Crostini-油鬆圈

先前家人經過呢間麵包店，睇到我地去旅行時見過既麵包

因此買左一個俾我試下，當早餐咬下都好:^p

歐式乾果包

收到既時候袋面已經全滲油了/___>

一打開，嗯……裏面還是不要照好了……

乾果包形狀有少許似Canelé，但佢係空心大份，所以又有少許像Doughnut

表面灑左唔少糖粉，可惜早已跟麵包既油份混合，變成黏手既半透明狀

話明乾果包，佢除左有不少杏仁片，當然仲有乾果啦！

雖然我唔中意食，但提子乾……似乎無處不在

講講麵包，入口鬆軟香口，麵團味道嚼後帶微酸，麵香甚重

質感是煙韌路線，加上有點乾身，唯一潤口既就係帶油既外皮加上半溶糖粉

咀嚼間飄出橙皮清香，算是解解膩吧

不過如果要再食呢間，我應該唔會揀佢了

208 Duecento Otto-悠閒嘆

同好友慢步上環

未諗到食咩既時候，突然就見到以前有留意過既208 Duecento Otto

不過就係覺得佢地理位置幾遠，所以一直都冇去試

既然難得碰巧遇上．順便就一試了XD

環境裝修幾吸睛，牆壁既設計好似青花瓷，甚富中國特色

仲要有少少九十年代，稍為復古既感覺

座位隔得算開，坐落鬆動同埋有少少私隱

Menu有多款選擇，午餐Antipasti Buffet由$108+10%起

加Pasta加$10+10%，加Pizza則另加$20+10%

除semi-buffet，仲有單點既選擇

但價錢相差不遠，我地就揀左Antipasti Buffet+Pizza

甜椒味道清甜爽口，溫和不過激

稔身易嚼得黎唔係淋爛，食落都唔覺油膩

蘑菇好重菇味，但唔會苦口，反而係幾香又幾爽脆既

不過我覺得油左少少，感覺冇咁清新

烤南瓜片切得薄薄，色彩橙黃色感覺幾吸引

質感係爽口，唔係稔身爛茸茸咁

味道都特別既，唔只係南瓜既甜香，仲有少許既鹹味令佢唔會過膩

烤過後既焦痕，帶點焦香，更添美味

椰菜花稔身但仲保有少許脆度，纖維不韌，易嚼又不會黏在牙縫

但對我黎講都係有少少油膩感，特別係椰菜花都算吸汁吸油既

Parma Ham薄而乾身，仲有少少脆口

鹹度偏高既，但薄身又唔太油膩，唔會好難入口

魷魚圈有烤過既濃濃焦香味，仲要好重魷魚香

食落感覺綿軟帶嚼勁，就唔係爽口韌身既

Cold cut都有兩三款，除左Parma Ham仲有其他既醃肉

Parmigiana di Melanzane

呢個Pizza份量不算多，8吋既大小，同埋係薄批底

餡料係茄醬底、Mozzarella、Basil、茄子同埋巴馬臣芝士

餡料既配搭係無肉既，味道酸甜清新，沒有油膩既感覺

兩種芝士令整體香氣提升，仲會有點牽絲既效果

批底係薄身既，問題在於餡料對佢黎講太過濕潤，導致批底有濕爛既情況

基本上拎起身要輔助托起，否則會軟塌爛茸

批邊卻是乾身過頭，有點韌度，不太易入口

烤焗後係煙韌既，不單是Basil既清香，仲有點焦香，入口有麵粉既香氣

爭鮮-急急趕

都有兩年冇食過爭鮮堂食，食呢間……無非係貪平過口癮

因為價位不算太高，通常聚會多人就會買呢間既壽司，除番開至少條數係抵D既

回想起好耐之前已經係排長龍，限45分鐘

