肉骨皇-肉骨茶

老老實實，我係有睇蔡瀾蔡先生所寫既文章

因為當中不單是對食物既食後感，仲有相關既知識經驗及後記

不過文章又唔會好似現時甚多既抒情多於談食，閱後總會有種學到野既感覺

今次黎到大坑既肉骨皇，都係蔡先生曾撰文評論

先前病左一輪，心諗好番就要補補佢，係好老人家思想，但我就係咁架啦:^p

上網查查藥膳何尋，結果就見到呢間久在待食清單上既星馬菜館

二話不說，晚上急急腳放學就黎大補一番！

環境寬敞闊落，坐得舒服鬆動

枱面大小也叫恰當，放上餸菜後也算夠位，食時不太狼狽

餐牌選擇多得令我呢個選擇困難症患者不知如何是好

分類井井有條，價格清楚列出，仲有不少圖片，圖文並茂

最後……還是請店方推介一下吧

檳城香濃肉骨茶　$82

上枱時係蓋住煲蓋，放係氣爐上熱至滾起

我十分期待既藥材香氣頓時滲出，真係「聞一聞，醒腦提神；索一索，舒筋活絡」

同時送上數塊油條片、椒、蒜及醬油，職員順道講解食法

講真一望呢煲，心想當然是小意思啦，份量還不夠我解渴

豈知一打開煲蓋……差啲「嘩」左出聲

入面既食材原來豐富至此，真係好似平時點一個煲仔菜咁豐盛！

醬油作湯底，色濃，湯亦帶稠

單是藥材已有十數款，難怪香氣之重之醇

入口比以往飲過既更厚潤，而且味道竟是非常的甘甜，同飲過既截然不同

嚐嚐杞子，出乎意料地甜，有如蜜棗

睇到咁多塊既豬排，固然肉香鮮味亦稍進湯底啦

見到咁豐富既食材，真心忍唔住要爆發了，補番病時既消耗呀嘛xd

豬排夾有軟骨，肉稔香綿，帶有湯汁湯甜，但同時保留肉味肉香

基本上要夾起一塊都有難度，因其肉化得會輕夾即開

軟骨相當既脆度亦形成質感上既對比

醮點醬油，鹹中帶甜，惹味更開胃:^)

