Ruby Tuesday-豬肋骨

一直都好想試下Ruby Tuesday，聽講佢既燒豬肋骨真係幾正

可惜佢價位偏高，如果唔係因為朋友有Discount Coupon，今次都係黎唔到/___

最後我地用優惠價申請埋個90日membership

好啦，之後要趁有折扣食多d先（雖則我地兩個大胃到半價左都要成三百蚊一個人……

環境其實幾舒適，不過我覺得凍左少少，冷氣太強勁xdddd

雖然枱面都夠寬闊架啦，但碟頭大到都係差唔多擺得哂咁，唔係點活動到

燈光唔刺眼，整體感覺亦係一般既扒房式黑暗，但起碼我影到相仲要冇開燈冇調光

Triple Play

豬肋骨拼盤有三款食物既（唔計焗薯伴菜）

半份豬肋骨我地揀左經典味道，酸酸甜甜係好開胃，味道其實有少少HP sauce咁既

豬肋骨烤得焦香，外層食落仲有香脆感，又唔會油膩

肉質香軟綿稔，入口一抿就化開

嫩滑不老仲要有少許油脂，十分香口，令人回味:^)

另外仲有炸蝦仁，蝦肉炸得金黃香脆，又冇滲油

肉質彈牙不腥，又冇雪味，點下醬食更易入口

炸雞塊味道其實似肯伯伯雞排，呢個炸雞甚至係更實身更濃味

老實講炸雞我就覺得一般，佢冇咩脂肪，也確實是乾身了點

焗薯夾左好大球牛油，味道濃郁香口，但真心幾油膩

酸忌廉酸得黎好溫和，仲要有奶香，加埋落去焗薯食又會開胃D既

Steak & Seafood Combo（Jumbo Lump Crab Cake）

我地兩個人仔仲要點左牛扒海鮮拼盤（驚

牛扒係8oz既，點左五成熟但上桌大概係七成

牛肉肉味濃郁非常，當然冇雪味啦，仲要有不少肉汁

肉質彈牙香稔，冇筋位咁，食落唔會黏牙:^)

