聽過韓點呢間野好耐，話說當時仲未有咁多分店
食就未食過，聽就聽得多
好似話好平好抵食，算係韓式快餐咁
今次不如隨機入去填填肚，一探究竟吧:^p
環境比較狹小，只有兩枱左右既座位
大概好多人都係外賣拎走
畢竟呢度賣既野唔少係小食或者唔使局限於堂食既
感覺十分家庭風，一路食野一路同店方都有水吹
而且麻雀雖小，五臟俱全，餐牌選擇甚多，讓人傷透腦筋了
杯杯雞（大）
炸雞表面淋上酸甜微辣既自家製醬汁，再灑上白芝麻
醬汁稠度很高，緊貼炸雞表面，只係同時變得有少許黏膩
炸雞炸過但不太油膩，炸皮厚度尚算可接受，只係入口沒有炸過既香氣
雖然我一直強調韓國炸雞唔係脆到美式咁，但佢係完全沒有脆度，炸皮甚至軟化變韌
雞肉稔身，稱不上嫩滑，總算不老不柴夠濕潤
白芝麻亦增添一份芝麻香氣，令醬汁膩度稍降
呢一道我只可說係平價過口癮之選，叫食得落肚。
炸醬麵
算是回味一下在韓滋味
麵條上覆蓋著一大堆厚重炸醬，表面再有青瓜絲及白芝麻
炸醬甜中帶鹹，稠身，十分容易沾上麵條
炸醬裏頭有少許爽口芋頭粒，當然有點點豬肉絲，算是入味
青瓜絲既清新爽脆亦中和番炸醬既油膩稠黏感
可惜的是麵條雖夠彈牙，但味道竟然帶酸，更不用說到麵香
當然，同記憶中既炸醬麵是差天共地，永別。
韓式炒年糕
比起炒，本人認為以湯年糕為名更適合
上桌已經有不妙感覺，旁邊既醬汁尤如湯汁，年糕就浸在中央
算了，先試試再講啦！
夾起年……夾起……夾……夾不起的年糕是何等稔軟？
入口基本上綿爛即化，煮至水感半溶既年糕真係第一次嘗試
要講煙韌？要講米香？要講夠味？
講到呢度我真心已經唔想打，因為食左一條年糕我就難得地係會想放棄佢
一向清碟，主張不浪費食物既人係會食到想置之不理既話，各位大概心裏有數吧？
整體而言黎到食既原因只有比較上便宜、快捷及有人情味
沒有留言:
發佈留言