而家去到發現……限30分鐘

究竟食到D咩呢？

壽司

壽司既餡料食材就不多作評論，感覺都係幾參差既

不過賣相就算係統一，唔會相差太遠

講真師傅都算係咁啦，係咁起勢做都唔會整到令人難以接受

可惜既係飯底太鬆散，基本上夾起未入到口已經斷開左

芝士蛋糕

其實預左係冰凍到拮唔開，因為一定係雪左好耐要出先放上碟

芝士香氣可說是香濃的，但味道方面要預左係似日式輕芝士蛋糕

姐係芝士香味加上糖氣既感覺，同埋都係會粉少少既

環境係合格既，衛生情況都可以

店面細，但大家都係坐緊迴轉壽司位方便拎

老實講……呢個價，仲要咁趕急去食（坐落沖杯茶都未攤凍

我寧願去食明將，夠時間食，一定夠飽，仲要攤番開條數係平既

最衰而家幾間分店都執左……

質素同用料唔特別講，我諗大家冇試過只睇文睇相都有D共鳴

只係爭鮮其實都麻麻，如果唔係相識既人一齊食，我都唔會食……

The Landmark Mandarin Oriental-MO Bar-早餐時

呢次大概係最後一次去食MO Bar食早餐

唔講咁多，直去食物啦好嗎？

煙三文魚油脂不多，卻是香氣滿溢而不帶膩感

鹹度剛剛好，又易入口唔會太過濃味

肉質稔身有彈性，筋位不多，易咬易嚼

凍肉溫度適宜，入口唔會過凍，夠濕潤方便嚼嚥

肉香都幾重，脂肪位多但易去除

叉燒炒飯既叉燒乾身偏瘦，但帶肉香同焦香味

加上雜豆既微韌，幾有咬口

飯底炒得好香口，粒粒分明又夠爽夠乾身，沒有油膩飽滯感

熱粥粥底綿香細滑，米香甚為濃郁而清新

瘦肉有肉香味又唔算太乾柴，食落冇黏牙縫

灑上蔥花加添蔥香，更是香口

芋頭糕煎得香口重焦香，外層微焦帶脆度

油膩感不大，糕身爽實足料，有芋香又不粉爛

臘味餡料不少，分佈均勻，都幾足料

花粉係cereal既位置

第一次見有呢款野出現

食落都唔會奇奇怪怪，仲有少少清香

雜果粒切得細碎，有好多種水果

果香清新開胃又夠水分夠清甜

乳酪又係有幾款選擇

我都係中意莓果既款式，酸酸甜甜好開胃

仲要感覺同yogurt既味道合襯

朱古力酥中間夾有朱古力餡，老實講係好少餡料

酥皮香脆，層層相間分明，有層次感

不過食落有少少膩口，直至食到濃濃既朱古力香，甜中帶苦先冇咁膩

杏仁酥都係中間夾餡，表面既杏仁片脆薄香口

酥皮層層酥脆，富層次感

杏仁餡料有點嚼口，香氣濃郁，甜度得宜，整體不算過分甜膩

紅莓果撻都係酥皮，紅莓既酸甜果香清新鮮膩

內餡係有好多雲尼拿籽既吉士，細滑得黎味道自然可口

藍莓果撻都係吉士餡，甜滑不膩

酥皮撻香酥薄脆，而且感覺冇朱古力酥果d咁油

藍莓鬆餅鬆軟香口，附有都幾多既藍莓係大方既

酸甜既果味令到鬆餅冇咁膩滯，生色不少

San Pellegrino（250ml）　$58+10%

當日另點既有氣礦物水，唔知點解好想飲有氣飲品但唔想飲汽水

最尾都係隨心而行，揀左佢xd

Royal Park-1+1-基本款

平日要搵間價錢中等又係任食既下午茶真心有d難

好耐之前同朋友去過食呢間係帝都酒店既1+1 buffet

雖然唔係有咩名貴食材吸引我，卻是消磨時間加食野醫肚既好地方