珍寶蟹肉餅真心係好足料好足料！！！！！

佢本身厚度已經令我地驚艷，目測至少有4cm

外層煎得帶焦香，仲要有少少脆度架:^DDD

蟹肉係完全充滿口腔，唔會係用粉漿堆砌而成，係真材實料好滿足

調味算係淡，可以帶出蟹肉自身既香甜味道，更為濃香

可惜係佢實身，有少少乾，仲要咁足料咁多蟹肉冇脂肪帶既情況下就更甚

呢個既焗薯又有d唔同，係有煙肉碎有埋芝士條咁

食落更是香口惹味，令人欲罷不能

Fried Pork Chop

呢個係當晚special offer平價加點既

豬扒煎得夠香口，肉質稔身但有韌勁，重點在於佢仲係有肉汁，仲係夠水分

食落唔會乾口韌身都吞都吞唔到，又唔會黏牙

Chocolate Tallcake

黎到Ruby Tuesday，唔食個咁珍寶級既甜品係唔走得住既xd

雪糕係雲尼拿味既，有好多雲尼拿籽，香甜奶滑得幾自然

焦糖醬香甜不膩，稠度剛好唔會太過黏牙

cream topping奶滑香濃，泡沫係好綿密又唔會油膩

我覺得cream上面既orea碎係加分位，脆脆地又香甜，降低cream既膩度

朱古力蛋糕不得不講，味道十分香濃，朱古力香氣重得尤如brownie

但佢呢個係海綿蛋糕既感覺，氣泡細密，感覺不俗

只係佢上面既topping係好難落得到去蛋糕到，其實係越食覺得越乾

朋友食到一半已經放棄，最後我又係清哂左個甜品XDDD

服務其實不錯，staff俾我地既感覺係好cheerful XDDD

同埋不時會過黎問下我地覺得食物如何，令我地覺得係會尊重同重視客人既反映

雖然話佢地有membership subscription，但唔會逼你入會又唔會係咁煩住你去推銷

咁當然會預左佢地係推銷會員計劃既，不過唔會令人反感

我地都係入左個90天試會既，價錢都係優惠價

只係酒精飲品就唔會有折扣姐

期待之後密密去清掃佢地既menu XDDDDD

Brotzeit-在海旁

風和日麗……（算是）的假日

當然要出外走走曬曬太陽吸收天地精華啦！

而是日Brunch就決定左去以前經過見到既德國菜餐廳

環境設計算幾好既，佢有露天位又有室內位

高枱梳化有得揀，座位闊落坐得舒服仲好足夠放到行裝

唯一可惜既係當日唔知點解就有至少兩隻烏蠅圍住我地果邊幾枱飛

不太可能係食物香氣，因為食完都仲係咁

搞到食都食得唔自在，好狼狽咁儘快塞哂食物入肚走人/___

假日都唔可以舒舒服服hea坐一陣嗎？

Oven Roasted Pork Knuckle

確實價錢唔記得，只係知道係兩百左右

講實呢個價係可以去番出名d既德國菜餐廳食，我諗仲有找

但一場黎到都會想試下既:^)

上枱個份量都ok既，賣相都睇到係有心擺盤既

侍應問使唔使幫我地切埋，樂意至極啦，不過……有諗過出聲話不如自己切番算……

呢到既豬手係焗爐烤既方式去整

外皮真係百分百香脆，仲要唔會點滲油，冇咩膩感

皮肉間既膠質好豐富，十分香口，鹹度又剛剛好，仲有肉香

可惜既係豬手肉都幾乾身硬身，食食下會覺得有d難咬難嚼難吞嚥/___

伴菜比較特別既係有酸瓜，酸中帶甜，爽脆可口

一般食開都係只有酸菜，而呢間既酸菜係溫和派，酸得黎係開胃唔係乸口

薯仔沙律就麻麻啦，食落有少少出左水，水汪汪既感覺:^(

Currywurst

我地另外就點左個係德國北部，特別係柏林，甚具人氣既咖哩腸仔黎食

咖哩香腸用既係德國大大條腸仔，重肉香味既，唔多脂肪粒，偏緊實

但想講既係佢唔脆皮！！！！！/__________>\

醬汁酸辣齊備，咖哩粉加蕃茄醬，重口味啱哂我xdddd

薯角唔多脆口架啦，但又唔係話好油膩，點下醬汁都可以架啦

太平館餐廳-四人行

太平館除左巨大既梳乎厘，

燒乳鴿同瑞士雞翼亦都係佢地既馳名菜式

今次同親友一行四人去食個假日Brunch，順便試埋啦XDD

環境說實話有點逼，四人坐卡座連墊枱紙都係緊緊相貼既

莫講話我地點左一大枱食物放唔落，連只放餐具都佔左枱面大部分空間/___>

餐包香軟微甜，仲帶有少少熱力，塗上牛油更是香氣濃郁:^)