另外仲有金菇、豆卜、支竹及冬菇等都好吸湯汁

而油條浸入湯後已經變微稔，不脆，算是香化

雖然未至於膩，但帶點油，要考閤下既接受程度啦

海鮮柚子沙律　$88

點這個既原因除左係為左清甜微酸既開胃柚子，仲有海鮮

因為記得文中提及呢度既係有螄蚶既

但剛病癒，還是忍忍口，搏下沙律入面會唔會有滄海遺珠吧！

柚子粒粒清香多汁，開胃清怡

海鮮當然是魷魚圈、蝦仁、青口……咦！螄蚶發現！

螄蚶速速前！還是濕潤鮮美，一個小小驚喜

最好笑既係竟然會有魚蛋片，彈牙味甜，只係感覺不太配襯了

還有沙律底醬，酸辣味道太稠重，反而浪費左柚子既一股清新啊……

巴東羊肉　$88

又係呢道我喜愛的東南亞菜式之一！！！！！

見餐牌有巴東羊肉選擇，今次就棄牛選羊試一試

呢款又同先前係好時食到既不同，又回歸番去印尼餐廳既味道

不過佢又有分別喎，呢個版本就比較稀身少油

如果係有食過或者食開東南亞菜式，就唔會覺得佢賣相不佳，反倒是吸引至極

羊肉煮得稔身，肉香濃郁可口

連住既脂肪滑香不油膩，尤如係嫩筋位，不知不覺就吞下了:^0

醬汁是方便拌飯既稀度，味道其實沒有顏色深紅的嚇人

香辣又不嗆，南薑香氣甚重，椰奶味道只是輕輕帶過

香料用就用得多種啦，但由於製法係要磨碎至滑貼，好等用手抓飯時夠黏夠香

輕舀一勺就大概較難找到香料所在

宜保咖啡骨　$88

甫上桌已傳來濃郁既咖啡香，我或許是進了一家主打星馬菜的咖啡店吧？

咖啡醬緊緊黏附排骨，均勻有致，再灑上少許白芝麻

視覺及嗅覺上的吸引力莫過於此

排骨肉稔香嫩滑，與外層黏身帶微脆既咖啡醬相比，質感頗有趣

只係呢道菜比我食過既更偏甜味，咖啡苦香淡淡的，也勿論咖啡之澀味

整體感覺偏重香氣及甜味，豬肉部分不老不韌，富嚼勁濃肉香，易入口之選

平時飲咖啡要落糖落奶既朋友應該就會接受到

怕苦澀而唔飲咖啡既話大概都可以一試既xd

參巴茄子　$60

呢一道係比較鹹口油身既菜式

參巴醬可謂是東南亞地區既辣椒醬，只係佢既味道不單是辣椒既辣及香

美中不足只係佢比較油膩，食時建議配塊酥餅或是碗熱飯吧

配上吸汁既茄子，惹味得令人停不了口

辣椒、蒜及蔥頭等獨特清香，遇上炸蝦乾既鹹香，全數收入茄子外層

煮得剛好熟透，食落仲係爽既，唔會稔爛至泥蓉

外部充滿鹹香，味濃卻不過份

內層就是一貫既茄子味道，清新一點，算是讓味蕾休息休息

熱薏米水　$25

飯後就不吃甜品了，免得甫病好胃口大開又一時太過放任

只點了杯味甜既薏米水，清熱去濕

味道甜香自然，雖然帶少稠，但尚算清新

只是感覺薏米不多，勝在夠綿，入口即化，且有淡香

提到服務，就不得不說

冬天天氣凍嘛，下單後店方就提議不如先上湯

對了，暖暖身是不錯的，讓人感到十分貼心

而且係有先問過，不單是窩心，還有份尊重

好時沙嗲-食風味

好時沙嗲屹立於好時中心多年，名氣之大早己有聞

一提到香港既星馬菜，就不能少數它

連蔡瀾蔡先生都曾撰文稱讚其出品，大概差極有限度，唔會係伏既

今晚輾轉之下同呀媽去到好時中心

老老實實個格局真心有點複雜，要搵到佢都有點難度

幸虧我的方向感不差，不消一會已到目的地，唔驚！

去到發現好似冇咩人喎，入座完全暢通無阻……

咦？唔係！

原來其他枱，幾乎每張都放左個「訂座」牌

亦不時有電話致電去確認訂座以及預訂其他日子時段

似乎……這小店真的不能小覷

海南雞飯　$47

上桌感覺係出乎意料之外既豐盛，單睇雞件份量已感大方

海南雞賣相普普，主要原因係比較淡白既雞皮

同平日睇到黃油油既黃油雞感覺截然不同

不過賣相不是一切，味道質感才是重點

入口雞皮嫩滑順口，固然已去毛，食時不會覺得口參參

雞皮帶有少許雞油香，但有別於黃油雞雞油既濃郁，未有其霸道

雞肉稔滑可口，雖然未至於嫩身及一抿即化，但帶點嚼勁反而更去膩

也許係雞油味道較清，唔會掩蓋到雞肉既肉香

要求濃味既可以醮點醬油蔥油，味道應該會更合胃口

雞湯調味頗重，飲落係冇雞既腥膩味道

油份感覺不多，只是覺得味太濃了

雞飯當然是個重點，固有雞油香，都係果句，佢雞油既味道係比較淡香

入口唔會覺得太過油膩滯胃，但重口味朋友大概會期望更多既濃香

飯粒感覺細黏，未至於濕爛，不過夠水分入哂味，咀嚼時頗順

椰汁辣飯　$44

一碟上枱係裝滿哂好足料！！！！！未食已經聞到濃郁既椰汁香

第一件事就梗係襯清完味蕾，淨試椰汁飯先啦:^D

椰汁飯飯質比較稔軟，有點兒綿爛但未到出水既程度

椰香是令人陶醉的稠重，且沒有任何結塊椰漿，剛剛好係包覆飯粒

雖然個人中意乾爽有嚼勁既硬身飯，但為左佢既郁郁椰香……

嗯！都係要食哂佢！

一旁有小魚乾、花生、辣蝦同奄烈

小魚乾竟是格外香脆！尤如薯片既薄脆感，咬落又帶嚼勁

花生都冇咩好講，脆身香口，同整體好配合

辣蝦沒有霉感，雖未有鮮香，但至少冇雪藏味

奄烈都叫大份，頗有蛋香，亦不油膩，加埋食有種飽肚感

整體黎講足料豐富，味濃重香，重口味既朋友不妨一試

巴東牛肉　$54

我不得不點既一道菜，純粹個人喜好:^)

