打從上年喜來稀肉在尖沙咀第一家店開幕
我和哈韓友人們就一直很想一試
可惜剛開張人流太強勢，連訂座都要等兩個月
當然直接到餐廳等位的人潮亦是源源不絕
不單是店內，行人道，大家甚至都排出馬路去了，很危險啊……
所之當我地知道喜來稀肉開分店，仲要係旺區，就好似今次去既銅鑼灣分店
就知道有機啦，分流之下大概就唔使等咁耐掛？
即刻訂位！
點知果晚去到都仲係要等位同埋要限時，冇所謂，食到就算啦
爐邊蛋漿（原味和泡菜辣味）
就是免費任添的蛋漿，有兩款味道，均是任加的
只要揚手同職員講，佢地就會拎住一壺蛋漿過黎即添架啦:^)
我們巴不得要無限添，但最後只是添了一回原味
原味較能吃出蛋香，而且味道純粹簡單
當食左濃味烤肉或菜式之後，想清一清的，不一定要飲野，食蛋都得XD
泡菜辣味就比較香口，辣得過癮夠惹味，唔算麻辣但好夠香
加上蛋漿，辣中微酸，更有濃濃雞蛋香氣，剎是不錯
建議食到生少少既雞蛋既朋友可以係佢燒至表面乾水就挖一點來吃
若是裏頭有蛋漿溢出，會自動流淌去填補舀去了的部分
咁就通常會食到嫩滑又不過生既雞蛋，仲沾有薄薄蛋漿同食，香氣更厚郁
豆芽湯
可以添加的湯品，十分輕盈又簡單的豆芽湯
豆芽仍帶少許爽脆，湯底味道不濃，算是清香夾有菜甜
若是食到太辣既食物，頂唔順時飲下清清味蕾也無不可:^)
泡菜
辣度頗高，就連平日食得辣既朋友都出聲叫我小心食
不過辣得黎唔係盲辣，仲有辣椒及其他醃料既酸度及微微鹹香
白菜夠清爽，點點脆度不會太過單調
當食左好多燥熱食物，肥膩食物，用泡菜既酸辣清新及微凍清涼既味道質感去解膩
用不著多說，一下子清味蕾的好戰友！
豆芽及洋蔥都係任食既前菜
豆芽夠爽口，帶脆不過稔，唔會好霉好水爛
洋蔥薄身軟稔，生洋蔥原有的嗆香，配上酸酸的醬汁，讓人大叫刺激
生菜同其他韓式燒烤一樣，係任你食任你包既
顏色青翠，新鮮爽口，清甜菜香當然是腸胃的好友，解膩的佳品！
或者是重口味如我的，可以下點醬汁才包肉，惹味得不行
分別有辣油、豆瓣及麻油鹽三款
個人就中意豆醬既，係韓國果陣都會瘋狂蘸點佢
然而這裏的豆醬太過稀身，難以沾掛，還是有點遺憾了……
韓式烤豬大腸 $120
豬大腸一盤端上，比想像中多得多，感覺大氣
一看到這盤滿滿的，就想起在韓國的時候
當時언니帶路，去到大邱既烤腸街，食左人生中第一次既大腸
其後則是為之著迷了，番到香港食韓式燒烤都必點
這兒的豬大腸件件色澤鮮潤，表面沒有髒污，切得厚薄得宜
燒過後外皮帶少許焦脆，充滿嚼勁彈性，豬腸香氣亦不俗
可惜的是雖然叫清潔得夠乾淨，但連裏頭少許脂肪好像也去掉了
入口沒有那種豐腴甘香，只剩濃濃的豬腸衣原味
沒那麼油膩不健康，不過……吃豬大腸不就是想嚐到那啖油香嗎？
辣護心肉 $160
講真真係店方最主力推介既肉款，餐牌更有一版專門介紹
依部位來說，就係豬隻橫隔膜與肝臟之間既肌肉肉筋
每隻成年豬也只有兩三百克，呢度一份取保險位，就有兩百克
望落就好似同普通切條豬柳冇分別，仲要醃完又一堆扭埋哂咁，細細一碗仔
對於未食過護心肉的我們……有點失望啊！
點都好，都係要燒黎食過先知
不過個人認為自己動手既燒烤好睇技巧
因此我都唔想特別吹噓或者貶低其原有品質，畢竟唔係生食
一路燒一路食，又要剪切又要包菜又要包醬……
結果？咪就燒得太耐，過熟囉/___>\
粒粒剪切開來既護心肉燒至帶焦微燶