羅宋湯酸甜開胃，雖然有點油膩，但勝在足料多蔬菜，算係清番少少味

燒乳鴿外皮薄身不多脂肪

加上甜甜地既醬汁，係幾香口既

平時食乳鴿都有少少腥羶味，但呢度反而係燒得香口夠味，稍為辟左異味

瑞士汁牛河真係好入味，去過其他餐廳食更貴既都冇佢咁夠味

河粉濕潤易入口，沒有粉爛，保持到彈性，微韌既嚼勁

牛肉片都不少，肉質彈牙重牛肉香，即使係油左d，都會令人一口接一口:^d

鮮茄燴石班球飯係一碟過上枱既

魚肉綿稔，算係滑身，但未至於香嫩

茄汁甜中帶酸，偏稠，用黎撈飯可以緊緊依附飯粒又唔會浸爛佢

砵酒焗牛柳絲飯一上枱已經係濃濃既蕃茄香

焗過既醬汁面帶焦香，真係有鮮茄唔係淨茄汁既

蕃茄好多水分，清新開胃，配上茄汁，茄味沒有不協調，反倒更香濃

牛柳絲冇咩脂肪，稔身香口，又冇筋位，方便食

瑞士雞翼飯登場！！！！！

雞翼夠哂入味，鹹中帶甜，可口不膩，真係食到停唔到口

冇雪味冇腥味呢d基本野唔再講了，雞肉夠香味，唔會俾瑞士汁完全蓋過

白飯水分剛好，軟綿不濕爛，加上醬汁撈就更好味

雪糕係跟餐既甜品，仲可以揀佢傳統西餅，上次試左今次試呢個

雪糕夠凍，唔會一上就已經半溶咁

味道不會過甜，但欠了份香味，總係覺得太表面，一般吧……

梳乎厘都係一定要點既

今次再食仲係咁大個冇縮水，睇個賣相金黃色好吸引

外層更硬身，食落有焦香，更是香口

內層泡沫細滑綿軟，甜度適中唔會話一下子就生膩

好似上次咁都係快快手趁熱清左底:^)

服務真係要講一講……

其實都慣左老店資深職員係有可能會態度一般般

但今次係說話中夾雜左催促同埋厭煩既感覺，希望係我地聽錯

上次黎到食都覺得有少少，但起碼接受到，同埋講落野係覺得佢地好直腸直肚

只係呢次同埋其他人一齊，見到佢地臉色都有少少變就真係擔心會覺得係不快經歷/__>\

神戶屋-放題夜

約左朋友出黎食飯
本身好想食雞煲XD（奇人奇事，當好多朋友話食到厭哂果陣我就好想食XDDDDD
但因為某些考慮就冇食到了:^0
結果係旺角街頭游走，去到放題中心（其實係兆萬）停下腳步
冇半分鐘，手上就多左幾張傳單
睇左食物款式，諗兩諗……就試下呢間啦

Menu有分九種色既，彩虹咁幾得意既XDD

同埋排得都整齊，易睇易拎又唔會亂放紙

刺身

三文魚厚薄剛好，沒有筋位，橙紅色感覺幾新鮮幾吸引

食落唔會好重雪味腥味，脂肪不多但都帶點魚油香既:^)

甜蝦算係彈牙，甜得黎好清

粉紅色又帶點晶瑩既蝦肉感覺都係新鮮既，大概唔會係擺太耐既貨

虎蝦晶瑩剔透，蝦肉爽口彈牙

挑腸清潔得不錯，就算係冇甜蝦既清甜味，都仲係食得過既

針魚刺身真係第一次見放題有，亦都係我第一次食

感覺好薄身，而且係乾身d既，冇咩油份脂肪咁

呢個我覺得都幾清新

唔會膩，但肉質係緊實少少，味道濃縮卻非重味

貝柱帶點清甜味，彈牙，食落香口，感覺都新鮮

凱撒三文魚沙律

說白點就係凱撒沙律醬加三文魚加蔬果加芝士粉……

但真心呢個……怪怪地-___>

沙律醬加芝士粉再加三文魚，感覺太濃重太多層，甚至係有少少膩

同埋個味道真係唔多夾……

芝士粉加三文魚刺身反而係會有怪味，而且係令到三文魚既腥味出埋黎:^(

日式魚生沙律

呢個用既係黑醋，酸中帶微甜，清新開胃，比凱撒版本好多了

醬汁豬軟骨

夠味又夠稔軟，軟骨部分有點脆口（Y）

肉既部分一抿即化開，冇咩脂肪可以直接成舊食都唔怕肥膩

醬汁稠度似乎高左少少，令到個感覺好黏，好易沾太多醬會太重味

日式冷豆腐

豆腐滑嫩但豆香不重，而且好易散爛

配上木魚碎同醬汁凍食都幾開胃

宗八鰈魚一夜干

味道十分濃郁集中，魚肉都係緊實既

如果有日本清酒，用黎送酒幾好既xdd

鹽燒秋刀魚

肉質緊實，但唔會太過乾身，仲係好易夾得開

燒過帶點焦香是香口的，調味得宜，合格:^)