其實食過既巴東牛肉都唔只一種做法，佢款就係稀身味甜似咖哩似沙嗲既

入口固然係十分濃郁既椰香，黃薑味道清香不嗆烈

老實說其醬汁味道偏似沙嗲醬，甜中帶鹹，順滑惹味

另外仲有青瓜可以解解膩，帶點清新

呢款稀身偏甜既巴東牛肉，對比起乾稠偏辣既版本，當然是更易入口及廣為人接受

醬汁仲可以用黎撈飯，甜香不膩

牛肉份量不少，煮得稔軟易入口

熟透卻不老韌，未有入口即溶既順滑程度，但綿而不霉

醬汁亦只是止於外層

裏面仍是充滿肉香，筋位富彈性有嚼勁，足矣。

珍多椰冰　$17

椰汁濃郁不稠黏，滑順易入口，香濃餘韻猶然在口

冰粒大又多，不過慢慢飲都唔會話沖到好淡好水

粉條甜稔對味，甜得黎唔會太過人工既藥水味

不過記得拌勻先飲，否則最底甜到你好:^|

青檸梳打　$15

係媽媽點的，加上本身不太好可樂及汽水，因此只淺呷

味酸清香，開胃自然，唔會好氣滯

食星馬菜或者比較濃味稠香既就幾夾既

唯珍-街坊味

唯珍近廟街，算係間附近選擇多又平，而自身位置不太旺既小店

係非繁忙時段都仲不時有客人消費，無論是堂食或外賣

最近想食下中式既食物呀:^P不如就試下啦

餐牌一目了然，簡單易明

通常店方就會叫客人就咁大嗌過去講自己食咩黎落單，感覺好街坊

食完就去中間既櫃檯結賬:^)

