某夜難得有幸與幾位食友見面
地點梗係要揀間食店架啦XDD
我地今次飯局就選址係最近新開
係Instagram風頭不小既Espuma進行
究竟一間小小既西班牙風Cafe……
點解可以令我地IG日日俾人洗版呢？
環境幾闊落，我地幾個人都有少少鬆動空間
坐得舒服，難怪Last Order之後我地同隔離枱都坐係度唔肯走XDD
一出𨋢已經可以由大大玻璃窗望到成個裝潢
燈光夠猛但又唔會刺眼，可以睇得清楚影得清楚真心讚（微夜盲
以下有部分食物（其實我係指飲品）我係冇試到既XDDD
不過都貼出黎俾大家過過目啦:^D
Tapas
Truffle Fries
黑松露菌薯條是冇得輸的XDDDD
黑松露香味非常濃郁
配上菇菌既獨有香味，更上一層樓
咀嚼之間，發現原來仲有點肉碎
肉碎既肉香同質感反而形成左對比，有嚼勁又不油膩
整體食材及味道配搭不錯:^0
唯薯條夠香，但稍為軟化了，未夠脆口
（也許是我們拍照拍太久導致薯條被濕氣影響？
Jamon and Spinach Tortilla
賣相……還好吧，說實話冇外面tapas bar用鑄鐵平鍋上咁熱辣吸引
不過一切係要取決於味道既:^)
表面呈金黃色，帶有淡淡焦香
一切開可見有不少餡料，是不吝嗇的
Spinach打得夠碎，加上有蛋香坐陣，冇咩青味苦味
火腿鹹香可口，脂肪不多，沒有油膩既感覺
薯仔切片後保持原形，未有半分淋爛，香氣甚濃，食完都唔覺幾滯:^)
仲有既係……我地影相都影得耐，佢仲係保持到暖身
唔會凍硬咁（店內開緊冷氣），呢點要讚下既
Main
Paella con Marisco
真心講句我地一致認為係足料既
但份量係for one既，非聽聞既sharing portion
大蝦青口等海鮮爽口彈牙，鮮美香甜
飯粒飽滿之餘，仍是粒粒分明，有嚼勁有米香
味道清新帶微酸，沒有膩滯感
Avocado Eggs Benedict
因為知道師傅會對半開牛油果黎整，感覺好新奇
有興趣試下係咩味道，結果我地點左呢份xddd
賣相都不錯，色彩配搭同擺盤是合格的
又係果句啦，影相影太耐……
不過，佢既Egg Benedict竟然仲係有流心的
蛋汁十分濃郁香滑，佢地既流心還是帶有稠度，唔係水汪汪既感覺
荷蘭汁用量得宜，附有點點牛油香，卻又不過太過膩
牛油果雖則係大件厚身，但食落唔會太熟爛，清香清新不覺膩
可惜的是最底層既麵包
原本我期望佢係烤得焦脆既多士，豈知是香軟綿甜既麵包
或者可算是又一新配搭，但我個人prefer脆口淡味麵包:^|
Pizza España
又是胃納小之選
無論如何，先嚐嚐味道吧！
芝士量多，落料不手軟，香濃得黎冇油膩感
仲會有牽絲，一切開果下真係雙眼發光了
肉腸香得黎帶有微焦味道，脂肪位少唔覺肥膩
另外底膏酸甜開胃，清新又解膩，令我地都無懼肉腸同芝士既來襲！！！！！
批底外邊是薄脆的，可是中心部分有點濕軟了，大概是太多配料將濕氣困住吧
來一個小小的分隔線……XDDDD
Waffle
Piña（Whole）
呢個就係special menu既香草肉桂菠蘿窩夫配雪糕
這是我們強求（誤）逆天（誤）提出下特別製作的！
其實佢地Cafe除左基本款waffle，仲有特別款
而特別款係根據week作分配，如星期一、五一款、星期二、四一款……
咁係因為唔想一次過訂太多水果積存下來不新鮮
呢點真心要欣賞佢地，對食材既品質有要求（Y）
講番味道先啦
來！菠蘿帶有肉桂香，甜中帶酸，確是清新
吉士感覺甜滑，creamy得黎稠度適中，易於塗抹