因此其後都不時去大食一番

牛肉沙律

醬汁甜酸清新，仲有點辣味幾開胃

牛肉肉質稔軟，唔多脂肪，筋位稔身帶嚼勁卻未會過韌

加上蔬菜粒爽脆清新，整體唔會俾人易膩滯既印象

炸魷魚鬚

或者係放凍左，炸粉互相黏結，好難分得開，要一抽抽咁拎

調味得宜，唔會太鹹，可惜炸皮淋左仲有少少出油/__

魷魚鬚煙韌香口，冇雪藏味，大大條不吝嗇

泰式魚餅

外層韌身微油，有少少辣椒，辣得夠香又唔會好過份

加上醬汁食反而係幫到解膩

雞翼

夠香口夠入味，肉質鬆軟香稔

帶點肉汁，不會過乾

雖則表面係油光亮亮，但勝在佢熱，唔會太膩口

紅豆糕

紅豆味道清香，感覺偏自然，唔係太人工味

糕身爽口不黏，尤如大菜糕，令到整體好清新

藍莓蛋糕

面頭有一層藍莓果醬，仲帶有果蓉，甜中帶酸，感覺清新不膩

蛋糕乾身，食落黏口有點難嚥，又有大氣泡不夠細密

啫喱奶凍

啫喱韌身爽口，夠凝固唔會一下子溶爛

奶凍香滑細緻，但奶味既甜香有點膩口

老婆餅

外層酥皮不脆口，層層相疊卻有點乾硬掉

中間餡料既份量不多，甜香不膩

Tiramisu

芝士部分細滑綿密，芝士香濃郁，味道甜得不過分

中間有手指餅層但佔量不多，可算稍稍解膩

朱古力慕絲蛋糕

外表幾hea咁，但朱古力味幾香濃

甜香得黎帶點苦味，解下膩唔會咁易滯

慕絲滑身，泡泡都算細既

最底有蛋糕層，都係朱古力味配合整體，鬆軟可口又係解膩

鴻星-不流沙

本身呀媽約左朋友

但我又未食飯就順手搭機XDDD

三個人叫左成枱野食，仲要食得哂先奇XD（因為佢地都唔大胃既

滷水牛腱

筋位透光，賣相吸引，份量一般啦

夠哂上色，夠哂入味，肉既部分稔軟香口，唔會太散爛

瑤柱石窩炒飯

炒飯粒粒分明，調味得宜，色水淺啡帶金黃，賣相幾吸引

重點係石窩熱住佢，炒起既飯仲係保持乾身不黏爛，又唔會出油

有瑤柱既鮮味甜香，自然得黎又加添左鮮味，唔會覺得咁平淡無聊

蕃茄蔬菜鍋

味道清甜清新，調味唔會太重手，食材既清香帶左出黎

湯冇咩浮油，感覺清新不油膩，算係輕盈之選

牛肉球

牛肉球嫩滑，脂肪不多，爽口不黏

仲加入左香茜，味道清香但不嗆口，更是帶出了牛肉球既肉香

話梅蒸豬手

豬手稔軟嫩口，豬皮滑而不大油膩

肉質稔身好易咬開，仲要彈牙帶膠質，有點黏度更香口

加上酸甜醬汁同話梅自然酸香，開胃解膩

蒸排骨

肉質香嫩不實身，滑得黎唔會太多脂肪

豬肉肉香濃郁，加少少豉油食，鹹鹹地調味剛好

酒香鵝片

講真我覺得就冇咩酒味

唔講都唔知係酒香既，仲以為係普通燒鵝片……

鵝肉肉香幾濃，外皮帶點脂肪，但又唔係過油過膩

千層糕

蛋黃層既香氣十分濃重，甜度不高，但帶點點鹹香，幾有趣

糕既部分鬆軟香口，濕潤度高所以好易入口

流沙包

本身好期待食到呢個……

趁熱都要入口，就係想趁佢夠熱會流沙夠哂香

但……佢入面係溏心……都稱不上

餡料少唔再講，但佢係附哂係包既內側，根本流唔出

蛋黃香氣好重，甜度亦剛好

包子鬆香夠濕氣，唔會好乾好難哽

不過真心好可惜，點解會唔流心架……不如改左個名佢算啦唉//

BLT Steak-集合篇

