住家菜-家常飯

夜晚約好同呀媽出去食飯

但無奈翌日係假期，油尖旺區餐廳大多座無虛席

諗唔到食咩好，越拖越夜就會更難搵位

最後靈機一觸，諗起呢間我曾多次路過都未試過既中菜

嗯！一於食下呢間有住家感覺，聲稱無味精既住家菜啦！

雖然都要等位，但可以一邊等，一邊填餐單

唔單止令到客人等位果陣冇咁悶冇咁易不滿

早早填好菜單，入座快上，仲會提升效率，又唔使個客等咁耐

一舉多得既聰明做法，值得其他食肆參考啊！

環境唔會太過擠迫，而且張枱都夠大擺位食物既

衛生情況係可以接受，周邊乾爽不黏笠，地面亦無顯然既污水或垃圾

裝潢幾特別，因為佢本身座位既感覺係有少許似茶餐廳

但用到既裝飾又帶有中國風，例如係雕刻工藝既圖樣，配合其中菜風格

服務頗有屋企既感覺

職員都係呀叔呀姐，但工作起來爽手快捷

佢地都唔會板起面，而係同店名所走既路線一樣，甚算親切

就算當時有枱出現左一些點餐出菜既誤會

大家都係平靜解決，冇話好似經常係香港地見到既「嘈到拆天」

加上有熟客時又會寒喧數句，打電話有得訂枱仲可以留餸

讓人不禁諗起番屋企食飯，打俾家人講聲，提議煮咩菜式既情況

柚子西檸雞　$63

賣相不錯，睇到醬汁顏色係平時柚子蜜既色水，唔係螢光色

又唔會好似某些餐廳真材實料，只用上檸檬汁，製成既醬汁卻是不太討好既透明版本

我地不約而同鬆了一口氣，終於可以放心食啦掛？

份量頗合理，底下冇用菜去墊高呃秤架

先試試柚子西檸醬，酸度有調整過，自然不過激

醬汁既香氣有柚子及西檸兩道，互相配合，各帶風味

原本我都冇諗過會將兩種醬混合，而且還是酸甜有致，色香兼備

雞肉外層炸香，脆身卻不油膩，沒有泛起油光

炸皮厚薄均勻得宜，酥香可口，貼住雞肉既一面唔係粉漿既稠爛

雞肉熟透而不乾柴，沒有雪味及腥味去影響整體味道

配上酸甜清香既醬汁，開胃不滯

鎮江小排骨　$62

再來一客酸酸甜甜的開胃菜！

鎮江醬汁稠度合宜，緊附排骨每一面，又唔會過盛至稠膩

酸味主要來自醋香，而甜度不會過份

酸甜交織，就算係食多多都冇咁易膩滯，反而愈見和味

小排骨的確冇花假，係一口大小，真實份量其實不多

勝在佢既骨係軟骨，脆脆地有咬口

肉質非常紥實，肉味頗淡但調味充分滲透，入味惹味

最愛既一點係佢唔會好似蒸排骨咁多脂肪位，無膩感

砂鍋魚雲煲　$82

一鍋上來，熱得出白煙，正合我們心意

冬天當然要食熱辣辣既食物暖暖身啦！！！！！

成煲係裝到滿哂，睇都覺好足料，此時反倒係呀媽擔心食唔哂會浪費xd

魚雲有兩大塊，當中附有數口魚肉，嫩滑重魚肉香

最最重要既膠質，不用多想，明顯是滿滿的

滑溜微黏有如啫喱，魚香濃郁又不腥膩

平日對魚頭及周圍部位避之則吉，今次受呀媽影響踏出安全帶一試

豈知讓我聯想起小時原來已經嚐過，當時既甘香滋味，一試難忘

只係人越大越怕麻煩，多骨少肉既看也不多看

下次我會醒水，寧願多花時間去食，都唔好錯失美味！

醬汁重味夠香，不會太水汪汪淡而無味

收得剛好，同場既豆腐是完完全全吸收醬汁

濕潤又惹味，將一般平平無奇既豆腐卜搖身一變成萬人迷

當然味濃亦都要注意其油膩感

通常食得耐，放涼左佢就開始結油，會變得油淋

話就話凍左都唔覺好腥．只係最好就梗係快口食啦，否則同人分享趁熱食為佳

鮑魚雞粒竹筒飯　$75

竹筒飯係真係裝係竹筒，唔係話得個名就咁裝飯係金屬器皿就算數

一揭開表面既竹筒蓋，就已經見到多得快滿瀉既飯粒！

舀飯既時候真係要小心翼翼，以免浪費如此吸引既竹筒飯

舀開一碗，咦！又幾足料喎:^0

鮑魚粒切成小塊，帶有嚼勁但又唔會過於老韌如橡皮

咀嚼間竟然仲有少許鮑魚淡香，仲以為佢係唔新鮮冇哂味果種添，錯估了

當然啦，比起鮑魚粒，更多既係雞丁以及瓜粒

前者夠稔夠味，冇雪味及腥味

切得大小剛好，就算老左d都唔會黏牙縫:^)

後者固然之有清香，爽口富水分，增添少少健康成分xd

飯底香口調味足，粒粒分明既飯粒係毫不水爛，乾爽亦不油膩

老實說，係裝係竹筒當中，不過完全沒有一絲竹香

咁講真個筒都無限使用，直到佢折舊至毀損，幾香都消散殆盡啦

感覺上竹筒飯只係為風味姐，係特別既

同埋佢地用料大方，竹筒兩頭都有盛滿飯，冇話偷工減料（Y）

芋頭西米露（送）

免費贈送既飯後糖水，但絕不馬虎

色水係冇平日見到咁紫，呢個係稍為乳白色

芋香濃得驚喜，味道自然不造作，糖水中仲潛藏幾塊煮得綿香即化既芋頭

至於西米就又滑又稔，只有微黏，唔會痴到成大團咁

喝罷，只感意猶未盡

食都未食完，呀媽已經講定話下次要再番黎

因為我地失算冇揀定呢間，所以冇訂位冇留餸

到我地食既時候，好多主打菜式廚師推介，如阿嫲雞，已早早售罄

見到咁多咁吸引，令人垂涎既款式只流別人田，只得暗自嘆氣

我地下次去一定要早早留位，仲要揀定哂留好想食既餸菜，任務必須成功！