窩夫更不用說，香脆可口，微甜帶焦香！！
邊邊位係唔會硬到界嘴角既（試過所以唔想食waffle……
配埋細滑甜美既雪糕球，有點濕度好易入口，根本唔使用上cream黎潤口
Japón（Half）
呢一款就係洗版奇品
有一半人話好特別，有一半人卻指可一不可再
點都好，作為吃貨是不能道聽途說的，必須親身體驗方能作準
白色既賣相夠哂特別吸引眼球，同時卻有點擔心係個伏
趁熱！我同你講「一！定！要！趁！熱！」，唔好話我冇提你！
入口仲帶有熱度，難以想像地薄脆
聽講話係韌口難嚼得不行，我就跟你們說要「趁熱食」
感覺有d似韓國米果，帶韌度，但唔會話係咬唔開囉
嚼咬時仲會有淡淡甜香味，甚或帶點米香
黑糖醬認真係稠身，甜中帶焦香，稍有鹹味令佢唔會過甜膩
紅豆蓉同吉士……講真有點抱歉，個賣相真的不討好
但我buy紅豆蓉，夠清甜，食到有紅豆豆皮，係好自然既味道
Dessert
Ile Flottante with Hazelnut
浮島可是限量的
面頭白色既係蛋白，略略焗過，因此外層有薄膜可以固定外形
蛋白入口即化，綿綿的感覺尤如咖啡上的發泡，亦有點像烤過的洛磯山棉花糖
榛子香脆焦甜，同蛋白島有強烈對比，但一齊食又唔會突兀
雲尼拿汁甜而不膩，滑身之外味道夠自然
極多既雲尼拿籽只係沉哂底忍緊身xd
我覺得雲尼拿汁可以更為濃稠，才能沾上浮島
否則只會是兩種分離既材料，不能吃出甜綿香軟的細膩配搭
Mr. Grey Likes Crème Brûlée
有聞呢個都係受歡迎既款式，咁我地黎啦！
表面插起兩片焦糖脆片作裝飾，但不容小覷
因為它可是帶著香濃咖啡豆而來的
咖啡豆微微帶苦，但香氣之濃猶勝苦味
焦糖薄得晶瑩剔透，甜中帶焦香，沒有膩感
敲碎脆口焦糖層，直攻燉蛋部分
嫩滑奶滑，Earl Grey伯爵茶香濃郁滿口
甜度本身不高，加上伯爵茶的微甘，清新不膩
說真的我唔知面頭既cream是怎樣一回事
如果要固定焦糖片可以用其他方法吧……
這種唧cream令人不禁聯想到一星酒店buffet隨隨便便做出來的甜品
浮現出甜膩到不行的可怕感覺……
呢個焦糖燉蛋根本就唔係同果種讓人聞風色變既「甜品」同等級
何解要任由個賣相去自貶身價？
Drink
Shakeratto
好似話西班牙遠道而來既咖啡師即將回國
咁上到黎當然不得不點杯咖啡嚐嚐
泡沫綿密細緻，咖啡濃郁卻不會有苦澀味，滑溜順口
面頭仲有咖啡豆，脆口，咖啡香濃得蓋過了苦味
我不嬲唔中意飲甜野凍野，但呢杯，都係飲得過既:^)
呢d係幾位食友所點既咖啡同冰沙
大家都是自嚐，因此味道就不得而知了
不過睇唧花同擺砌看得出是用心的:^)
順帶一提服務吧
因為當晚我地冇留意時間（隔離其他客人都係
last order之後仲留低吹下水咁，坐到成十點半先至走:^0
但職員絲毫沒有不耐煩的樣子，更沒有半點催趕
甚至只係提左我地last order，冇講過話幾點就要清場
不好意思耽誤你地清潔同下班，但認真好貼心
然後，佢地都幾留意客人需要
講真果句職員人數不算多
果晚真係爆哂場咁，聽講呢排好多時段都已經係人頭湧湧既盛況
都唔會預一叫即到咁
不過佢地係一見到就會應，就算係仲做緊其他工作，而唔係扮睇唔到由你係度等
個個做到踢哂腳仲面帶笑容呢樣野真係好難學得黎xdddd
綜合黎講今次係Espuma既聚會感覺不錯
當然食物冇話一定合哂各人口味
但只係單睇環境睇服務都一定係唔會寫得出劣評
希望日後都可以同各位食友一齊周圍大食狂掃，分享食物分享心得啦:^)
沒有留言:
發佈留言