RBTea-回憶中

仙踪林呢間台式Cafe相信不少香港人都聽過

好多年前成日仲搞亂左仙踪林同仙跡岩XDDDDDD

太子始創分店之前結業後就覺得兒時回憶好似被消去了:^(

好彩佢而家開番RBTea，都係台式Cafe，只係食物就係新式既

例如係吐司、鬆餅……

先前路過都冇入到去試，今日終於可以一嚐滋味:^d

辨認座係用左仙踪林傳統兔子造型

不過我覺得真係太細，個號碼就更加細

職員送餐既時候好難睇得到，如果搞得耐又有機會令到顧客不耐煩

環境合格既，餐廳雖然地方不大，座位又唔少

但佢每個位都有適當既空間，加上枱間既隔離都係合適既，坐落都舒服

有點美中不足係……我真係唔中意椅背係縷空，放唔到私人物品

餐廳走田園風，周邊既裝飾都好吸引眼球

見到呢一兩年幾興既玻璃球園藝（？），掛哂上去做裝飾，好得意xd

下次去我一定要坐下全店只有兩張既雙人吊椅先:^00000000

鮮果脆香鬆餅　$88

一送到上黎，嘩原來咁大份:^00000000

話說我係食左重量級正餐先去食甜品，點知原來又係勁野xdddd

賣相色彩繽紛，感覺好吸引呀，唔講咁多，食左先算！

水果款式多樣，香蕉、奇異果、西瓜……食落感覺新鮮多汁:^0

黃桃片味道唔會太過甜膩，並非係一食擺明係罐頭糖水浸果種

中間有一球雲尼拿雪糕，講真本身唔知佢係Mövenpick既出品（係番到屋企上網見到

只覺雲尼拿味夠香，而佢香得黎係自然香仲要冇膩感，好清新

見到雪糕有一粒粒既雲尼拿籽，就自然明白點解味道可以咁天然

因為佢唔係只靠人工香精去造味既！

雪糕質感細滑，綿柔既感覺仲有幾分似軟雪糕

其實我唔係咩鬆餅專家，但我中意食外層微脆而內層鬆香可口既窩夫

太硬脆刮哂口或者太稔軟又濕潤既我就麻麻啦

呢個一睇我就驚佢係伏，因為面頭有咁多食材舖哂係度，水分重到冇可能唔淋啦

用叉拮開，點解好似塑膠咁分唔開既？（熟既就知我覺得用刀好煩，盡量唔用

好啦終於界到一塊出黎，入口……

咦！又幾脆喎，咬入去個心仲係鬆軟既

仲要食入口感覺紥實唔係好似風咁，亦都有好重鬆餅既微甜麵粉香氣:^0000000

跟手我就扮偽文青係度hea時間（扮個偽既，堅慘xd）

放到凍左……食落去仲係外脆內軟

配上朱古力漿及焦糖漿增添甜香，整體真心係覺得唔錯:^)！！！！！

完食冇難度:^)

黑糖鮮奶咖啡　$38

記得細細個果陣呀媽有時會帶我去食下野飲下奶茶

以前飲開芋香同胚芽奶茶

但見餐牌冇呢d選擇……

想揀熱果茶，但職員又話冇咁多煲茶既機器（？）

要搞好耐，同埋已經有幾個客落左單要做左先

結果……我就點左呢杯（講真我中意茶品同埋無奶無糖既咖啡多d……

味道始終偏甜，黑糖既香氣好重

只係奶味真係太過濃郁了，我會中意咖啡香濃少少既

一杯既份量都算多，咁都算對得住個價既:^0

印度皇-份量足

下雨的日子

去左上環一間想試好耐既印度菜餐廳食飯:^)

星期一至五有Lunch Buffet，價錢實惠$88+10%

只係今次無緣一試，唯有食單點啦:^0

餐牌感覺似曾相識

原來係深井咖哩寶同公司既:^0

食過深井咖哩寶都幾好架，所以頓時對呢間有些少期望:^)

環境燈光幾光猛，衛生情況大致上一目了然，都乾淨架

座位闊落，坐得舒適

枱椅隔得夠開，夠位出入同有少少私隱（做buffet太擠逼就危險d

餐湯　$36

睇樣係忌廉湯既色水，但稀身又唔會好重奶味

飲落仲有少許辣度同黑椒香氣，作為頭炮唔會太濃重

芒果酸奶　$36

我好中意飲酸酪，好似芒果乜乜乜……

呢度既芒果酸奶味道唔會好假好人工，飲落清新有果香，唔係一味死甜

不過失左策冇走冰，本身都稀身，最尾淡到水左/___>

雜菜咖哩角　$48

一客四件，都算抵食，事關足料既

外層硬身，夠香脆，係微微酥化又有麵粉香

內層未食到餡料，已經好重香料香氣

入面都係大路野，薯仔粒、雜豆……

佢保持到粒粒分明唔會爛茸茸，食落有質感分別唔係一堆泥蓉:^)

