唔知點解
我父母好友都好中意呢間價錢貴又態度差既茶記
除左我本身有潔癖外
以前食過唔知幾多次早餐，冇款啱我食
又叫過到會，味道又麻麻
因此我真係完全唔明佢地點解咁中意
仲要成日爆場，又唔係平又唔係冇alternatives，做咩姐？
週日午餐係late lunch
但之後屋企人提議試下蘭記晚餐
真係住係附近十幾（我）廿幾年（屋企人）未試過佢晚市
雖然食到飽飽滯滯，但唔使出錢有餐食，就算我幾唔中意都是但啦！
一去到即睇menu
見有套餐可以試幾款菜式（好多款式任拼係重點
又跟飯同埋我地早去有湯飲
價錢都合理幾化算兩百頭
同平時見到早餐唔同（我自己覺得早餐要食好平
就快快傾掂落單:^)
湯
冇留意係咩湯啦，見就見到足料既
有雪耳花生豬肉等等啦
飲落去冇膩感，仲好清甜鮮美，飲得出食材既獨有味道
一大碗湯自己分，大概都有六碗以上
仲要足料好味
剎那間我真係開始有d期望有d好感
金菇牛肉煲
上枱見真章
份量個頭已經先聲奪人
睇到足料唔馬虎，同埋滾住上香氣逼人，食指大動
沙嗲香味濃郁，加上只係睇落油膩，食落濃味不膩，稠度剛好沾附到食材
金菇賣相幾靚又乾淨，冇爛冇怪味
牛肉偏瘦，份量都多，薄片夠入味
底下仲有好多粉絲，爽口夠味好香口
我地當中有人係清淡派，連佢都忍唔住試左幾口金菇同粉絲，味道質素如何就心照啦
粟米魚柳
份量驚人，足料到呢
一碟一望以為好少，但佢疊到高高，仲要大大塊魚柳食到係粉薄肉多（Y）
粟米咪又係粟米湯罐頭味囉，冇咩特別
重點係魚柳零雪味，肉質有彈性有鮮味
當然我唔知佢來貨係咩啦，我都唔會吹到話係咩貴魚鮮魚咁
但一食真係同平時食開一夾又爛又散，仲要雪味腥味打孖黎果d有天淵之別
老實講，我地覺得仲好食過自己整貴價魚柳
排骨三拼
咕嚕骨好夠味，酸甜開胃
粉薄，肉質仲有彈性有肉汁，唔係炸到乾柴果d
配料係多，但排骨量都唔少
椒鹽骨
香脆可口，重口味人士最愛
同埋帶微辣，夠哂香口送飯一流
京都骨酸酸甜甜，比咕嚕骨膩d
肉既部分好多，主要係大條軟骨脆口有嚼勁
魚香茄子煲
我其實唔中意既，不過屋企人想食就嗌左
我只係試左少少
肉碎稔滑，感覺上都幾多肥肉
茄子香稔入味，又唔會爛茸茸，幾清甜
上枱仲係熱辣辣既啱哂係凍凍地既氣溫下食
講真今次真係完全改觀
服務其實還可以，好attentive，可能繁忙時段就燥底
我只想講……
以後我係唔會反對各位親朋好友去食蘭香園架啦（合十
沒有留言:
發佈留言