皇帝雞-無骨雞

來到總結前最後一篇炸雞文

係深水埗西九龍廣場入面既皇帝雞，其實剛開業時已經想去

只係本身自己唔會經開果頭，去深水埗唔會上去西九

之後熱潮越盛，仲聽聞會賣斷市

結果一拖再拖，去到最近同朋友去深水埗先諗起佢

呢間韓式炸雞小食係韓國人開既

落單果陣佢一下子就用廣東話問我

都唔知用番廣東話定韓語答佢好XDDDD

最後我地係全程廣東話

餐牌選擇只有三款口味：韓辣、醬油及甜辣味

友人話驚韓辣會太辣佢受唔到，甜辣似乎比較吸引

三個人，當然買最大碗分享啦！

甜辣炸雞（大）　$75

睇個份量就已經覺得十分抵食！

諗起平時去餐廳食，真係兩三倍既價錢架

我地粗略每人都食到五件，姐係入面我諗有十幾件無骨雞球，唔係雞粒呀XD

醬汁既甜辣味道剛剛好，惹味又香口，辣度不過份

稠度亦是適中，炸雞用醬翻炒後均勻沾上醬汁

加上帶香既花生碎，少許脆度，感覺更為可口

炸雞上面放左少少年糕條，煙韌稔糯帶米香

煮得是剛剛好，黏上醬汁後沒有粉爛出水

炸雞球外皮不厚，炸過夠香而不油膩，裹上醬汁仍帶微脆，係合適既脆感

雞肉脂肪位不多，也不會是一堆雞皮

肉夠香稔，無雪藏味，熱度均勻傳至中心，唔會外熱內冰

不足之處大概係我地食唔哂三隻味