王府-瘋水餃

好耐以前係中環一帶行過

呢間店舖就有位伯伯問我係咪入去食野

剛剛好我已經食完午飯，入面又好似好多人咁

所以決定擇日再去:^0

結果搞到過左差唔多成年先再黎-____

但就見唔到果位伯伯……

餐牌選擇幾多架

唔只係佢地出名既水餃，仲有飯、麵、小菜……

水餃亦有水煮同香煎，不過我就好失敗地又係睇漏眼冇揀煎……

另外佢有得外賣生水餃番去自煮:^)

細細既碗仔好得意:^)

羊肉京蔥水餃　$56

一望落去，嗯……冇穿冇爛，係個色水唔夠吸引，但講真就咁水煮餃係咁既

餃皮厚薄睇相都估到，咁透餡就點都唔係厚到食粉先啦

外皮厚度剛好係唔易穿既，我估係半厘米？食落煙韌又有少許麵粉香

羊肉餡料調味較清淡，帶有濃而不膩既羊肉香氣

肉汁豐盈可口，只係蔥香就太微弱了

狗不理包子　$32

賣相好似小籠包，但大小就係肉包咁

以前都食過幾次狗不理包子，佢既外皮係香甜軟綿好似普通中式包咁

特別之處係佢既外皮係好似發唔起既包咁，所以薄身得黎有嚼勁

肉餡調味剛剛好，更帶出肉香

餡料冇油膩感，肉汁被外皮內層吸收

加上原本包既微甜，整體味道好不豐富:^D

炸醬麵　$42

炸醬味道偏鹹，帶有油香

因為佢係黏稠既，攬拌時加入少許湯就會容易拌勻

而且湯有調味，唔會好似加水咁沖淡哂

蔬菜味道清新，配上肉潤豐盈既炸醬就可以減低膩度

麵條算係粗身，合我心水

食落軟稔帶香，唔會俾炸醬味完全覆蓋！

整體份量還可以，可能我本身食得多？俾我食就一定要加好多其他野啦xd

五香排骨　$38

五香味道十分濃郁，擺近唇邊就已經係重重既香氣

排骨唔係我想像中蒸排骨既樣，反而係好似豬軟骨咁

食落唔會有粗硬既骨塊，仲會有少許脆骨軟骨

肉質稔軟到一抿即化，雖然係熟透，但佢唔會韌身又唔會乾哂水走哂d肉汁

份量唔多卻是我好中意既一道菜（因為大食所以會考慮佢份量先推介xd

驢打滾　$18

香稔軟糯，真係一夾起已經軟癱果種

神奇在佢係緊緊黏合，唔會散開

紅豆蓉細滑清甜，配上外層香氣甚濃既黃豆粉，感覺甜而不膩

厚身又唔會令人感覺膩口

同埋佢算係大件，換作係出面食貴價餐廳既薄身版，都有四件掛

加上手工同賣相……其實都係值得試既

豌豆黃　$18

質感有點像大菜糕既爽口硬身，但佢仲帶有微粉

豆香重而清，就算係甜食都唔會膩滯

不過就比較易爛易斷開，夾起黎要就一就力度

豆漿　$7

細細支，對於我黎講就甜左d

豆香一般，唔係話咩必飲咁既

價錢如上，一間多次入圍米芝蓮既小館……

值唔值得就睇你點定位

點都要提下，係我既角度，佢份量係偏細既