BLT Steak其實都係一間我成日會去既餐廳

以前幾乎係飯堂咁

但其後唔係成日得閒咁長時間

加上佢地有時好爆場，冇位就冇得食啦xd

Popover

不得不提係佢地既餐包

感覺係泡芙，好重芝士香味，外層係脆身既

入面富牛油香，濕軟半空心，唔會好易滯膩

我就會點湯食既，更加香口

忌廉蘑菇

一道熱食，都算搶手

佢既菇片味道帶香，爽口又有水分

加上忌廉濃郁既香氣，同埋表面灑既椰絲脆感，我都幾中意既

吞拿魚螺絲粉沙律

吞拿魚唔會好腥，都係得魚肉又冇骨既

仲有佢係唔油膩，有少少鹹味，好易入口

但螺絲粉煮得太稔身，好易就會整爛整碎

個人認為整沙律既話，最好係有點韌度，咬落仲要有少少麵香麵甜既味道就最正

烘蛋餅

BLT Steak成日都會出蛋餅呢道熱食

不過今次佢地係有蝦乾同粉絲作食材，香口得黎唔會好似一般落薯仔咁飽滯

蛋餅邊位仲有少少脆度，又夠蛋香，感覺都ok

西蘭花沙律

西蘭花顏色青綠，新鮮爽脆，唔係煮過頭果種變黃淋爛既感覺

加上芝士碎，薄片得黎好香口

令到整體唔會好寡，又可以減低西蘭花既青味

忌廉周打湯

忌廉味重，湯身濃稠，調味得宜

湯入面有好多海鮮配料，感覺好足料

而且冇腥味冇雪藏味，飲得過既

香蕉麵包

濕潤香軟，香蕉味濃而自然清新

淋上少許朱古力醬，甜中帶苦，味道亦好配合

冇過幾日就已經再訪，不得不認是我的食堂

因為佢地既食物款式不時會轉換

所以我都好難一篇過打哂全部款……

佢成日都唔同，有時有番舊款，都唔可以話篇野outdated:^)

提子烤雞沙律

呢個係我好中意既沙律之一

提子有青提紅提，清甜夠水分，感覺好清新

加上少脂肪既切雞排，有焦香既味道又唔驚乾身，油膩度低好香口

蕃茄芝士沙律

蕃茄爽口多汁，酸甜既味道即使配芝士都完全冇膩感

芝士係Mozzarella，水牛芝士味道唔係話好鹹，但芝士香就夠濃郁

加呢隻落沙律添上芝士香氣又唔會過膩

紅酒牛腩

牛肉大大舊，但唔驚，佢唔係多筋難嚼既類型

肉質稔軟，牛肉肉香夠濃，仲要脂肪唔多，主要都係瘦肉

筋位係變哂半透明啫喱狀，微黏但幾可口

朱古力慕絲

滑嫩綿密，朱古力香真心係濃郁既，甜中帶苦所以都冇咁膩

同埋佢都冇出水，凍食更加冇咁甜膩

菠蘿蛋糕

表面係菠蘿片加醬面，甜得黎有酸味，食落唔會好膩

蛋糕係牛油蛋糕，甜度算高，但好香口，少少實身

牛奶慕絲蛋糕

慕絲部分係全白既，冇加配料

牛奶味道香濃，甜度不高，味道溫和

蛋糕鬆軟，薄身一層算係解下膩感

朱古力布朗尼

佢地既做法係內層濕潤而實身，入口即化，好似食緊朱古力咁

外層係帶點脆度同硬身，朱古力味甚為香濃，帶點苦香，唔會一下子太膩

意大利芝士蛋糕

蛋糕體係十分鬆軟既，其實都幾香口

面頭既芝士好重奶香，綿密不膩

藍莓撻

莓果唔可以話好多，但佢係蛋糕內餡，唔係吉士，咁諗既話就可以了

蛋糕體甜香綿軟，撻底脆身可口，整體配合得不錯

甘筍蛋糕

蛋糕體夠水分，仲好香甘筍味，感覺清新冇咁甜膩

面頭既芝士好濃郁，但夠滑身膩度不高

King Ludwig-麵疙瘩

趁放假，去左一段時間冇去過既赤柱行下:^)

