先前病好番，迫不及待咁去左大啖個肉骨茶暖身
轉個頭，又同一大班朋友去左試另一間既補身佳品－－老鴨湯
老老實實，平時食鴨肉，唔係燒，就係滷
老鴨湯就真係第一次飲
只係佢地一直話呢間既老鴨湯係用左好多藥材，夠哂滋潤
聽落好似幾啱我呢d未老先衰既人仔
仲要佢係好似雞煲咁，先食原煲，再打邊爐，感覺幾特別
好啦！反正多人，就算中伏都有人陪，就勇敢一試啦:^0
餐牌選擇眾多，琳瑯滿目，真係樣樣都好吸引
因為佢除左小食、一般火鍋湯底、特色湯底及常見火鍋料外
仲有刺身:^0，店方聲稱海鮮全是產地直送
直唔直送我就無從考究，無理由問條魚係咪俾人直送果黎既
不過店內有數個大玻璃缸，裏面住既係生活海鮮
同酒樓見到既類近，俾人印象就係夠新鮮
金撈富貴老鴨湯
話哂餐廳主打老鴨湯，店名都講到明，人地特色菜，唔通唔試咩？
餐牌列出三款鴨湯：金撈富貴、金撈及花雕
第一款，即是我地揀既金撈富貴，以藥材入饌，如蟲草花、杞子及黨參
相熟既親友都知道我係好中意藥材味，姐係聞到中藥味係覺得超香，好正點既
寒冬時候，更會想食得養生少許
因此想也不想，我就一定係鍾情於第一款架啦！
上桌後開爐座熱，沒一會兒就滾至起泡
一打開鍋蓋，藥材香氣及微微鴨肉香充斥店內，讓人食慾大振
好似要話俾全世界知我地食緊呢款煲咁！
如相中可見，不少輕身藥材已經浮面，但同時我注目係十分顯眼既油光……
我會食油膩食物，只係我絕對唔會想食泛哂油既野，真係入口都唔想吞……
垂低頭，對住碗湯，我左望，右望……友人們均喝得津津有味
「你仲未飲？趁熱啦！我地仲要食鴨肉同打邊爐呀！」
好吧……我都冇得揀了，亦都唔想浪費呢煲花左兩個多小時精心熬製既湯品
唔好怪我打得長，我果陣見到咁多油係真心唔想飲落肚-____________>-，情緒激動！
眼睛閉上，雙唇微張
我惟有不斷心唸：唔好諗佢有幾油，只要諗佢有幾補！
甘甜，不苦，重鴨油香氣的熱流徐徐滑入喉頭
湯頭飲落係百味交織，未覺油膩，且有少許酸香
原來店方係加左自家醃製既酸蘿蔔入湯，飲落帶股微酸清香，頗為解膩
喝完湯水，碗中剩下一大堆滿滿既足料藥材及湯料
藥材已去盡苦味，餘下淡薄香味，而湯料亦如是
終於要試鴨肉，分鴨肉既過程比想像中快捷容易
全因經過長時間烹調，鴨肉軟稔得一夾即離骨
而且皮下脂肪大多溶於湯中，唔使避皮食，方便得多
鴨肉味道非常清淡，都已經滲進湯頭，因此先喝湯的確是品嚐真味的正確步驟
多人分，話咁快就分哂湯又分哂肉
咁就可以請職員添加酸蘿蔔湯，開展食火鍋既一頁了！
醬料盒係打邊爐一個好好玩既環節！
要瘋狂加蔥加芫茜，對我黎講炸蒜都係必不可缺既
神秘手打丸
自家製既手打丸分成四款口味，但不挑明，要等食客自行嚐出
手打丸每款既顏色各有不同，表面更舖上食用金箔，打個邊爐都能夠高貴雅緻
手打丸外層感覺頗彈牙，帶爽不黏，亦不散爛
至於佢神秘既地方……嗯！我有食過既口味都估啱哂
只係人地商業機密，我就不方便透露，講左出黎阻人做生意就唔好啦
總之味道係正常味黎既，唔使擔心（拍肩
在我角度就唔算好出乎意料之外，也許太易試出
唔使話食開高級野扮哂食家咁都可以分得到，不算高難度
生劏黃皮老虎
老虎？仲要係黃皮？其實係指老虎斑XDDDD
師傅將老虎斑細片成刺身薄片，片片厚薄均勻，盡顯功架
魚肉薄身至極，建議都係灼至熟，顏色轉白就要即時食
魚肉熟透，色澤呈魚肚白，望落去好乾身
魚肉味鮮，沒有腥味，夠新鮮亦未有雪藏味道
爽口嫩滑，咬落稔香夠濕潤，唔係好似視覺上般乾柴
而且食落冇點覺有魚骨，啱哂我呢d淨係識食懶肉既人:^0
