GROM-若然你非常嗜甜

大熱的意大利Gelato－－GROM已經登陸香港

在大家都紛紛一試的時候，應友人之約，我也難得地加入這一服旋風之中

由2002年突如其來的一個小想法開始，一年後，2003，終於開了第一家店子

本著純天然，無染色、乳化劑及香精等添加物，GROM食中近年的天然潮，名氣漸大

位於IFC TWG附近的GROM人流時多時少，友人早前經過是水靜鵝飛

然而到我終於趕到的時候，早已排起人龍，店旁邊都站滿了人

但剛剛好，一邊等，可以一邊看看有什麼口味，其實就只有六種：

Crema di GROM、Pistacchio、Stracciatella、Gianduja、Vaniglia及Fragola

除了單買雪糕，GROM也有Affogato、Biscotti、Shake及其他飲品供應

係Cashier俾完錢，拎住張收據，仲低低能能問左句：「請問係唔係而家要揀埋味？」

收銀的……應該係香港職員就笑笑口答唔係，指左指隔離

原來係沿住雪糕櫃邊行邊揀，而且可以先試味再選味

不過講真果句，有位外國女店員一直黑黑地面，而且舀雪糕的時候好像不太俐落

可能一直工作一路反覆地舀雪糕舀到攰舀到厭倦，又或者係等緊放Break？

賣相東歪西倒，不吸引也算了，但最先舀的Gelato已經是微溶狀態滴流下來了……

一邊排隊，身為IGer的友人一邊觀察店子四周有沒有什麼好地方好背景可以拍照

沒有太多穩定劑之類的人工添加，Gelato溶得快，加上我們選了甜筒裝就更危危乎

「唔好諗咁多啦，是但啦，求其快影完就食啦！」我如是說道。

結果，一買完，不多加思索，一個箭步衝去店內雪糕櫃旁邊的小角落

Large（up to 3 flavors）　$79

老老實實，佢Medium同Large個甜筒既大小分別唔大

先前收銀處那位職員好好人咁拎起俾我地睇過，只係朋友話價錢差唔多就無所謂

Medium都係可以最多揀三款口味，價錢為$69，冇咩事就唔好浪費果$10……

最頂係Fragola，即係我地平日講既士多啤梨味，Sorbetto

酸酸甜甜，正正就適合而家夏日熱辣辣的時候，比起其他口味，叫做清啲架啦

頗甜，勝在果味自然，質感亦夠細滑，不會太重冰感粗糙沙沙的

然後就有Gianduja，Menu寫係Piedmontese Combo：朱古力加Tonda Gentile榛子

依然十分細緻順口，朱古力味偏重，榛子香很輕淡

其實可以當佢係金莎味，但佢係極少果仁既金莎，而且好甜

最後最底一層就係已經溶溶地，滴哂落黎既Pistacchio，唔使點講，就係開心果味

若要說開心果味，的確算濃郁，且是不改的幼滑細密

問題就係太甜，加上細滑又不會太稠太實，食多兩啖就開始覺得膩

輕鬆食完份量不多的Gelato，當然就要試埋個甜筒

老實講我已經冇咩期望，好彩唔係威化筒，而係窩夫筒

少少脆，未有過份受潮濕軟，不太甜，剛好平衡一下剛才雪糕的過甜重口味

可是談不上是好吃的脆筒，比可以係超市買番屋企自娛自樂那種只好些少

以此價位而言，我個人就認為唔算抵食，想試一次還是可以的

畢竟想要食到既口味係可以展現出黎，例如開心果，香味實在頗足本

若是喜歡細滑又夠甜的Gelato，也許這家的天然出品就可滿足你了