去赤柱點會唔上美利樓睇下景呢？

仲要啱啱好點幾鐘去到，食個午飯先

環境夠光猛，乾淨企理

仲要有卡座，坐得舒服，闊落又有少少私人空間

海鮮沙律有D粉絲咁，稔身分明又爽，唔會太淋爛

海鮮冇雪味同腥味，凍食感覺好醒胃

蕃茄芝士沙律唔會太膩，蕃茄多水分，酸度不高，味道清淡

芝士大概係Feta cheese？香氣濃郁，帶點鹹度，實身微粉

加上少少青醬夠香口，整體又唔會太油膩

芝士煙肉洋蔥蛋批芝士味道帶鹹香，濃郁可口

洋蔥散發淡淡香氣，唔會好嗆，配合鹹香既煙肉粒，感覺好配襯

批式有少少淋身，好重牛油香但唔會太油膩

南瓜沙律既南瓜清甜爽口，纖維多但唔會好黏牙縫

加上酸酸甜甜既沙律醬就更加開胃

水果沙律主要都係蜜瓜，夠清甜多水分，沙律醬帶奶香但調味不濃

紅蘿蔔忌廉湯濃郁微稠，唔會好油膩

仲有蘿蔔粒及其清甜味道，感覺自然:^)

香草麵包微熱，香氣更是濃郁更易散發

麵包底乾身鬆軟，加上香草香同煙肉鹹香，唔會好寡

粟米沙律包都好足餡，撈埋沙律醬，酸甜既味道好開胃解膩

麵包底乾身，稔軟，鋪上餡料後有點濕氣透入，面層還是會有點濕淋

煙三文魚包面頭有薄薄既煙三文魚，甘香豐腴

魚油香氣滲進麵包面層，加少許酸甜既沙律醬

整體好配合，仲唔會好易滯

脆皮燒豬肘外皮香脆非常，每一口都帶有濃濃膠質，所以會有少少黏口

食落完全係冇油膩既感覺，香口到一啖一啖緊接住食唔使休息

豬手肉帶少少鹹香，外層既肉質較老身，乾硬帶脆度

中間既肉重肉香，較為嫩口，仲有少少肉汁唔會過乾

底下墊左少少酸菜，酸得黎好解膩，又唔係好乸口:^)

薯仔夠香口，薯味香，食完都未係好飽滯

燒德式腸外皮燒得充滿焦香，仲要有少少脆度，惹味吸引

肉腸感覺實身，唔會太濃味，冇咩脂肪粒，沒有油膩感

炒麵疙瘩幾香口，雖然係油左d，但味道ok

麵疙瘩帶點韌度，彈牙，嚼後有麵粉香甜味

梨子撻份量好細既姐

味道好清新，梨片薄身但夠水分

撻皮厚身，乾而硬脆，甜度不高，唔會一下子好甜膩

香港18-茶餐廳

話說我好少去茶餐廳，因為有潔癖費時坐立不安又麻麻煩煩咁

今次本身都唔知係去呢間既，係去到附近先通知我

環境都算舒服既，只係有少少逼狹

但係可以接受既程度，走道也算是暢通的

門面睇格局已經知佢係新式茶餐廳，即是有點像Cafe既

同埋真係好多好多人排哂隊咁，應該都唔差，放膽一試xdd

豆腐火腩煲

呢張相係食左先影既，因此份量同真實有出入:^0

佢係原鍋上，食時仲保持到熱度

呢點都好重要，因為咁多脂肪既菜式一凍左凝結左就真係有機會望到都食慾不振既xdddd

腩肉係燒腩仔果種，本身鹹度都好足，同埋入哂味既，所以食落有少少太濃味

肉質稔軟，亦帶點肉香，唔會俾醬汁調味蓋過

鍋中豆腐外皮吸哂腩肉既油香同醬汁，夠味得黎唔會過頭，中心仲係滑嫩既

整體黎講係幾油膩同濃味，但配飯食都ok既

煎涼瓜蛋餅

煎得外層金黃色，切塊後排得整齊，只看賣相都幾吸引

入口竟然仲有點蛋汁，蛋香亦甚濃郁

重點係……我好中意苦味既野，如無糖涼茶、純特濃咖啡……就係涼瓜我係唔食既

但佢呢個涼瓜唔會有難入口既苦澀味，食落爽爽地，味道不重，仲幾清新添:^)

