菜比較慢同埋水準不一
特別要一提燒紐西蘭羊鞍,呢度係起左一邊骨
姐係你可以好輕易食到佢既肉,真係方便好多!!!!!
香口惹味,脂肪位同油分唔算多,肉質不韌但夠熟,只係冇肉汁咁

廣島焗生蠔毫無苦味怪味,入口都叫有焦香
面頭既醬汁始終都係比較水,但酸甜味幾開胃既

一品料理款式多樣,整體質素都叫做合格合理既:^)
鐵板深海魷魚鬚係用個鍋仔保溫上,感覺貼心
魷魚鬚有少許韌身,但都係嚼得到既,配上甜鹹燒汁則更惹味
韭菜炒蜆大多都係開哂口食得既,肉質不霉,但未叫新鮮,是可接受既
蒜味雪花牛柳粒整到好縮水,我地見此相視了一下xdddd
不過入口係十分夠味入味,肉香稍淡,油份不多
只係佢質感未有想像中硬韌,加埋脆口蒜片食,香口又惹味

牛油炒雜菇叫做香而不過膩,唔會用極多牛油,凍左冇咁易起固
菇味唔會怪,冇苦,食落幾爽既
大吉炒雜菜都係油膩左少許,勝在感覺夠爽脆
牛油粟米粒唔會出哂水咁個樣,甜度適中不造作

太平洋炒辣蝦原來真係偏辣既,朋友又係一口回絕了xdd
入口冇怪味腥味雪味,肉質算是爽彈稔身,越食越香辣
七彩炒牛舌入口重牛肉香,朋友指有點韌口了

炸物個人覺得佢炸皮唔算厚,同埋上枱都夠熱未有泛油
呢度唔只有焗蠔,仲有自家製吉列蠔,多肉汁如湧泉,沒有苦味,似乎幾新鮮

甜品都有五款揀既,兩款雪糕就唔試啦
日式紅豆草餅好彩唔係水晶皮果種-___>-
而係卷狀既,雖然上枱係微微變形了,但都無損其味道質感
外皮香軟稔糯,紅豆餡清甜自然,咀嚼間未覺甜膩
自家製糖水係腐竹糖水,我心頭好xd
甜而清,稀稠度剛好,腐竹都夠綿爛順口
迷你豆腐花係百福既,只係好少見呢個細版

飲品黎講……個人認為道地黑糖薑茶唔錯
唔知係咪得我冇見過,一見到有呢款就二話不說點了
甜度頗高,只係唔會覺得膩口,薑味非常濃重,辣非嗆

服務方面,職員親切有禮,效率都頗高
當晚有枱比較麻煩不斷催菜既客,基本上五分鐘都冇就催一次
但職員都係態度友善,甚至同佢地吹埋水去消磨客人等候既時間
晚上仲有抽獎,送酒送優惠劵等等
整體黎講完全唔會後悔揀左呢間食放題做晚餐!!!!!

甘味-烏冬家

冬天氣溫咁低,我就會想食熱野啦
特別係多湯、保溫又濕潤既食物……
今次就黎到呢間好壞評語參半既讚岐手打烏冬專門店

對上一次試到覺得都可以既烏冬底,已經係多年前既赤丸
只係佢價錢越黎越貴,由學生消費變到係高級商場食堂咁
而且朋友去開都話質素每況越下
之後一直都冇試到讓人忍不住大啖快嚐既烏冬

黑椒牛柳撈讚岐手打烏冬 $64

雖然上到枱唔係好似餐牌圖片咁豐富咁多料
但佢將食材同醬汁堆係中間一橫行,賣相又幾特別:^)

牛柳粒首先係有牛肉香既,甜中帶鹹既燒汁冇掩蓋到牛肉味道
肉質稔身不韌,都係偏熟偏老既,只係冇咩筋位又冇咩脂肪粒
燒汁加入左黑椒,突出香氣,唔會太過嗆辣
略嫌不夠稠身,醬汁難以黏附在烏冬之上

烏冬粗身彈牙,味道沒有怪異既酸味
可惜是未有麵香,份量亦真係細左少許,我就食多兩個都仲得xddd

牛舌泡菜煱燒烏冬 $54

凍既時候自然想食暖熱香辣食物去暖下身
呢個烏冬就係用熱鍋上既,鍋身係會比普通膠碗保暖
泡菜味道偏溫和,香辣微酸卻不嗆
湯底味道算濃香,但不教人感到油膩過潤

牛舌薄身但都保有少許水分
有肉汁入口不老不韌,易嚼又有肉香
烏冬都係同上述一樣,浸湯都冇發脹淋爛,只係呢個既份量就更加少了

芝士蕃茄波 $38

講真塊菜真係唔知想點-____>-,本身仲係夾係中間唔係放係底
表面沒有泛油,嗯,可以入口既!
外層炸得香脆,夠熱度唔會過份膩口,仲甚算惹味
芝士香氣偏清,唔係流哂心牽哂絲果種,而係比較膏狀既
蕃茄呢?蕃茄原來係同芝士混合
細心睇佢就會見到少許紅色蕃茄碎,清新酸香降低炸物既膩感
酸得黎又唔會係變壞果種,只係一層香氣,沒有太影響味道