南小館-甜小籠

同朋友由午餐、下午茶到晚餐不停歇地大吃大喝

只不過最麻煩係我地成日都諗唔到去食咩野

雖然每當見到有心水餐廳就話下次先，擺入清單

但到真係搵餐廳既時候又腦閉塞

今次仲撞正星期五晚，Happy Friday

到到都等位等十世，仲越夜越旺場

要搵間少啲人等緊，又啱我地胃口既餐廳不是易事

最後，我地去到Hysan Place

「嗯……中菜好嗎？」

「是但啦，懶得諗啦！」

「都得既。」

拎埋籌等左半個鐘……可能唔使，就可以入座了！

友人嚷著肚仔餓，我地都係加快手腳點菜

落單冇耐，上完一道接一道

真係話口未完就已經成枱都放得滿滿！準備起筷:^P

南小館四小拼

冰宮肴肉

沒什麼肥脂肥膏，只是一層瘦肉及皮凍

肉瘦不韌，沒有難嚼筋位，肉香頗清

皮凍晶透帶亮，彈牙的，爽口的，完全不黏不漿口，凍食幾清新

花雕白雞

花雕香氣十分濃醇，但沒有嗆味不會煙著眼窩鼻腔

雞肉稔身香口，唔算勁滑，不過都叫夠濕潤易入口

雞皮滑溜，唔會太肥膩，有點像薄版的皮凍

表面點一粒紅紅的杞子，賣相頓時變得矜貴點

糖醋排骨

份量不多，畢竟是拼盤小碟，作前菜過過口癮而已

味道未有想像中酸，也算酸甜有致，醋香清新，開胃又解膩

排骨肉頗緊實，不太乾柴，係幾好咬既

口水川雞

總覺得雞肉比起花雕白雞的較豐腴一點，帶有雞油香氣

雞肉香稔不肥，易撕咬便咀嚼，亦比花雕的更厚身紥實

醬汁香辣，鹹得夠惹味，不是一味死鹹不香

稠度剛好，可以沾上雞件又不過杰

灑上及拌入白芝麻，其香味不失是個亮點吧

蔥油開洋拌麵

從遠遠的就已能聞到濃烈悠韻的蔥油香氣

份量不多，我們三人分剛好各有一碗吧

雖然油亮亮，但香氣滿溢得讓我不禁要拋開顧慮，大口一吃

麵條夠細，但煮得不爛不淋，滑順香口

嚼下確是有咬口，彈爽，微韌，吃多多也不厭

論及香氣，蔥香一馬當先，味道突出得沒話說

清香不嗆不青，吞罷，還留下點點餘韻

也許是蔥香滲入至醬油，稠濃少許的醬油附在味蕾上，蔥味亦然

醬油鹹中帶少許甜味，不得不說是油膩的，但夠哂惹味

反而開洋鹹香不重，未有想像中的色香味美

照理沒有用上豬油，欠了一份豬油豐香，但也叫帶油香，且好像健康點

芝士奶皇小籠包

一籠唔係四件，而係五件，排成正五角形，感覺整齊不紊

小籠包比起平日既更為飽滿，看似用料十足又紥實

但即管賣相淡黃夠吸引，都要食過先知係咪真材實料既！

小籠包褶數不多數，外皮稔軟帶少許彈性

因此縱使餡料多多，都不至乎破爛滲漏

水牛芝士及奶黃的比例，是一比三

事關店方希望芝香只是輔助，奶黃還是重點

一鹹一甜，味道互相交織，配搭還是可以的

整體味道係溫和帶膩感，而奶黃既香甜稍稍搶先芝士鹹香，店方無疑是成功了

只係芝士淪為牽絲拍照既用途，有點可惜

而且牽絲時同奶黃餡開始分離，各顧各的，也沒有想像之中的誘人

雖然份量不多，但難以令人有意慾自己吃完一整盤

老實說，我地各食一個之後已經把它擱置一旁

而家睇番張相，口舌之前還有那種過分甜膩既味道……

八寶醬菜飯

聽過一位上海的朋友提及，八寶醬感覺有如炸醬、沙拉醬及拌飯醬

總之就是很家常很有鄉土風情的一種醬料

但其真身，我還真沒有嚐過，食菜飯我都只會配排骨、燻魚等

這次看到八寶醬一名，馬上想起腦海中的一段對話，不如藉此一嚐吧？

端上桌來，大堆頭得讓我稍稍驚訝了

我還以為八寶醬就真係得醬汁，冇咁多配料

又或者係有配料，但全部整碎哂，融入醬汁之中，豈知是如此多的醬汁跟配料！

醬鹹中帶微微香辣，夠哂惹味

多種配料的原味鮮香也偷偷混入其中，比起一般豆瓣味，更多了絲鹹香

我最中意都係彈牙有嚼感，中心有少許老身鞋感既豆干

不嫩不滑，但有豆香，好好咬，仲要幾吸汁幾入味

菜飯不會太過濕水，亦未會過份油膩

飯粒是粒粒分明，有點飯香，很好入口