咖哩牛腩

咖哩味夠香濃，辣度不大，容易入口

食完也沒有很口渴既感覺，個人認為都唔重味精既

牛腩煮得夠稔軟，易嚼咬

肉香幾突出，冇雪味冇腥氣，又唔會太過乾身

咖哩稠度剛好，撈飯易拌勻，唔驚黏不住飯粒

季季紅-有米豬

家庭聚會咁多人，與其煮菜煲多多飯又驚食唔哂，不如就請下外援啦

季季紅既有米豬其實唔係第一次係我地既飯桌上出現

但先前分得一兩件豬同一碗仔飯真心唔夠喉，今次可以食個飽了xddd

有米豬

拆到一半先記得影相XDDD，仲要專登撥走豬身既飯XD

聽講呢隻係不夠20日大既豬仔，對唔住我地好殘忍/____>\

外皮燒得薄脆，脂肪講真都多架

不過油香十分重，脂肪又係瞬溶於口，基本上唔會諗住去掉脂肪部分

豬肉肉香濃郁，肉質綿稔，不需多加嚼咬，仲有淡淡甜香

炒飯係加左蝦米去炒，香得黎又有咬口

其實要預左係油既，包係豬身入面吸哂肉汁同油脂冇可能完全唔油膩啦

只係佢既飯粒食入口又唔會好膩滯，真係入到口就突然冇左視覺上果種油亮亮既感覺

但點都好啦……都係一次半次過下口癮就算

Ruby Tuesday-牽絲的

即興約好友出黎食飯，但諗左好耐都決定唔到食野

因為之前申請左90天會員，大部分既食物都有半價

最後兩個人又去左Ruby Tuesday食XDDD

Fried Mozzarella

炸芝士條香氣濃郁到一端上桌已經聞到（Y）

外層炸得香脆，而且沒有油光沒有滲油，用手拎住食都唔會覺得手指會油淋淋

內層就當然係Mozzarella Cheese啦，姐係好多時食Pizza都會有既白色牽絲芝士

芝士香氣重，但味道唔濃，唔只牽哂絲，仲會有少少煙韌

醬汁係marinara，都係蕃茄加香草咁酸酸甜甜，清新開胃，有點似Salsa

Ribs & Wings

呢個豬肋骨拼盤有半份豬肋骨加幾隻雞翼

當然仲有佢主菜一般都會附既薯蓉蔬果啦:^)

燒肋骨我地揀左Honey Barbecue，蜜糖燒烤版；雞翼我地就揀左Buffalo，水牛城版

先講豬肋骨，燒得好惹味

食落啖啖有蜜糖甜香同焦香，但都係自然既味道，唔會太過甜膩

不過呢個比我地上次食既Classic就乾身硬身左d，個質感有少少似中式既燒排骨

肉質緊實卻不會難嚼，豬肉肉香都重既，脂肪位唔多，照食無誤:^)