鹽燒青花魚

魚肉燒過帶焦香，滑身唔會過乾，濕潤易入口

冇雪味同腥味，仲有少少魚油幾香口

日本骨付腸

呢隻腸我諗大家見過唔少

但我就真係冇見過開半既骨腸……感覺有少少小家/___

配上燒汁，鹹鹹甜甜更惹味

韓國啤酒炸雞

講真我就唔知啤酒左去邊啦

炸雞外皮炸到有少少硬，不過都係算脆既

脂肪不多，但肉質唔會太過硬實難咬，感覺都頗為香口

鐵板牛肉粒

真係好細粒……加埋薯仔粒一齊食又夠香口

牛肉香味就一般般啦，但調味幾惹味可口

肉質又唔會過韌，冇筋位，易食唔會黏牙縫:^)

日本枝豆

枝豆調味剛好，一放入口個鹹味，配上豆粒既微甜，又幾惹味

汁燒雞肉串

肉係夠熟，而且唔會太乾太焦，其實呢個都好難有咩差錯掛

日式醬燒牛肉

用左不少洋蔥拌炒，但味道唔會嗆辣，反而係稔軟帶清甜

牛肉唔會太肥，加上醬汁食，順口不膩滯

黃金薯仔蝦

外層薯圈炸得十分香脆

加上佢係一圈圈圍住有空間唔係密實既，唔會咁膩咁滯

點埋沙律醬，酸甜解膩，食落都易入口D

吉列帶子

外皮香脆，厚度可以接受，未算係厚層炸粉

入面既帶子仲係保持到有水分，唔係乾哂身，合格！

椒鹽魷魚鬚

炸得酥脆香口，魷魚鬚亦係彈牙

但朋友就話調味太重手，覺得好鹹.__>.

特濃芝士流心棒

呢個可以當係甜品？

炸得脆身又唔會好油膩，淋上煉奶更是添了奶香及甜味

一咬開就係好似食芝士丸既芝士香味，有點牽絲，食得過癮

鱆魚小丸子

體形偏大啦XD但中心濕潤不會太乾實

澆上燒汁及沙律醬，灑埋木魚一齊食又唔會話一下就膩滯

日本香芋丸

外層金黃香脆，入面有少少淺紫色帶甜既芋蓉

芋頭香氣唔會太人工，清新得黎又夠味

芝麻紅豆丸

其實同平時食到果D冇咩分別，都係似煎堆咁

中間既紅豆蓉甜度可接受，味道自然不會過份人工

可惜的是外皮真係幾油下，食左一個已經覺得膩/___

雙重朱古力流心棒

呢個係我睇Menu果陣最吸引我既款式！！！！！

外皮帶點朱古力香，脆口，厚度剛好包得住朱古力餡而不穿漏

朱古力餡稠身，香味濃郁，甜度剛剛好

加上外面再淋上少許朱古力漿，味道更見香濃:^D

 .