黑豚肉金菇卷
當然唔係就咁食，係要熟食既！
一般食開既都係用肥牛片卷起金菇，但牛肉係兩下手勢就熟透
若然等到金菇滾熟，牛肉就已經係太過老韌鞋口
因此店方就改用薄身既黑豚肉，務求令兩者煮熟既時間相約，達至比較適時既美味
話就話咁講，都要試過先知係咪可以剛剛好
見卷物似乎熟透，豬肉都完全變哂色，大概能一試了
黑豚肉薄切，脂肪部分多，卻沒有油亮亮
入口油香滿溢，即使係打邊爐放入熱水滾過，肉味還未會完全流失
包裹香稔清爽既金菇，膩感稍稍降低，只係我都仲要隔去部分脂肪先過到心理關口
頂級安格斯牛頸脊
見到牛肉我真係雙眼發光！！！！！
成碟完全係舖滿舖密，厚薄均勻合宜
油脂油花分佈合格，只差一點係色澤不夠紅潤及均等
牛肉呢就真係不宜放入去滾，個人認為灼熟就真係夠哂
否則不止老柴粗糙，甚至會起哂筋難嚼咬
牛頸脊灼過後稔身帶厚，牛肉香味保留得到，唔會溶解入湯
肉味肉香濃郁甘香，由於肥瘦相間，僅存既油香都係平均散開，沒有喧賓奪主
肉質亦是細緻緊密，不膻不腥，唔會韌口
安格斯牛柳粒
牛柳粒色澤同剛才既牛頸脊相約，但總算唔會太過不去
切得厚身，每粒都係瘦肉帶點肥脂，煮熟之後就冇咁易過乾過柴
牛肉味道都叫濃厚，只係佢煮熟後縮水細粒左
加上厚身，食落帶點韌度及嚼勁，未及牛頸脊細滑稔香
對比起來，我就會選擇牛頸脊啦
手打四寶丸
佢地既四寶係有豬肉、鯪魚、墨魚及蝦肉
呢款手打丸就係冇內餡包住既，唔似得神秘丸咁
我就試左唔同款式，但老實說有個通病
平時食到既係香口彈牙有嚼勁，不過就好粉漿感
佢地既手打丸雖然味道自然，新鮮濃香，但係質感較散較乾
要睇乎大家中意彈牙滑身既，定係足料不粉既
手打鮮蝦滑
講真比起一早製好既丸子，我更中意食呢類手打滑
既可以自己塑形，又富有手工自製夠新鮮既形象
朋友動手批蝦滑，我地就負責等煮熟後快手食:^P
蝦肉鮮香味美，同真係剝一隻隻蝦食唔算好大差別
彈性滿滿，夠爽，沒有黏漿或粉爛既感覺，算是真材實料
特色蝦條
因為個名幾好笑，餐牌張相睇落頗有趣，我地都揀左呢一款
都係果句，落料就朋友出手，我地就坐等煮熟，呃蝦條！
零秒清碟，我慢手腳就湯底撈蝦，一條入手
外皮其實有少許似係雲吞皮，薄薄一層包好餡料，唔會太過飽滯
蝦條，姐係同蝦係有關
唔使審，佢包既餡係有蝦肉！
味道突出又不顯腥，調味得宜唔會蓋過蝦味
包得細細長長，食時毫不狼狽
洛神花茶
自家製既洛神花茶酸香有致，只覺開胃卻不嗆口
同平時飲既洛神花茶花蜜有少許分別
佢係味道比較清，甜而不膩，解膩解滯
檸檬薏米水
都係自家出品:^0
酸甜，味道清新帶香
重點係佢冇平日飲薏米水既黏稠感覺，薏米香氣卻仍是明顯
因此感覺係好去膩，啱哂打邊爐或者食油膩食物時同飲
環境寬敞寬落，就算一大班人齊齊食都唔會撞手撞腳
另外仲有廂房，如果多人訂座大概會安排
咁就可以自成一角，有私人空間，又唔怕嘈雜（同時唔會嘈到人
衛生情況理想，乾爽不黏笠
食火鍋雞煲果D真係好易成枱油漬，或者成地垃圾，但係呢度又唔覺會出現
另外食左成晚都唔多見有咩昆蟲飛黎飛去，食得幾舒服安樂既
服務還叫不錯，因為有需要既時候職員都樂意協助
滿面笑容，沒有嚴肅緊張既感覺，令到我地進餐時都放鬆下來享受
另外佢地都熱衷於介紹及分享對菜式及食物既知識，可謂親切友善既
由於位置都偏僻，好少人行經或留意到呢間餐廳
唔係朋友提議，我都唔知行到盡頭仲有野食
一路都係車房之類，感覺都唔似覓食地方
今次試完，都係間有心既小店，希望佢地之後可以吸引多點客人吧
沒有留言:
發佈留言