諗起平時食開既豬肉係呢個時候，應該會乾到要沖水吞．大感不妙
直接夾起，放微涼至能入口的程度就一口吞下
吃到的是最原味，沒有後加調味、沾醬、包菜包飯減膩或是印去油脂
……嗯？
一嚼下去完全沒有想像中的硬柴韌實，厚身的護心肉仍是夠稔香可口
肉質嚐起來保留到嚼感，富有彈性而中心濕潤滲點肉汁
唔會係用鬆肉粉去醃稔會做到既效果
醃過的辣味只是香辣，蓋不住原來的濃郁肉香，清而不膩
而且沒有大大塊脂肪帶牽著，唔會有油淋淋的膩口反胃問題
雖然份量的確不多，但都叫做試得過，唔係外表所見咁平凡
不過上述純粹為我地個人意見，各人口味不同，另覓所好亦無不可
生牛肉拌飯 $98
一大碗盛起奉桌，食物份量不多，但用大碗就方便拌飯冇咁易跌出黎
滿滿的配料蓋滿白飯之上，鋪得密密麻麻，中間的飯粒全然躲藏起來了:^0！
儘管大碗令食材顯得稀少不足，然而還掩不過色彩及種類上的豐盛
_mh1419942788835.jpg)
見我地放左係度一段時間都仲未得閒拌勻，店方就過黎提醒
因為生牛肉有稍為醃過，放置長時間既話會有點氧化
睇落去顏色就會轉暗，又好易變質，影響食物衛生及身體健康
但我地仲有成枱食物要奮戰，連搵位放都成問題，更別提要拌好吃了
職員可能都睇唔過眼，主動過黎幫我地拌好佢XDDD
隔離枱見狀就以為係原有服務，順手又叫職員幫手:^p
只係講咩都好，若是要點此道，請儘快食用，最好係一上枱已經起筷
生牛肉拌飯既重點食材當然要數生牛肉自身啦！
牛肉呈細絲條狀，有如伴菜，只是上桌時被搓回一團疊於正中
上頭再打生蛋，看著就有如一朵紅花，帶著黃色的花蕊
牛肉就如視覺上一樣嫩滑，牛肉香氣稍為清淡，沒有平常吃到的濃膩
半點腥臊味道也不覺，比魚生是更加稔爽
幾乎不用嚼咬就可以直接吞下，連筋位亦是極少
伴菜切成絲條狀是有別於飯粒的形狀
吃下去不單有粒粒分明的飽滿彈牙飯粒，還有一絲絲的伴菜爽口清脆
微甜帶水分的伴菜更是稍為滋潤了飯粒，食落清爽順口
戳破蛋黃後，飯底盡情吸附蛋漿，變成略帶金黃的誘人賣相
吃下去，蛋香全收，毫不浪費，且不腥又不膩
將生牛肉與伴菜及飯底同吃，不失為一道清涼沁爽的傳統佳餚！！！！！
服務方面真係都教人滿意的，主動又貼心，效率也頗高
如果要添加免費贈菜，職員係快快手送上
唔係掉落黎係奉上桌，夠哂禮貌，佢地都唔會因為免費野冇得賺而拖延十世
加上幫我地拌飯之前又問過使唔使幫手先
一邊拌飯一邊同我地解釋番要趁早食，語氣態度溫和友善
唔係好似以前有間既人係拎起拌勻黑面走
到尾就夠鐘，職員會黎提要交枱，但絕對唔係不斷煩膠去逼人走
仲要佢提完，我地想加多次蛋漿，都會添，並非見你就走就求其做
又冇食食下突然拉你去俾左錢先，感覺幾尊重客人:^)
說真的，我地兩個人點左一份肉，一份大腸同一碗飯
但時間上真係好緊逼，趕到咩咁先剛剛好食得哂
環境雖然叫坐得舒服，周邊唔會過份逼狹
只係張枱又係好細既，放哂前菜、湯、菜籃、餐具同冰水之後已經冇咩位
去到後期我地真係用手拎起支水，拎起兜飯去食
90分鐘時間限制真的有點麻煩，就算唔係食完之後坐哂係度吹水
仲係奮戰之中，都係要跟守店方規則
其實公事公辦又冇錯既，只係有少許不人性化
點太少我地又食得唔飽唔盡興；點得多俾錢佢賺啦，又唔夠時間食唔夠位置放
總覺得又是兩難的狼狽局面啊……
沒有留言:
發佈留言