雞翼好夠味，酸甜帶辣，香口惹味，真係想食多幾隻

肉質稔軟有肉香，冇咩雪藏味同腥味，感覺不錯

薯蓉細滑，充滿香草香氣，感覺乾身實在

配上富牛油香既蔬菜食就更易入口

Fajitas（Steak）

鐵板上到黎仲係咋咋聲:^DDD，夠哂熱辣

睇住佢d肉汁閃閃下，仲要墊底有少少菜吸埋，正！

肉既份量真心多，本身見到以為好多菜係底墊起佢，點知一路食好似食極都未完咁xd

肉質軟稔，有點嚼勁但唔會過韌，冇咩筋位容易食

肉汁豐盈牛肉味香濃．就算用鐵板上都唔會搞到乾哂水

一旁附有既係Tortilla，佢係軟身既版本，咁就自己包住肉同配料食

咬落係好重麵粉既香甜味，薄身，我自己食左都有三卷都仲係意猶未盡XD

配料就有Sour Cream，車打芝士碎條，生菜，蕃茄碎同Salsa sauce

我就會一卷包兩塊肉，仲有埋配料，重點係加埋頭先食ribs果d薯蓉！！！！！

倒d salsa係面先包埋佢，薯蓉同個包底就已經可以吸左少少汁

加上薯蓉既細綿香滑、配料爽口清新同牛肉濕潤稔香既感覺交織真係好正

Ice Cream Sundae

雪糕新地講真好抵食，同出面就咁一杯中高檔（？）新地，如哈根，都差唔多價

但佢呢度可以揀兩球雪糕：荷蘭朱古力、熱帶芒果、咖啡杏仁同法式雲尼拿

咁我地就揀左朱古力同雲尼拿兩個基本款啦

面頭topping就有Oreo曲奇一整塊同餅碎、杏仁同忌廉既

Oreo我諗都冇咩好評，佢冇浸到濕淋，仲係乾身脆口

cream我又接受到，其實真係好唔想食cream，唔中意果d味

但佢呢個似係手打既，感覺冇咁油膩，甜度都不高

灑上杏仁碎，有果仁香又有少少脆度，個配搭都ok

雪糕香滑非常，雲尼拿味香濃自然，朱古力味甜中帶苦香，不會太甜膩

Ultimate Bacardi Mojito（Mega）

酒精飲品我地係冇半價既，但朋友話想試佢就叫左mega-size

但我唔中意薄荷，講真飲左兩啖試左已經冇興趣繼續

因為佢超、級、重、薄、荷、味！！！！！

最後朋友自己飲唔哂，我唯有飲少少，但……都係淨半杯

老實講真係好後悔冇阻止佢叫-___>-

如果中意強勁薄荷既朋友可以試下

Al Molo-陰陰天 [已結業]

話說上次食過Al Molo Lunch Semi-buffet既Kale Salad

就一直好想再去食多次XD

結果有日突然午間冇特別計劃，咁擇日不如撞日……:^)

環境同上次坐餐廳正中位有少少分別

今次黎係可以對海景，感覺不錯

而且對海果邊有落地玻璃，光線自然，開揚同舒服少少

Starters & Desserts Buffet係$148+10%，不包飲品

由此計起既都係包飲品，加個Pasta或Pizza就加$30+10%

選擇要主菜就加$90+10%

Kale Salad

甘藍菜味道帶微苦，感覺清新開胃

加上少少核桃碎，脆度加上爽度，配搭不錯:^)