冰鎮菠蘿

其實係冇冰鎮既，冷凍程度都唔太夠

但睇在佢酸酸甜甜，清新開胃又解膩既份上，都係可以一試既

迷你日本薯

呢度既日本紫薯感覺同其他放題唔同，佢似係去左皮

香甜綿軟，食再多都唔會好滯

焗芝士Pizza扇貝（每人一客）

佢一個Menu係特別menu，只可以一人點一客

我地都揀左呢一道，其實仲有壽喜燒等選擇

只係……真係冇咩特別，我感覺到既只係好多既千島醬加焦香味

扇貝既味道完完全全被掩蓋，自然地腥味雪味咩都唔會有既

甜品（每人兩客）

甜品係佢menu揀，得四款就全部點黎試下

啫喱係提子味，但感覺好藥水味

雪米糍你覺得可以評d咩……？

奶凍講真有少少似冰沙……佢入面係雪到起冰，扭轉左成個質感

泡芙好彩解凍解得夠，睇個樣都似係外面番貨既，味道正常囉

飲品

其實黎黎去去都係d汽水可樂咁

呢個番石榴汁味道都好正常既……

環境方面可能會有少少暗，同埋逼，但衛生情況就ok既

服務……都係有d愛理不理咁，係要睇邊d職員囉

我地有時舉手示意都要等一排，但唔少staff個樣唔似忙緊，企哂一堆咁

不過有兩三個係attentive既，也許要踫運氣了:^0

Neway-焗個飯

打自Red MR出現，去Neway唱K既次數少之又少（前者多想唱既歌

但為左我地香港樂壇既兩股新勢力，我地決定要重臨舊地

入房坐低，第一時間搵我地既天堂鳥BOP同埋Faith仔仔啦XDDD

唱兩唱熱下身，跟住就係……睇Menu點餐時間xdd

（尋找共鳴：有冇人一樣都係拎起個咪之後連講野都要對咪講？XDDD）

Menu款式幾多既，對比起紅先生

粉麵、沙律同焗飯意都係照原價

而扒餐、套餐同一人鍋就要另加$12

只看價錢，講真感覺算是公道了，而且係包一杯飲品既

飲品亦有好多選擇，翻後頁就係飲品menu

焗白汁海鮮飯

賣相還是出乎意料的順眼XD

本身對Neway既食物都冇咩期望，但呢個飯睇落又ok既

白汁夠味，唔係一味得個膩字，焗完既焦香味都係加分位

海鮮其實都係大類魷魚圈呀，假蟹柳咁囉:^)

