位於銅鑼灣珀麗酒店既星域其實是list中之一
但一直冇去試
今次係諗唔到食咩好既時間突然腦海浮現了它的名字
那好吧就這間試下姐:^)
Semi-buffet Lunch Menu由$148+10%起
Salad Bar同Dessert Bar都係buffet形式任食既
仲有幾款普通飲品可以任飲:^)
另外就會有個主菜，如果要安格斯肉眼則要多付幾十元了
雖說當日係平日，但都幾多客
同埋餐廳似乎唔係好多位
要試既話我諗最好訂位，又可以訂靠窗卡位，落地玻璃幾好view:^)
我地walk-in就冇得咁要求，因為而且full哂窗口位
Salad Bar
三文魚刺身
唔好期望好高質素，都係切哂一大碟拎出黎冰鎮既
講真刀工就……真係一般啦，但佢都算係厚切
油香不算重，感覺亦不膩，至少佢冇腥味，有淡淡三文魚香
都冇咩筋位，肉稔得黎有嚼勁，唔會話係好霉果種，色澤都係合格既橙紅
菠蘿火腿沙律
講真呢個係我呢餐最中意既沙律xddd
菠蘿十分juicy，味道自然，唔係糖水罐頭感覺
甜中帶酸，令人覺得好新鮮好開胃
火腿係薄片果種，但味道不會太濃烈，沒有破壞清爽印象
雜菜沙律
有好多種蔬菜，如青瓜、紅腰豆、栗米等
沒有太多調味，主要靠蔬菜既原味，反而更是清新
青瓜好爽口，食落又多水分，解膩一流
蕃茄沙律
酸甜清爽，蕃茄好多汁，微凍食左幾開胃
佢其實真係淨蕃茄咁唔會有芝士等等，食落好清
西蘭花忌廉湯
佢地整得算係濃稠，可能會有點膩滯感
西蘭花味帶清香，會見到湯入面都好多西蘭花碎
湯味偏濃，幾creamy，但忌廉香不重
豬肉燒賣
其實呢樣野會出現都係幾神奇既事XDDD
燒賣外皮也許有點濕潤破裂了
餡料都好足，食落香口又唔會太油膩，實身並非填粉呃稱既，調味亦剛剛好
估計係外面交貨？怎樣都好，我覺得選貨揀得ok囉xdddd
花生雞腳湯
呢個真係幾神奇，呢個湯好少係semi-buffet會出現XD
花生香氣濃郁，加上雞腳既少少鮮味，飲落幾自然足料唔人工
不過都係有d油，同埋味濃而集中，都係淺嘗輒止
Main Course
香煎龍脷柳配芒果沙沙
賣相都幾正常既，感覺唔會好突兀
龍脷柳煎得好熟，魚香頗鮮，冇雪藏味及腥味
肉質偏老但不乾不柴，入口彈牙爽口，外層更是有少少焦脆感
調味得宜沒有蓋過魚味，如果可以煎得嫩滑香口則更理想
芒果沙沙清新帶酸甜味，因為係稀身既，唔會太稠太膩滯
鮮香仲有果香味，與煎魚同食解膩之餘又帶出另一味道層次
碳燒牛柳配燒蒜汁
牛柳叫左七成熟，容易切開之餘又不韌口
輕輕一壓已是肉汁滿溢，沒有血腥味，反之是濃濃既牛肉香氣
外表帶重焦香，沒有太多苦焦味，卻是能鎖住肉汁，保持牛柳濕潤度
外層既肉燒熟，乾身但不老柴，易咬易食
內層帶粉紅色，肉汁豐潤肉香濃郁，都冇筋位唔會黏牙
蒜汁有輕輕蒜香，沒有嗆感，味濃但份量得宜不會過了頭
薯蓉香滑可口，細緻不膩帶點奶香
置於牛柳之下吸收肉汁後更是惹味
Dessert Bar
麵包布甸
麵包香脆帶焦香，有少少嚼口是可以的
可惜佢布甸部分過老，乾身得似煎全熟蛋
而且又有好多大氣泡，食落好粗糙，沒有細緻嫩滑的感覺
雲尼拿汁甜得黎有少少雲尼拿香味，但偏人工香油味
順帶一提係當日雲尼拿汁沽清都冇職員去添補……
仲要布甸係咁乾身既……教客人如何吃？
朱古力慕絲蛋糕
一睇個樣以為係伏，但點都想試下先下定論
豈知佢既mousse部分係細滑嫩口，重點係甜中帶苦香
配上表面既朱古力漿，朱古力味甚是香濃，膩感不大
整體係出乎意料既正常，亦沒有人工藥水怪味:^)
芝士蛋糕
芝士味不重，帶檸檬香味，感覺好creamy
蛋糕底覺得在我角度不討好，我都係偏好餅底
佢既蛋糕底……唔知點解我覺得好舊底街坊餅店咁……
但家人又幾中意食（？），原因不明不過我就transfer埋俾佢啦XD
合桃露
凍食既，係dessert bar任斟
合桃香氣算濃，味道夠自然，細緻冇粉粒
甜度不高，但幾濃稠，感覺有點油膩
新鮮水果
唔知一開始係有d咩揀，因為去到都已經係人地食左一半既時間
但我幾中意佢有新鮮菠蘿，味道清新爽甜，多水分好啱現時炎炎夏日清新開下胃
雪糕
有兩款味：咖啡及草莓
唔多見酒店會用Pappagallo雪糕
咖啡味偏甜，香氣頗濃，奶香細滑，感覺不錯
草莓味更佳，食落有草莓籽，清新香甜，仲有少少果酸味，十分自然
係雪糕櫃側擺放左幾款配料，杏仁片穀物片等任加
飲品
佢有兩款果汁同埋咖啡紅茶等任飲
果汁酸酸甜甜幾開胃，有果肉，成個感覺係好天然咁xd不會過甜
咖啡果d基本款唔多講，奶係熱住既，沖落咖啡紅茶唔會咁易結塊及影響溫度
沒有留言:
發佈留言