一直都好想試泉章居
因為好少食客家菜，口痕想試下XD
而呢間又出名又話幾好食咁
不過有朋友話已經跌左watt，貴但一般質素
點都好，吃貨都係不懼中伏勇於嚐菜既XDD
今次同呀媽一齊去食晏
兩人點左四人午市套餐
仲要另加點心……
鹽焗雞（半隻）
份量幾多下喎……色水賣相都吸引，唔知味道點呢？
雞肉連皮但脂肪帶不算多，全熟未算嫩滑
雞肉肉香味重，夠入味，食到有淡淡鹽香又唔會過鹹
沾上沙薑，味道香濃，加上雞肉香氣，感覺多層次而不膩滯
但注意別過量沾點，因為真心會鹹到味覺遲鈍XDDD
菠蘿咕嚕肉
一睇個量，真心足料不吝嗇，唔係得細細碟少肉多菠蘿咁
菠蘿就唔多提啦，都係罐頭咁，但佢既味道算清甜，唔會乸口
咕嚕肉就重頭戲啦，外皮非常香口薄脆，咬落真係有咔嚓聲
本身都擔心佢d肉切到咁細塊一口大小，好易過熟就硬到韌到咬唔到
但睇黎我只是杞人憂天
雖然並非鮮嫩多汁，但佢係易咬易入口又有肉香
酸甜汁都係另一佳作，稠度適中，剛好可以掛上食物
酸度偏高，未至於嗆，唔會甜到膩口
整體感覺好似食小食咁開胃口咁香口，真係話咁快就解決成碟了
茄子斑腩煲
呢度既茄子感覺爽口，唔會太熟太爛，卻又易入口又富茄子清香
斑腩十分香脆，肉質香嫩鮮美，沒有腥味
醬汁微稠，鹹得黎可以帶出茄子同斑腩食材鮮味，唔會好搶味
另外要一提係佢極度保溫，我地放到最後先食都仲係熱辣辣既
蔥油餅
薄身，煎得金黃色重焦香
食落外皮薄身脆口，不太油膩，調味不濃
煎餅帶點煙韌香軟，有咬口，夠熱夠香
美中不足的是蔥花實在太少了，蔥香味太清淡，近乎是有形無味
豆沙鍋餅
同我地想像中唔同，仲以為係卷餅果種
外皮軟稔有嚼勁，有好多芝麻，香氣甚濃
煎得焦香之餘，更是帶出芝麻香氣，可惜是有點油膩
內餡香甜不膩，味道自然可口，甜度適中
紫米西米露（送）
好少見係呢款，普遍會出紅豆或綠豆沙咁
紫米夠綿軟，但都有點咬口
西米晶瑩剔透，綿身可口
其實食到都足料，甜度不高，感覺清淡:^)
講真我覺得還是不錯的
整體黎講午市既食物性價比都係高於標準既
環境佈置幾特別，係有卡位，唔係只有圓桌咁
仲要闊落夠哂位放個人物品
服務都ok啦，一開始睇表情以為係嚴肅果派
但對答過就知真係冇咩事，唔係黑面
同埋上個煎餅果陣佢係冇切開既，另外送上刀叉亦顯得貼心
沒有留言:
發佈留言