環境算是坐得舒服既，唔會過份緊逼

特別在於佢一張張長枱，有少許似矮版吧枱XD

衛生情況算可接受，又要講啦，起碼我呢個有點潔癖既細路係坐得落

蔥油餅　$10

拿佢餐牌寫十蚊件，係指呢度成碟架XDDDD

因為佢既一件係大圓餅，切開自然就係幾塊扇形煎餅，裝成一碟，份量幾澎湃

外皮金黃帶焦，焦香甚重，餅間更有蔥段透出，十分吸引

夾起一片，仔細看看，蔥量還不少呢，不槐我對街坊店既豪邁既期望

入口香脆，但不會過乾過硬，芝麻香亦先聲奪人

蔥香清而重，不會帶有惹人倒胃口既青味，又不會竄出讓人難大啖既嗆味

蔥花既濕潤度亦令煎餅感覺不會太乾太難嚥

油膩度不高，只可惜咀嚼之間未有想像中既麵香麵甜

無錫排骨麵　$33

無錫排骨細細一碟，但都叫有三數塊大塊既

排骨既骨，其實只係可以嚼咬既脆軟骨，正中我心意，脆口又過癮

排骨肉硬實，老實說我個人中意硬實既質感

只係大部分人都偏向稔香可口，一抿即化一種

不過呢個又係真係太過硬了，雖說係我心頭好，但食落係有種咬積木既感覺

醬汁酸度不高，反倒是非常甜口，當然，帶鹹

湯麵表面既蔥段雪菜灑得落落大方，睇到都覺得開心

蔥段清香不嗆，雪菜順口味香

麵條係粗身既，滑溜彈牙，條條分明冇黏實一團

只係佢嚼咬下沒有麵香麵甜，估計都不會是自家製品了，有點失望

整體而言，味道質素一般，但勝在夠家常

而用料都算大方性價比偏高，經濟實惠叫幾抵食，且人情味甚濃

以前上網見人話極度重味精，雖然我都係對味精比較敏感，但又唔覺得嚴重至此

Pizza Maru-乾硬脆

呢間韓國來的Pizza Maru早係開業前已有聽聞

開幕當日更有路過，只係仲未正式營業

店方當時亦有請過試食，不過我都係冇試到

最後拖拖下，就變左今次朋友相聚一行既開飯點

因為之前連續食左數餐pizza，現在也興致乏乏

因此只點了兩款炒飯以及少許炸雞填填肚

蒜香甜辣秘製炸雞　$89

老老實實唔好諗住會有好多，佢既價錢份量比例其實同出左名貴既紅雞相差無幾

蒜香味甚是濃郁，但沒有青味嗆味，香得平易近人

甜辣味道十分惹味香口，同蒜香配搭起黎又唔會太繁重

醬汁稠度高，可以緊緊黏附炸雞，只係我覺得醬汁都落得不夠大方囉

炸雞外皮香脆可口，脆到甚至可以話係硬左

肉香一般，冇雪冇腥味，算是香嫩但不至於滑身，夠濕潤

講番一樣講過好多次既野

去韓國果陣聽好多本地人講都係話韓國炸雞好香脆

同佢地食果陣先知佢地既香脆係指脆口不乾硬

入口係易順唔會界口既，雞肉不算嫩也未必要富肉汁

但去到香港就聽到個個都話要脆到美國炸雞咁就正啦

咁不如你地食美式炸雞算啦？本末倒置喎大佬

利申：呢個韓版香脆指標係相識既韓國朋友分享既，覺得我講錯你就搵佢地問

太陽芝士泡菜炒飯　$58

賣相老實未有很吸引，面頭紫菜算是添了少許香氣

芝士只有係面頭既少許芝士絲，也罷了！

太陽蛋蛋黃呈溏心，入口輕咬，蛋漿瞬間流淌

蛋香濃重，蛋漿質感較黏稠，並能咬到少許溏心黏牙如拖肥既部分

蛋白就……算了叫做有點焦香脆感吧，沒有什麼期望了

炒飯乾爽香口，但是番到枱食就已經放涼哂唔夠熱度

泡菜香氣融入每粒飯粒，酸辣交加，朋友連聲嚷著受不了（佢係唔多食到辣XD

只是吃著吃著，嗯……有少少油膩……

重點係，真係好乾爽，太乾爽到……幾哽喉

海鮮鍋飯　$68

海鮮料真心好足既，真係出乎意料

青口係開哂口仲要青口肉冇縮水乾身，佢仲叫飽滿有青口味架XD

除左點名青口，仲想講下魷魚圈

呢個飯入面就係不少魷魚圈，佢呢度既版本係稔身香軟，熟透架，但唔會韌硬難嚼