菜味清新，沒有過青或是置放過久的噏味

纖維質感令人罪惡感大降，食咩都好似冇咁肥膩不健康咁xdd

百步香蔥大餅

職員傳菜上桌的時候，只見一個小鍋，想著也沒有點小菜什麼的

原來裏面的是大大份，鑲滿脆香白芝麻的蔥餅

已預先分切六份，脹鼓鼓的，感覺好足料好吸引

夾起一件，大餅中間夾有滿滿蔥油肉餡

未曾入口，只係放近少少都聞到清清蔥香，真係要快啲試下先

大餅外層金黃，白芝麻密佈，下得毫不手軟

咬落去第一下係覺得佢夠香脆，麵香濃芳

跟手就係內層尤如麵包的鬆軟感，氣泡緊密夠綿香

因為餡料比較濕潤，餅心吸收蔥味肉香及附帶的油份水份

香口惹味，不至於太淋爛，只是很潤口易嚼

餡料香氣厚重，蔥香加上肉香，清鮮不嗆，沒有青味腥味

肉稔不油膩，冇咩脂肪粒，加上蔥的少許嚼勁纖維感，不會教人感覺油膩倒胃

大餅的淡淡香甜，配上算是濃味的餡料

大概係最簡單最家常的美味

南小館甜甜拼

椰香紅棗糕

店方把糕點製成花狀，只有椰汁一層塑了花形，賣相精緻淡雅

椰汁層單是薄薄一層，乳白微透，稍稍看出底下紅棗糕的深紅色調

椰香清新自然，沒有多餘膩感，也不會像平日嚐到的椰漿般甜膩

紅棗甜得帶香又不做作，天然甜味沁人心脾

糕點煙韌，黏身糯感蠻有嚼勁，吃一個是不會心足的

桂花蜜拉糕

外形也是一朵朵小花，以桂花蜜點缀中心，而非色素，自然健康

拉糕清爽不膩口，咀嚼之下更有薄薄一層酒香，溫和而低調

糕身帶有糯感卻不硬韌，幼滑細緻

但可能糯米粉佔量比例的關係，稔糯又未至於綿柔得要牽絲，偏向彈牙

桂花蜜甜度算高，不過只下了一點點，唔係好重手

桂花的清新幽香滲入蜜糖的潤滑香甜，留有餘韻

糕身甜度夠低，兩者同食並沒有過份濃甜，反而感到清爽無負擔

茉莉花茶凍

茶凍以一個小瓶盛上，沒有誇張華麗的裝飾，但不失吸引力

色澤偏清淡，正如其香味

用湯匙微微刺破，質感是滑嫩細密，不是太過水爛的

舀起後置於唇邊，內傾，茶凍從湯匙滑入，溜滑得如液體

花茶的花香不濃，極清極薄，茶香也是輕輕帶過

甜度適中，清爽不膩，再來是微冷的溫度，是不錯的飯後甜點

杏仁白玉凍

杏仁味甜品真心好易中伏，中過招好多次

但我本身好唔好食都可以擺入口，唔係好似人地咁高尚，唔貴唔好食就灑手擰頭

今次就一於試下佢地出品既杏仁味能否突圍而出

老實講賣相都係咁既樣啦，唔花巧，簡約就好

質感帶點彈性，未到布甸的程度，至少也不像想像中的溶爛

杏仁味是十分的濃郁，味道同一般既杏仁茶及杏仁糊相約

幸好沒有甜至很人工很假的嗆口感，尚算易入口的

酒釀丸子

酒釀丸子是街知巷聞的上海著名甜點，咁當然風行既地方不只一處

將糯米加酒麴齊齊發酵，出到黎就係綿密香稔既酒釀

只是溫度要控制得宜，而要吸收到酒香，要做好不是易事

輕舀一口嚐嚐，什麼？竟然沒有讓人倒胃口的酸味來著？

不時食到酸味頗嗆的酒釀，不單是因為過度發酵，還有可能是烹煮時過熱過久

呢到食到既酒釀就只係輕糯的軟密質感，附帶淡淡酒香，清新不過激

加上桂花的獨特清郁芳香，入口和順至極

丸子圓圓的，一口也可以大啖三數個，精緻可人不參差

不用多說也知道是尤如平日食既糯米皮般，煙韌稔身

不會煮至過水過糯，咀嚼間糯香微滲，甚是可口

食落一定冇食湯圓咁膩滯，是不錯的飯後甜點:^)！

蕎麥茶

入座就已經置於桌上，色澤清透滲黃

飲落頗像玄米茶，有種煙煙的麥香，不苦澀

食中菜不時會食到油膩點的食物，覺得膩滯時呷一口，解膩良伴

環境充滿現代感，中西合璧，並非單有中菜的懷舊古色古香

座位闊落舒適，樓底高，富有空間感

仲有我最愛既大玻璃，可以遠眺窗外景色

若是日間，陽光透進，是何等寫意？

服務效率一般般吧，但態度還好

在我看來，今時今日，你對我可以我咪對你可以囉，要求不高

至少回想起來每個細節也沒有大差錯，心中不覺不舒服就合格了