憶起最近接觸軒尼詩的一回，大概要數多月前與同窗共聚的微醺時刻
而是晚打著重新發現港滋味的旗號暢飲一番，同時亦為與一眾友人相會的契機
首輪主打海鮮伴美酒，與五家本地食府合作，鑽研箇中酒食之樂
選址西貢勝記就再適合不過，多年蟬聯米芝蓮一星，為其出品作信心保證
Hennessy X.O（300cl）配阿拉斯加蟹 $12888
300cl實屬珍藏佳品，明明淨酒價都可以出到成萬，何況再配阿拉斯加蟹？
一督朋友身後的龐然大物，眾人無不目瞪口呆，隨即聽見接連驚喜呼聲
阿拉斯加蟹單論蟹蓋已比席上任何一人的臉還大，蟹腳也甚粗壯，確是足量
師傅貼心地為我們破開蟹殼再擺盤，手工精緻，改頭換面後多分日式風味
蟹肉量多而厚身，力保濕潤，甜美無腥，加上絲絲不韌，嫩得可以
食時伴飲Hennessy X.O，討其醇厚酒香當中的辛辣衝擊，讓蟹鮮不至單調
Hennessy X.O（150cl）配芝士龍蝦脆米粉 $6888
再次一嚐記憶中的菜式，龍蝦肉不改彈爽清甜，變的是擺盤更為豪華
鬆酥帶脆的脆米粉片片香口，沒有滲油，沾上濃稠芝士汁尤其滋味
此時呷一口Hennessy X.O，盡見去膩消滯之效，又可以多吃一件了
Hennessy X.O（70cl）配龍吐珠粟米斑塊 $1988
斑塊先蘸上蛋漿及麵包糠，炸至金黃，未泛油光，固然是趁熱享用為佳
店方將汁餸分上，以免斑塊浸至化爛，但其實就算炸過，脆感仍不明顯
可能因為麵包糠層裹得細薄，又或者只作輕炸以留水分
不過在腍滑沙巴龍躉肉的映襯下，還是會有一下酥；要硬脆就吃炸魚骨吧！
粟米汁味甜，非常稠潤似湯，沾魚之外，拿來拌白飯吃應該也不錯
Hennessy V.S.O.P（35cl）配芥末山楂骨 $580
肉感富有彈性而不韌柴，僅有輕微的芥末香味，卻不覺山楂的酸，以鹹為重
然而，來到重口味肉食一環，卻改襯Hennessy V.S.O.P，豈不是反其道而行？
換個角度來看，有著更溫和順口的香料甜味之餘，亦不怕食物與酒精同搶鋒頭
一場來到，不可錯過勝記的數款招牌香口炸物，先有隻隻豐滿的椒鹽鮮鮑魚
薄薄炸層呈微酥，鮑魚帶輕輕甜意，彈牙但仍屬易嚼，不會韌硬得似橡皮
至於西貢墨魚餅則更討喜，一如以往的脆口，墨魚餅甜鮮煙韌，嚼起來又頗爽
而脆皮滑金磚雖非名貴食材，但炸皮薄酥，襯上細嫩滑溜的豆腐，其實好考功夫
美酒佳餚同樂會，飯聚一夜笑聲不斷，食飽，飲飽，亦笑飽
但飯後總會心思思想嚐一點甜，臨起行前也要將三色糕點收入胃中
當然，要清的必數桂花杞子，嗜甜則有益力多糕，柚子就屬清爽之列
食邊款，食幾多，悉隨尊便，唔使考慮咁多！（龍哥語氣）
沒有留言:
發佈留言