炒飯方面都係十分乾硬既，不過呢個都叫多料送飯既

朋友食左呢個幾啖之後又話都係食番泡菜版算……

昭拍耶-小泰城

先前同班朋友去九龍城

夜晚諗左好耐都唔知食咩好

但一場黎到，又想食下泰菜，九龍城出名嘛:^p

諗得到都宵夜時段啦，唔好啦掛？堅肚餓喎！

最後我地幾個就決定去風評甚佳既昭拍耶一嚐:^DDD

我地去既係舊店，環境裝潢係比較家庭式

不過坐得舒服，同埋一大堆人一齊黎坐大圓枱個幾溫馨

有別於走型格路線既新店，個人認為中意親近感覺既可以去番呢間

服務都冇特別要講既

最重要都係大家溝通到，冇爭執，冇錯單，冇漏上……

態度方面都係有耐心，職員又都係頗為親切既

因此我地吹水傾計都好安心好放得開，唔會話坐立不安，坐如針氊

昭拍耶拼盤　$158

我地話哂都咁多人，點個拼盤大家分黎食就啱哂

可以試多款式，又唔怕食到厭都仲要夾硬清哂同一款食品

店方已經將小食對半切好先上枱，份量恰當，仲點會驚食淨喎xd

由左上起，雞卷頗是紥實，味道帶有雞肉肉香，冇俾香料味道遮哂

咬落去係偏肉稔感覺，並非想像中似魚蛋既彈牙感

春卷香脆非常，外皮薄身又唔會吸油至完全半透明

入面既餡料幾足，調味剛好，沾上酸辣帶甜既雞醬，十分惹味

炸魚餅外皮炸後有焦香，不過唔算極度乾韌既

咀嚼間則是彈牙夾爽，稍滲香茅清香

炸蝦餅用料叫幾大方既，至少睇到入面係有爽彈既蝦肉，唔係得一大堆凝固既粉漿

炸得金黃色，無泛油，鬆脆可口

南瓜咖喱軟殼蟹　$138

軟殼蟹同咖哩係分開上既，可保持軟殼蟹既脆度

炸得香脆，入口不油膩

外殼尤如更為薄脆既炸皮，內層少許蟹肉唔算過老乾柴，仲帶有蟹肉香氣

調味得宜，唔會過鹹至掩蓋蟹肉既微甜

南瓜咖哩真係貨真價實，如名稱般係用南瓜盛起滿滿既咖哩

入面有不少蔬菜，感覺較肉類版本清新

當然啦，用黎蘸點炸物，味道不太複雜就反而更合適！

咖哩稠度剛好，緊緊黏上軟殼蟹

入口帶甜香，同軟殼蟹既鹹香形成對比，相映成趣

雖然我認為咁樣食係幾得意又唔膩口，但朋友就覺得兩者不配搭，都係視乎個人口味既

馬沙文咖喱（雞）　$72

馬沙文咖哩香氣濃郁，小嚐一口，花生香味重得讓人以為自己食緊沙嗲

味道甜中帶辣，淡淡椰香配上多種香料製成，香得黎富層次

雞肉稔身，雖然不能說有濃濃肉香，但都唔會話好勁雪藏味或者腥味

上桌會跟主食，我地揀左薄餅

一碟薄餅切開數份，進食時十分方便，我地都可以一齊分享

薄餅烙過後金黃焦脆，外層沒有泛起油光

輕輕拿起一塊，少許酥脆碎屑掉下，其實有如油酥餅

醬汁帶稠，便於醮點薄餅，咖哩味道之濃亦令薄餅膩感大減

泰式炸豬手　$140

豬手外皮的確是十分香脆，更帶惹人垂涎既金黃顏色

表面唔係油淋淋，沒有反哂光沾哂油，睇到個樣係會想食而不是倒胃口

豬皮入口是充滿膠質，黏身濃香

而且先是滷過，入味非常，食落比在外面淋醬調味更香更深邃

豬手肉其實反而比豬皮佔量少，勝在香稔易嚼，沒有豬肉易柴韌既通病

香葉辣肉碎炒飯　$68

面頭有個煎得金黃如日既煎蛋，賣相吸引

煎蛋其實真心係油既，不過邊緣是非常香脆，有煎過既香氣

當然啦，呢一道菜既重點都係係個炒飯之上

只小舀一匙試試味，香葉清香竟是如此突出及濃烈，讓人停不了口

肉碎刴碎後炒得惹味，又冇咩脂肪團，瘦肉都夠稔軟

而且佢既辣度亦係比我想像中香辣帶麻感，又未及地方中菜既嗆

飯粒是粒粒分明，感覺係濕炒，炒完都係重水分

食落就唔會話有嚼勁，但好彩唔係濕到淋爛姐:^)