Beetroot Salad

紅菜頭切成粗粒，但食落仲係好爽口，不會過份稔爛

不過講真我覺得個味道唔係個個人接受到，其實真係有D青味:^0

Coldcut

其實餐廳供應既唔只呢一類火腿，記憶中好似仲有Mortadella等

但我就淨係想食呢個ham

鹹香味重，不過偏乾身，唔會太油膩

Pea Salad

有幾款青綠色但不同大小既豆類

唔會有青味同雪藏味，豆粒都係好香口，未會過稔

Rice Salad

飯粒粒粒分明，嚼咬下有米飯既香甜味道，質感硬身偏粉

我都幾中意食呢個沙律，佢唔多調味，唔會話好重口味

加埋其他既配料食，就算係飯都唔會好易滯

Tomato & Mozzarella Cheese Salad

蕃茄爽口多汁，酸甜自然，即使係配上濃香既芝士都唔會話太過膩

芝士香口得黎唔會好濃味，佢味道方面係淡口d唔係鹹版，令整體保持清新

Celery & Apple Salad

西芹同蘋果片都係爽脆既，因此個質感上又真係幾配合

蘋果既微微酸甜味降低左沙律醬既膩感

Nuts Chocolate Square

不得不說其朱古力香氣濃郁到不行，方塊感覺係微韌有嚼頭

果仁部分香脆，中意佢係有唔同種類既果仁，單是香氣已經富層次感

Puff

呢個甜品本身唔係叫呢個名堂既，只係佢個感覺有少少似，就代名住先啦XD

外層係脆口乾身既，實在就冇咩調味架啦，但帶少少牛油香

中間會有少少吉士，細滑可口，沒有半點膩感

Berry Crumble

如果有去開，或者係試過Dining Concepts旗下餐廳既Semi-buffet Lunch，

大抵都會對呢款甜品有少少印象XD

莓果部分酸甜不膩，加上Crumble焗得金黃香脆，帶點焦香味又係加分位

下方既方塊係有韌度、有嚼勁既，chewy既咬口幾有趣

Japanese Cheese Cake

說白點就是輕芝士蛋糕

芝士味香濃，但唔會實身硬身既，反而係輕軟可口

蛋糕濕潤綿柔，氣泡好細緻，感覺易入口，令人想一吃再吃

———————————————————————————————————

成日去BLT Steak食野

但係正隔離既Al Molo卻是一次都冇去過

淨係有時經過係透明櫥窗睇下佢地整自家制意粉

今次係過BLT門而不入

諗兩諗都係試下新野:^)（對我黎講係新XDD未去過就新架啦XD

靠海的餐廳除左有BLT Steak

還有一旁的Al Molo

Semi-lunch Buffet既價位比BLT Steak稍高

由$148+10%淨Buffet Bar計起

可以加錢配Pasta、Pizza或是Piatti Principali

釀小紅椒

Cherry pepper大概醃過，但味道不會過激

酸酸地，帶微微甜辣味，清新得黎唔會太膩滯

Kale Salad

好難得見到有Kale Salad

因為營養價值高，Kale呢年幾都好興

價錢亦跟住貴，有時仲俾人搶購一空

其實kale既味道係青青地

加埋合桃，整體卻反會帶點果仁香，青味同時變淡

雜豆沙律

有幾種唔同既青豆混合芝士碎

青豆味道微甜，感覺清新

配上芝士碎淡淡既芝士奶香，唔會太濃味，卻是更添一層次

Cous Cous

煮得剛好有點咬口，唔會太淋爛

加埋蔬菜碎粒又係幾清新既

就算係carbs，食多都唔覺飽滯

青蘋果沙律

清新開胃

青蘋果切薄片好脆口，又唔會太過酸

加左d沙律醬，有少少creamy既感覺個酸味就冇咁刺激

Parma Ham

感覺比平常食到既都瘦少少

鹹度適中，唔加哈蜜瓜唔加包，就咁食都唔會話鹹到苦

不過就稍欠油香味，如果中意油花油脂香既話，可能覺得有點遜色:^0

紅腰豆沙律

紅腰豆微粉，但唔會太淋爛，仲係有少少爽口

紅腰豆沙律都有絲絲吞拿魚碎，味道不太鹹，但起碼冇咁寡:^)

Focaccia

見有唔少人排隊拎，平時唔會食麵包既我都不禁要試試

麵包係heat住既，但食落唔會話好乾好難嚥

麵包香草味甚濃，外層微韌但帶脆

麵粉香幾重，越嚼越是有甜味

水果

有新鮮菠蘿、蜜瓜、西瓜同哈蜜瓜

甜味清新自然，水分都幾多架

同埋佢切得細細塊，唔驚食太飽

Brownie

佢地既Brownie係幾dense既

朱古力甚是香濃，面頭仲有層朱古力icing

整個感覺幾chewy有咬口，但未算係好黏牙

芒果芝士蛋糕

芒果甜中帶淡淡酸味，帶有清香

芝士部分creamy而不粉，可謂有點膩感

但餅底夠甜，加上有芒果清甜味，兩者可以解下膩

梨子撻

切得好薄好幼條……

當然話有d人可能唔中意食咁多甜食，呢個大小係剛剛好

但講真我覺得好難拎，又唔可以盛起，夾既話又會易爛

梨味是清甜可口的

面頭有少少梨肉，撻底香脆不濕爛

整體味道係好配合，同埋唔會好易膩滯

朱古力蛋糕

呢個朱古力部分係較brownie乾身而fluffy

鬆軟可口，甜度不高，唔驚佢太膩

冬甩

炸得好香口

可惜放得耐又冇熱住，攤凍左，冇泛油光但外皮感覺稍油膩

入面既餡料亦不多，個人認為主要甜味都係來自於外裹既砂糖……