先前得幾位大哥大姐推介
終於與友相約到這間位於筲箕灣街市熟食中心的餐館
至於其特色所在，大概不少食家都心裏有數
不過在此略說，就是碩果僅存的炭燒煲仔飯
再加上每年推陳出新的新穎版本
今年搞搞新意思，就是黑松露龍蝦煲仔飯！！！！！
餐牌分兩個，一為單點餸菜食品，二為煲仔飯
既然我地為煲而來，當然聚焦於煲仔飯餐牌吧？
單點餐牌當中的小菜及飯粉麵等未及招牌煲仔飯吸引
而且紹華也自稱煲仔飯專家，就讓我們探探你底細吧！
例湯（送）
一煲仔飯送一例湯，轉凍飲加$4，熱飲加$2
但我地兩人點三煲，還是請店方只送兩碗好了
湯品照理是南北杏青紅蘿蔔豬肉湯
味甜帶清，紅蘿蔔香氣滲出，吃下去是甜綿無比
青蘿蔔則是沒有青味，味香不澀
豬肉連帶不少脂肪，煲過都仲係油香嫩滑
瘦肉部分肉味還濃，稔身微化，加上側邊少許脆脆軟骨，食落爽口
喝著還帶豬肉鮮鮮的肉香，喝下去頗暖胃，不會單是有蔬菜的寒感
表面確是有點浮油，只是跟家中喝到未隔油的相約
湯料滿滿，款式亦是十分家常
一下子乾了它！就像平常在家中所做的
這裏讓我們現在少回家吃飯，少喝家常湯的，不禁想起家中的溫暖
黑松露龍蝦煲仔飯 $80
這是今年紹華的新花款，將西餐常見的食材混搭中菜，盡見創意
意大利黑松露醬及半隻波士頓龍蝦，兩者均是價格不低的食材
只是這一煲盛得夠滿，用料份量不算少的煲仔飯，一百蚊有找！
淨顧價位就已經夠哂吸引，不過味道都好重要既
黑松露焗香後，特有的香氣及味道更加濃郁
再者松露醬附帶的油份大多被龍蝦吸收，不會過份油膩
可惜店方將黑松露置於龍蝦之上，飯底完全不能沾到些少風味
以至其後只可以不斷加甜醬油來撈飯加味
龍蝦外殼已先處理，微微裂開
客人食既時候唔使自己動手，唔會太硬太難開殼
這小小的心思讓人感覺店家非常體貼客人，真的是小店窩心一點
原本我地諗緊，龍蝦又煮又烤焗，咁咪好乾柴好難食？
錯了。龍蝦肉仍是濕潤帶汁，入口鹹香微甜
肉質偏稔，有點黏殼，但沒有雪藏味
配上黑松露齊食，味鮮重香，也叫合格
野菌鵝肝煲仔飯 $65
我沒有聽錯看錯吧？鵝肝？只消六十多大洋？
平到咁，實係呃稱啦！不過我地又好好奇究竟佢抵到咩地步
好吧！我們的第二煲就定了！
上桌時我們已經迫不及待要揭起鍋蓋大啖吞食
一揭之下，果真不得了！
餸菜是何等的足料，何等的大器？堆得有座小台立於白飯之上
菇菌香氣之中夾雜淡淡鵝肝油香，誘人至極
可是我們還是只得澆上醬油，再蓋回鍋蓋，靜待片刻
沒一會兒，可以揭蓋起筷了！！！！！
話哂要睇清佢真面目，我地第一步實係搵下佢鵝肝份量係點少點可憐法
慢著！這是什麼來著？厚厚的切粒鵝肝？
店方將鵝肝切成粒狀，不散碎，一煲裏頭至少有五塊以上
加上一大堆雜菌片，「我真係冇你乎啦，紹華。」
鵝肝質感紥實有彈性，因為店方烹調時與一般食到既製法有別
佢地先將鵝肝面頭撲過粉，在滾油中稍稍拖過
包裹鵝肝粒的薄薄微黏一層，就是那層薄粉，用作保持質感及香味
味道猶是甘香，卻沒有煎煮的油膩
與爽口香郁，不苦不澀的雜菇同食，毫無膩滯感
吃到此時，友人已經是飽和狀態了……
疆土羊肉飯 $65
剩下一煲惟有我獨力解決吧！（攤手
就咁睇過名我就覺得佢係類似新疆羊肉串咁既味道
然後一揭蓋，果然如此，就係不時食到既新疆香辣孜然羊肉
呢舖真係啖啖肉，爽歪歪了！！！！！
羊肉切成厚身粒塊，比起羊肉串的更是豐足
質感彈牙微韌，富有嚼勁
越嚼得久，越覺香辣，羊肉原有肉味肉香亦隨之散發
沒有太多脂肪粒，入口油膩感大大降低，讓人可以專心品味羊肉香
羶味不重，全靠清香的孜然粉，不會太嗆
香料香氣突出之餘與羊味並行，和平共處，互相補足
飯底
在此一次論盡，因三煲的水準不相伯仲
歸功於師傅相當的水準及用心，出品質量得以穩定
米飯煮熟後粒粒分明，黏性不高，香稔不水爛
用的是舊米才會有如此濃郁回甘的米飯香味及甜度
而且吸水能力大概沒有新米強勁，感覺會比較乾爽
個人中意有咬口，這裏的飯底剛好合我意！
飯焦金黃香脆，沒有過份燶黑，當然是毫無苦味
咬落煙韌又唔痴牙，亦不會乾得難嚥
呢到食到既都係好易剷起，我諗有加到油份去潤一潤先冇咁痴底
但奇就奇在食入口只會有很輕淡的油香，沒有膩滋滋的泛油亮光和油感
倒入甜中帶微鹹，稠度適中又不膩既煲仔飯豉油，更係惹味得停不了口！
.jpg)
環境方面我不會要求太高
畢竟都係街市入面，自細已常跟家人去買菜，心裏有數
幸好今次去到見到係幾企理，衛生方面我可以接受
不過下定決心黎試，就算差劣都會忍忍
座位都係有限啦，搭枱就一定既
我地平日晚上仲要夜一夜先去，就自然少人啲
若然係假日去，我諗可能要等下位架啦
服務是始料未及的教人窩心使然
本身以為又出名又係街坊舖，啲呀哥呀姐大多數都係粗聲粗氣
叫得慢少少就黑你面，問多兩句甚至破口大罵
今次係紹華就淨係覺得好街坊，但好好客
我地嗌咁多，店方都覺得有少許有趣吧？
因此上枱時多問兩句，我地又答佢兩句，再問，再答……
之後再吹多幾句水，笑幾笑，自然舒服，沒有尷尬位
人情味不就是這樣體現了麼？
埋單兩人都只係兩百頭
重點係叫左三煲，我自己一人食兩煲
全因朋友食到中途已要棄械投降了XDDDD
雖然已大減胃納，但似乎還是驚人啊……
紹華，下年見:^)//
沒有留言:
發佈留言