成班朋友雖然有第一次見既，但吹水吹到一晚熟絡

真心一講就笑到冇停口，抽水功力中上，係得既！:^\

老老實實，又話搵日由朝早食到夜晚？幾時先？拋個日子出黎好喎！

樂天皇朝-七彩色

早已有聞新加坡旋風來港既八色小籠包

係Openrice及Instagram等都捲起八色熱潮

評語好壞參半，尤其係對於其主打菜式－－八色小籠包

今次就約同朋友同行一試，中唔中伏都叫有人陪呀嘛xdddd

環境十分寬敞，燈光幾暗，整個感覺係好似高級西餐廳咁

餐廳中間有水池，設計獨特，感覺高雅

廚房有一部分設透明玻璃，客人可以眺望入內

會見到師傅拉麵架:^)，娛樂得黎又可以展示師傅功架

李白醉雞　$68

雞肉不老不柴，主要都係雞肉，骨位不多

醉雞脂肪位不多，雞皮嫩滑不膩，有少許雞油香

甚為入味，帶酒香又仍能保留雞肉原有味道

花雕香氣未有想像中濃郁刺激，雖有酒香，但似乎係偏清既

八色小籠包　$88

每枱都有張食八色小籠包既教學

咩話？教學？放入口咬咬咬吞落肚，使咩你教？

其實係因為佢八色小籠包既味道係由淡至濃既

原味、人蔘、鵝肝、黑松露、芝士、蟹粉、蒜香及麻辣

佢係咁樣順序食，確保唔會蓋過前者既味道

因為係同朋友分享，我就專登揀左大家話好伏既款式挑下機

原味算是比較保險，富肉汁，帶有肉香又不太油膩

只係外皮真心乾身，甚至去到稍韌既地步

人蔘味帶苦，算有少許回甘

味道並非講到咁假咁人工，可能係同肉餡味道唔夾，個落差令人誤會

芝士味同想像中如芝士年糕既爆漿感好大分野

佢只係肉餡一邊附著半溶芝士

說是特別，但也帶不出各自香味，唔上唔落咁囉:^0

蒜香味確是蒜香濃郁，一咬開小口，未吸盡湯汁已經聞到重重既蒜味

只係蒜香夠濃，但維持得不久，基本上聚集係湯汁，之後就漸漸消去了

四川抄手拌麵　$58

抄手個頭比想像中大而飽滿，外皮稔身不爛，緊緊包覆住餡料

肉餡重肉香，而且不會過老過韌，係剛好既狀態

麵條幼身卻充滿彈性，富有韌勁，而且都幾黏附到醬汁

辣油香氣非常重，我本身唔係好食到辣，但佢呢種辣係偏香而不嗆既

配上蔥花既清香，則顯得更為迷人了

整體份量亦係大過我原先估計既，因為本身以為佢係貴一貴又細細份

水煮牛肉拉麵　$68

呢個都係辣麵，不過就係有湯既版本

話明水煮牛肉拉麵，咁梗係先試試水煮牛肉啦！

牛肉片頗為嫩身，肉香濃郁，肉質亦是彈牙不老

雖然牛肉自身冇咩調味，但配上鹹辣濃味既湯底，則是恰到好處

麵條都係幼身彈牙既手拉麵，咀嚼時候會有淡淡麵香

糯米紅棗　$48

睇餐牌既時候見到呢道菜已經心心眼

乍看之下係手板眼見功夫，但實情係要將糯米團釀入紅棗，係要下點心思既

也許賣相不及精緻誘人，但味道令我頗為滿意

紅棗甜得自然，清香尤在，亦未有酸味

糯米團係比較紥實一種，咬落係有韌度有嚼勁而又不粉爛，非軟糯黏口既

兩者味道及質感上非常合襯，食多少少都唔會覺得膩滯

至尊重慶雞煲-香辣雞

識食一定宵夜時段去食！

好似會少人又唔使咁逼

呢間係創興廣場樓上既雞煲店點知係夜一夜都仲不少人頭

我地兩個都等左十幾分鐘先入得，明明已經十點左右

小辣雞煲

雞煲湯底聽聞係用左十幾種由重慶運來既香料調味

入口當然係重椒香，麻感一般，或者因為小辣所以微弱到不太能嚐出來

另外，薑蔥蒜香氣亦算突出而分明，互相配合未會大差異

雞肉肉香甚濃，肉質未至於嫩口，但不老不柴，又唔算好肥

我地兩個人只有半隻雞，只係份量都夠皮既，反正可以任食其他食材

即包餃子

呢個係比較亮點既食物，因為其他多數都係平日邊爐料，冇咩特別想講既

佢有三款：豬、牛及羊

我就三款肉都食既，咁就梗係試哂啦，朋友就冇食到羊啦

三款餃子外皮都帶微微彈性，包裹得不錯，唔會好易穿爛

我就比較中意羊肉餃，全因佢款底特別

平時邊爐放題都甚少見有羊肉餃子，豬肉版最普遍，牛肉都不常見

較較咬開外皮，佢入面仲係濕潤帶少許肉汁

