2016年7月23日星期六

聖羅蘭-意外捕獲甜酥皮

遠遠來到西環,三人悠閒地四處遊走,不外乎要尋食
嚷著肥了,要減肥,另一邊揶揄身邊友人也變肥
結果我們還是不斷張望,以視線地氈式搜索附近周圍的各式美食
所以說,物以類聚,人以群分

經過很久以前跟一朋友到西環逛逛時提起的一家小小街坊餅店
名為聖羅蘭,突然想起YSL,然後就是羅蘭羅女士,禁不住想笑
果然我的思路是難以觸及,跟隨的,因為只有我在笑

外頭就是由細到大常見熟悉的蛋撻櫃,此店的酥皮蛋撻好像頗有名,那朋友亦讚過
再入店內走走,想不到有驚喜新鮮發現--酥皮椰撻!!!!!
我想酥皮蛋撻、鮮奶撻、蛋白撻……可能會聽講過,或者親身嚐過
但用落椰撻就真係第一次見,畢竟中心餡料係實身,唔似蛋撻等等咁既糕狀

酥皮蛋撻屬於鬆酥系列,外層不是非常硬脆那種酥皮,反而是細緻一點的
其實拿上手會覺得有點軟腍,會怕折斷蛋撻,只好捧著
蛋撻餡算細滑,蛋香還可以,酥皮附帶油香,內層略濕,會有少許漿口
即食的會比較好,外帶的話就必須肯定自己食到帶濕既蛋撻

讓我們更期待的反而是酥皮椰撻,沒辦法,因為真係好難得會見有
本身椰餡已經非常實身,偏乾,沒有剛才蛋撻那種濕氣問題
酥皮在此顯得乾爽,帶油香,層層分明,但仍是比較細緻的一款
椰餡甜味意外地不乸口,來得溫和,椰香也算突出
外層帶點烤過的焦香,其實個面最好食,糖水櫻桃唔係話好食但經典必備
油在椰餡,酥皮意外地唔算太膩口,不過細皮食落都係會有少少漿口既

總括而言兩款酥皮撻之間,我想我會挑選椰撻
一來款式頗為特別,十分少見的酥皮加椰撻造法
而且味道質感上仍比蛋撻較為合意,椰餡味道亦算足椰香,就差在太油
話時話,對上一次食街坊包餅到底係幾時既事?

2 則留言: