翠亨邨-點心熱

好耐之前係Mira Dining既網站睇到有點心放題promotion

其實一直都想試翠亨邨，但約唔到腳單挑好冇癮既

點知過左一排仲上埋雜誌

見佢影出黎已經係座無虛席，大概出左報導會有更多食客

本身諗住都係冇望冇得試架啦，點知朋友竟然話一齊去，咁梗係要試試啦

為免冇位，我地早早剛開門就到左啦:^)

門面幾有特色夠藝術

元素是走香港復古懷舊路線，但佈置舖排又有設計感

環境不錯，坐得好舒服又夠哂位郁動

得意既地方係佢有個卡位（？）（如相中可見）

感覺有點新意，唔單係懷舊風

任點任食Menu有好多款式選擇既

由前菜到點心到甜品都有

唔係話俾你任食就求其得幾款咁

但朋友係唔食得辣果種，比我更甚，因此我地冇點到辣既野

星期一至四$128已包茶芥加一

原本係上午11時至下午3時無限既

但人流太高，當日我地係12:30p.m.就要交枱

前菜小碟

椒鹽豆腐粒

外皮炸得香脆，薄身得黎香口不油膩

熱度剛好，入口即化，豆腐綿軟得不行

仲有脆口炸蒜（？）同埋椒鹽調味，惹味可口，encore必點！

麻醬鮮淮山

淮山帶有清香，唔會有令不少人反感的藥材味（我倒是很愛

入口是出乎意料之外的綿密，原本以為係硬身實身偏脆口既

配上麻醬，微甜微酸，芝麻香十分香濃，整體可口吸引

陳醋青瓜

青瓜新鮮爽脆而多水分（唔係出水果種）

陳醋酸度一般，香氣幾重幾濃，甚是開胃

上海肴肉

肴肉切成薄片，晶瑩吸引，感覺比厚身既清爽

鹹香味道重，質感爽口不膩，更有點兒彈牙有嚼勁

精選點心

筍尖鮮蝦餃

蝦餃外皮晶瑩剔透，彈牙又不會過厚

蝦肉幾大粒，落足料，鮮美爽口好正:^)

筍唔筍尖我就唔係好分到啦，但幾清新嫩口既

調味亦得宜，不會蓋過餡料既鮮香味

潮州蒸粉果

皮唔會好厚，又唔會好黏爛:^)

入面好足料，有蝦有豬肉又有蔬菜咁，爽口味鮮

另外係佢有d水分，可以話佢入面係有汁咁

鮮味不油膩，更加嚐得到食材既味道

北菇蒸燒賣

一睇個size都大既，粒粒飽滿

面頭有蝦仁，彈牙又鮮美，但怪怪地係有d凝漿，大抵是粟粉水結糊

食落好足料，濕潤保持水分易入口

肉香加上菇香既配搭真心ok，菇味鮮唔會奇奇怪怪:^)

蠔皇叉燒包

賣相還可以，未知味道如何？

餡料份量不算多，但可以接受既

叉燒味道普普，平時聽不少人讚翠既叉燒正

或許是因為太多醬汁掩蓋叉燒香味的緣故？

薑汁雞包仔

外表同叉燒包相似，我地都係分唔到照食左先xd

雞包餡料份量都可以接受

雞肉唔多肥膏，真係有肉香冇雪味既

可惜……薑汁？認真我真係唔覺有薑汁味……

爵士奶皇包

張開大口一咬……「嘩！好熱！」

奶皇餡幾乎要流瀉而出，想馬上用口接住，卻怕了那燙口感覺XD

餡料黃得黎顏色自然，香滑不膩

甜度適中不會過重味，食完唔覺太heavy

腸粉

皮薄晶瑩，彈牙可口，感覺細滑而不濕爛

不過佢幾款既通病都係太多皮，真係食皮都會滯

蜜汁叉燒味道不濃，叉燒偏瘦但夠水分唔會乾柴

陳皮牛肉富陳皮清香，只係牛肉也許太滑身，食左都唔覺有……

韭黃鮮蝦都可以的，蝦肉鮮香爽口，韭黃淡淡清甜也算配襯的

高湯牛肉球

牛肉球嫩滑不膩，帶點肉香，味道輕淡

但個人認為過於鬆散易爛

高湯清澈，沒有油膩感，調味鮮味自然，唔會太重味

也許因用高湯浸，食落冇咁油膩，濕潤易入口

蠔皇鮮竹卷

腐竹豆香重，滑身綿軟可口又不易爛

餡料好足，整個係好飽滿又有鮮香味，入面既蔬菜幾爽口

配上少少蠔油，微稠可以掛上鮮竹卷

但味道又唔會過濃，只係香口不膩:^)

順德魚皮餃

呢個真心幾正，完全一口大小但會食唔停口

外皮微硬但係好易就咬開既

一咬就是爆汁的感覺，肉汁豐富，包係硬實皮層內不會未食先漏

睇個汁好似好濃味咁，但其實係剛剛好，反而更帶出肉香鮮美

蜜味柑桔雞翼

外皮十分香脆可口，而且係冇油膩感既

雞翼係熟透左，冇雪藏味冇血味

柑桔味甚濃，酸酸甜甜都算開胃

不過我總覺得有薄荷味，唔係太中意

沙律明蝦角

炸得好脆口，外層只係有少少油，唔會泛哂油光

皮薄餡多，蝦肉都係好鮮香

沙律醬卻是有點怪怪的，太creamy太固體了，質感幾有幾分像布甸……

蜆芥鯪魚球

外皮有點米粒，幾特別既

炸完係好香脆，沾了沾蔥油就大口吃下

鯪魚球重魚肉香，彈牙滑身

可惜我真係唔中意鯪魚球既味，真係仲會有點腥氣，我還是草草吃下放棄吧

安蝦鹹水角

炸皮煙韌甜脆，講真個甜甜皮真係我中意鹹水角既原因XD

足料香口，花生香氣濃郁但不會有很油膩的感覺

整體黎講都幾好食架，皮又唔算太厚唔會一下子好膩滯

滋味甜點

砵仔糕

有黃糖同白糖兩款

個人中意黃糖款，甜得黎多左d香味，唔係咁單調

不過我覺得佢既感覺太實身，欠缺了彈牙的感覺

馬豆糕

馬豆綿密又算多既

糕底嫩得黎唔會好水，香甜細滑味道夠自然

但個人認為size大左d，佢大可以分一半但上兩件，唔係一次過大件上

椰茸糯米糍

椰絲香氣非常濃郁，但同時感覺係清香不混濁

糯米糍軟糯香甜，仲帶點煙韌嚼勁

其實我個人覺得呢個算係當日最好既甜品了……

生磨杏仁茶

香滑，沒有油膩感覺

甜度適中，不會乸口，算是自然的

生磨合桃露

合桃香氣不算很濃烈，感覺不膩

細滑稠密得黎唔會好溜，甜味不大亦不覺甜膩

杏仁豆腐

食左但冇影到，係凍食既

杏仁味如杏霜，老實講係假左d……

不過食落嫩口有豆香味呢點補番

滑身有如豆腐花，卻是實身有彈性如啫喱

服務就真係……正常既……

人手似乎不太夠應付當日既墟冚場面

一入座過左一段時間都冇人理我地

想開茶都要問幾次先得，期間只係會叫我地等一陣但之後係冇人會黎既

當中有少少漏左單，叫個人都難，更莫論收碟收籠

重點係佢限我地個半鐘，手腳卻如此繁忙如此緩慢……