味道唔太油膩，至於羶味……感覺不大

就算對羶味敏感，我諗都會覺得佢算溫和既:^\

服務……想講個效率真係頗低，同埋有時會飛枱

漏單遲送一籮籮問題，態度有少少串但叫可以接受

基本上都唔多位要佢服務，除左點選配料一環，因為好似飲品咁都係自己去斟去拎

The Coffee Academics-小嚐甜

海港城以前一個不時擺小攤檔賣甜品既地方

呢一年入面已經變身成為十分寫意既角落

店內有小方枕、梳化、大木桌及枱燈這類很悠閒風既傢俱

環境舒適自在不再講，佢地既高凳真係我最中意佢既一點

上面雕刻出所引用既名句，主題圍繞生活及咖啡（當然啦係咖啡店

感覺正面樂觀，令當時有點消沉既我，都好像豁達開來

大枱上有報章雜誌可供閱讀

甘筍蛋糕　$48

整件蛋糕個頭頗大，上碟後更真實，才發現比係櫥窗展示既更高身厚身

也許我太遲了，蛋糕擺放太耐，外層感覺頗乾

先食面頭一層，香脆果仁加上微酸果乾，中和忌廉芝士既甜膩

甘筍絲長條乾身，甚至可謂有韌勁，但仲有少許清甜

蛋糕部分外層真係比較乾身

然而內部尚算濕潤，而且比想像中帶油膩

甜度中上，加入滿滿大方既果仁、果乾及甘筍絲清一清，入口唔叫好溜既

兩層厚身蛋糕中間有薄薄一層忌廉芝士夾心

芝士味濃郁香甜，仲有少許酸香，分隔兩層蛋糕就咁冇單調啦

偶爾放慢一下生活步調，老實說不是壞事

被生活追趕，被時間逼迫既一剎，放鬆紓緩才是良藥

Spaghetti House-芝鍋心

近年乜乜乜Fondue係香港都幾熱門

話說講起芝士火鍋，就會諗起係瑞士旅行食既芝士

當然仲有Raclette都好正點

芝士火鍋係屋企其實都整到，只係自己真心懶得準備了

今年就一於就手順手食哂兩大連鎖店既出品啦:^)

尊貴芝士火鍋套餐　$388+10%

芝味比Pizza Hut既濃郁可口，並帶香草香氣

雖然單睇意粉屋出品，都唔夠芝士香味，但連鎖店相比之下我會揀佢

稠度亦較Pizza Hut濃，只係冇酒香

醮點食材後凝結較快，也叫可以黏附食物外層不易掉落

不過就唔係好似牽絲芝士咁稠身同煙韌，當係點醬汁啦

美國特級燒牛肉帶牛肉香味，冇咩油份感覺清爽

而且咬下會有點肉汁，濕潤易入口，少筋位挺好嚼的

份量比想像中多，其實是合格的，性價比不會太低

西班牙風乾牛肉．蘇格蘭煙三文魚黑醋沙律

風乾牛肉有點過於乾硬，當然並不是未食過所以誤當佢係太乾身

只係入口都仲係硬片不軟化既感覺，頗韌

味道固然是偏鹹，不過切得薄身就冇咁油膩

煙三文魚鹹度剛好，油香肉香不突出，只係點完芝士都唔會好溜

勝在稔軟冇筋位，易嚼咬不黏牙

兩者本身就帶油份，配上酸甜清新既黑醋醬，以及新鮮爽脆既蔬菜

整體油膩度隨之而降，亦有助去膩感以品嚐其原味

加拿大藍青口外表乾身，無水光泛油，體積甚小

入口只有少許水分，但未有鮮香，不過都是意料中事

幸好未有雪藏味及腥味，容易讓人接受

美國瘋薯條只有少少香脆，鹽鹹不重，好在未有出油

香草白菌既香草味淡薄，白菌乾身但叫重菇味

唔會苦澀亦冇咩怪味，易嚼咬

西蘭花都係偏乾身，十分爽口，咬落仲好清甜，夠哂解膩

意式香草肉丸內有點點肉汁，味道夠味，質感帶碎肉感，甚算自然

香草香氣都足夠既，感覺頗去膩

車打芝士腸外層微脆，且不油膩，肉既部分調味適中

中間既車打芝士心味道濃郁重香，可惜佔量少

蜆殼粉外乾不黏，分明得黎唔會油身，帶點嚼勁

法包粒外層僅有少許韌度，包香亦不足，包心算鬆軟

醬燒豬肋骨　$198+10%

外層焦香微脆，內部保持水分，軟稔鬆化

醬汁酸中帶甜，開胃解膩，加上焦香就夠惹味了！

稠度適中，足以沾滿肋骨肉

夠味之餘，食時不太狼狽，因為唔會周圍滴

重點是上枱既份量比餐牌相片為多，更沒有照片中既乾韌少肉

現實比想像中更理想既時候就不期然可以令顧客感到滿意，高招？

薯條香口微脆，鹹度一般，我就會點汁先食

食完咁多膩滯野，好在佢有少許伴碟菜可以清清味蕾