個飯都係偏乾，硬身但仲係粒粒分明既，起碼加左醬汁都唔會淋爛

焗意式香腸飯

好神奇地佢地既吞拿魚係冇哂既……因此只係有香腸啦

醬汁濃稠度剛剛好，可以包裹而非浸濕飯粒，酸甜得宜（其實係偏甜），開胃順口

香腸都冇咩好講，味道唔會太鹹既，正常味囉xdddd

面頭有少少芝士，焗得微焦香口，唯芝味不太重

炒底飯幾香口，有蛋香，略嫌油膩，飯粒好幼細，偏乾身唔係濕爛既

老掌櫃-親切感

朋友暑假番到黎香港，耐一耐都未約食飯

終於約左一日啦，又唔知食咩好

諗住上網搵下有冇咩新餐廳小店啦

就俾我地搵到呢間係大角咀既東北菜！

咁啱我地兩個都係特別少少（？）對中菜好有興趣

以前已經成日嘈住要去食小菜要食煲仔要食包點……總之充滿中國特色xdd

上Openrice搵下地址地圖咁啦，點知又發現左另一樣野……

店方係好用心咁不時會回應食評，仲要似乎唔係口講，係真係實事求事咁實際跟進

就憑佢地呢下用心，不得不支持、不試下味啦下話xdddd

京式醬牛肉　$58

牛肉切成薄片，厚薄均勻，份量比我地想像中多

夾起一片，可以看見筋位係半透明，有點透光

牛肉肉香甚重，但凍食冇咩膩感，脂肪位亦不多

牛肉夠哂入味香口，沒有腥氣，點少少醬汁更惹味

如果仲係怕太重牛味既話加埋少少芫茜香入口，清而不嗆既好配搭

乾煸四季豆　$58

四季豆感覺唔會好油膩，食落焦香味好重

除左爽口多水分，佢仲帶有絲絲清甜味道

加左蒜子去煮，蒜香濃郁辟青辟腥，沒有一點嗆味

肉碎唔多脂肪位，感覺唔會太肥膩，鹹香微辣，惹味香口

松子黃魚　$88

講真我真係好中意食呢道菜，自己整過真係原條既感到好考真功夫

係menu見到有松子魚有少少意外，但想食多幾樣

冇揀到原到既桂花魚，而係平少少既黃魚

上枱賣相係幾吸引既，同埋新鮮煮起唔會話太泛油

先試一試醬汁，稠度剛好，酸甜味道開胃而不刺激，夠順口

雜豆唔會有雪藏味，水分亦夠，身邊不少討厭雜豆既朋友大概也吃得下？

夾了一塊魚片輕嚐，魚肉鮮嫩沒有腥味，雪白滑身可口，唔會過老

嗯……？熱度係夠既，亦不覺油膩

但係……炸完該有既脆度呢？我只覺是魚塊附著軟掉的炸皮:^(

京蔥羊肉餃子（十隻）　$42

原來係想加$5食煎餃既，但落單果陣唔記得講，係其後先醒起

大局已定，都係乖乖地食番水煮啦

餃子粒粒飽滿，同menu上既圖樣類似，感覺好足料夠餡

餃皮不會過厚，表面看似乾身黏口，但吃下去卻帶麵皮香

輕輕咬開外皮，果然係帶點肉汁，鮮香味美不會過膩

羊肉肉質鬆軟可口，加蔥後羊羶味不重，而羊肉香卻是更被襯托出來了！

沾上少少醬汁，帶點調味，微酸微辣，更為惹味

煎肉餡餅　$12（兩件起）

問過店員，餡餅兩件起係可以混合不同味道既

咁就梗係兩款味：洋蔥牛肉、大蔥羊肉，都各要一個試試啦

首先兩款餡餅既外皮都係薄身既，但勝在佢又唔會有穿漏喎（Y）

煎得焦香，老實講我地一見到仲以為係好乾，實中伏啦

點知一咬真心不得了！！！！！

外皮非常香脆，仲要有陣陣焦香

大口咬下的一瞬，滿滿濃郁既肉汁外皮破開的小口光速爆瀉

最好笑既地方係，親眼見住朋友咬落去果下d肉汁飛濺落茶杯，枱面都有

呢樣真係笑左好耐xddddd

洋蔥牛肉肉餡感覺綿身，香稔不膩

洋蔥仲要帶有香氣及甜味，嗆辣感同青味一散而盡

牛肉肉香亦十分濃郁，感覺係好集中好濃縮既肉味

大蔥羊肉肉質都係軟稔香滑，唔會話太肥膩太散碎

大蔥香氣重得黎好清，但唔會有嗆味青味

不過講真食完唔只唔覺膩，仲要明明好濃味都冇咩口乾既感覺:^)))

講一講環境

當日係週末，所以可以見到我地都係只能單點食

店員帶我地兩個人坐四人位，鬆動舒適

沒有垃圾，枱面都係清潔過既，衛生方面合格

其後竟然越黎越多客入座，而full house

這就是神奇的地方，佢地係full house既情況下仍然係冇打擾客人話要讓位搭枱咁

另外一個點就係……小店、街頭、非屋村地鐵站旁……

週末都仲係可以咁多客既，講真不容易

服務方面，我地都叫滿意既

除左先前講環境時有輕輕帶過冇叫搭枱

店員感覺都係有精神既，唔使點等就會應聲會過黎睇下咩情況

而唔係扮睇唔到，聳肩就轉身走咁

再加上一開始提及，係不時會睇番客人有咩反映

肯改進，唔係hea做既呢點真係唔易搵到

希望貴　餐館可以堅持此等用心，生意蒸蒸日上

土司工坊-嚐蛋糕

話說繼土司後，好友講過呢度既蛋糕味道不錯

見佢又有我中意食既香蕉蛋糕……

今次係講蛋糕既XD

班蘭蛋糕

外層乾身，焗得帶啡既薄薄一層特別香口濃味

蛋糕體一開始食落係又乾又密，食多兩啖已經覺得難以嚥下

幸好有部分既蛋糕體係濕軟綿潤，而且班蘭香氣特別濃，濃郁之餘又夠自然

因此整體俾我既印象都係可以接受既

香蕉蛋糕

呢個蛋糕係好實在既，唔算太乾身，但佢係爽d唔會咁濕咁油

香蕉味濃郁，我覺得算係自然，味道唔會人工得像香蕉糕

都係啦我真係覺得蛋糕最外一層係最正，味道最濃縮既部分再加上焗過既焦香，都ok既

檸檬薏米水

薏米水香味不太明顯，質感亦係稀身，未見稠度

杯底既薏米不多，而且唔係好夠綿密黏感

一杯飲完，味道都係好淡好清好清既……

PizzaExpress-小清新

一場出到黎，但諗極都唔知食咩好

唔想等好耐位，但行多兩行已經撞正放飯時間

係咁緊張既情況之下……

咦！都好耐冇食PizzaExpress啦喎

同行之人又表示中意薄脆pizza

好啦一於呢間唔好諗咁多了！！

Menu係全新既餐點設計

睇到Summer/Fall，已經可以想到佢地係定時定候有新菜式

為左帶來新鮮感以吸引客人，又係幾用心，畢竟不少人都喜歡嚐鮮:^)

Carpaccio di Salmone Affumicato

煙三文魚沒有一點膩感，入口豐潤，魚油甘香瞬間充斥口腔

鹹度剛剛好，作為前菜不會太過濃味

加入刁草、Capers及少許檸檬汁，感覺更是清新

Garlic Bread

呢個蒜蓉包面頭係有芝士既，焗得焦香，芝士香仲好濃郁

麵包底部感覺幾脆口，包心位香軟帶韌勁，越嚼越有麵粉香

可惜的是以蒜蓉包為名，卻是只有十分淡薄既蒜香，真係要好用心先感受到xd

Peking Duck Pizza

我幾滿意呢個中意合壁既配搭XD

雖然可以話食填鴨都有餅皮啦，但佢既質感係乾身帶粉，軟稔有麵粉香

呢個pizza就係乾粉重焦香，有韌性，咀嚼下有麵粉香……仲要係香脆可口的

醬汁味道同平時食北京鴨冇咩分別，佢呢度既鴨肉味道都夠香

同埋佢係肥皮既，我就一定連佢脂肪食，油香滿溢真係溶係個口到架

Sloppy Giuseppe

辣肉碎佔量不多，辣得黎好香口而唔係嗆既

加上佢係偏瘦，唔多脂肪，食完都唔覺油膩

表面有點芝士，焗後帶有焦香，半溶更加惹味:^)

批底脆口，底醬微酸，令整體感覺愈是清新開胃

Salad

隨Pizza附上既係一碗沙律

蔬菜色彩繽紛，爽脆新鮮

配上黑醋醬，甜甜酸酸，清新夠開胃，稠度剛好係附係多水分既蔬菜上

Tiramisu

mascarpone cheese既芝士味甚是香濃，但感覺唔會好膩

質地幾幼滑，輕綿軟柔

手指餅層帶點濕潤，咖啡香氣頗重，但唔會太苦澀，個人認為係算易入口的

Chocolate Fudge Cake

朱古力味道偏甜，香味係幾濃郁既

蛋糕體都係朱古力味，但甜度就一般

感覺算係濕潤既，同時佢又會有少少油膩感，或者又係兩睇啦

服務本身係覺得幾好架

server親切又用心，成個感覺係幾cozy

同埋睇到有server同客人推介食品既時候唔係一味死推自己講

係有問有答、有講有笑咁，俾人印象真係唔錯

只係可能客太多，人手唔係太夠？

有時叫人真係等好耐都冇咩人理

同埋食物又係等左好耐都未上，請職員幫手跟一跟都係慢速度

感覺都幾失望

因為我地係leisure食，但如果係放飯既話一定唔會等得切

都係果句啦，收錢又真係幾快既……效率真係有d……