不過佢一個已經幾大，仲要入面餡都係飽肚既，最好就同人分擔啦

羊肉卷　$92

老老實實我以為佢係好似Burrito果種捲

原來係將羊肉整成卷狀去燒

烤過既外皮帶有焦香，食落更惹味

仲要用個鐵板熱住佢，唔怕一下子凍哂會太重羊羶味

肉質係鬆身既，唔算好散碎，肉香濃郁

食落好重香料味，佢混左入去羊肉入面，帶點香辣

整成卷，羊肉唔會好似平時咁肥膩咁多脂肪，比較輕盈

加少少檸檬汁酸酸地，清新解膩少許

椰汁咖哩牛脷　$88

呢個真心要推介，但似乎唔係常規菜單

可能去同公司旗下既餐廳就會搵到

平時食開牛舌都係貴一貴又少到兩下冇左

呢道菜一上桌我都不以為意，翻黎睇睇……嘩！正點:^000000

牛舌全部係厚切足本放送！塊塊都起碼一厘米厚，仲要最少有五件起頭

牛肉肉香十分濃郁，咁厚身竟然係唔老唔韌

咬落不知幾爽口幾香！！！！！

咖哩有兩款揀既

我揀呢款係瑪沙拉，辣d既仲要有少許蕃茄既酸味，稠身有少似果泥

但佢有一款冇顯示個辣椒仔標示，睇相個樣都係淺色稀身點，大概重於香氣而非辣味

碎肉餡餅　$34

餅身係好重麵粉香，嚼咬下更散出微微甜味

烤過既外皮乾身焦脆，咬落帶韌勁

入面夾左d碎肉，唔肥膩，瘦肉碎有點濕潤的

只係呢款食落稍為狼狽，一邊食都要提防肉碎掉出

餐後口香品

用餐後老闆拎黎既，全盒咁個樣

好多印度菜館都會有

佢係有幾款俾你清下口氣既食物，類似香口膠但佢應該天然d

不過我食唔慣就冇試到了

Levain-肉桂香

話說行行下Nightmarket就想食點甜

宵夜決定左就係佢了

以前試過Levain既包點，係貴過平時但質素都值既

香辛蛋糕

份量都幾多，本身睇樣唔覺，但買完拎上手，原來好襟食！

蛋糕外層帶脆，微焦既味道有少許苦香

蛋糕內層係想像不到既濕潤好入口！！！！！

食食下真係諗起聖誕，睇名以為係果子麵包果種紥實乾身既感覺

橙皮香氣清新得黎唔苦澀，果香濃郁可口

肉桂味道徐徐散發，中意既朋友不妨一試，真的不錯:^)

Fusion Deli-三文卷

出到去海港城唔知食咩但又坐唔定……

經過Citysuper，裝修後熟食部搬到超市外面

要Grab and Go就更加方便省時:^D

見到好多熟食款式都好吸引

單單係麵包類已經係令人眼花繚亂

除左今次食既卷餅，仲有魯賓三文治都係食材滿滿好不吸引！

一旁既肉食同炸物就更加讓人垂涎……

好啦唔好FF咁多，餓了，食左先算:^)

煙三文魚卷餅　$56

外皮青綠帶蔬菜香氣，可惜澀味十分重而刺激

職員幫忙烘熱後，交到手上是溫熱既

個人中意熱食，因為佢入面內藏mozzarella芝士條，熱過半溶時芝香突出

內裏還有一大堆新鮮爽脆既蔬果，色彩甚是繽紛

煙三文魚烘熱後都仲未係熟透，仍是誘人既橙紅色

薄身不膩，有著燻香既三文魚味道

一份既份量剛剛好，唔會吝嗇得宛如吃掉空氣，亦不會豐富令人太過飽滯

金蒂餐廳-菲律賓

假日閒來出外食個……Late Lunch……Tea？

隨便啦，總之就係食下野xd

係灣仔一帶兜兜轉轉

最終搵左呢間菲律賓菜餐館落腳:^0

環境係Bar既感覺，周圍燈光都係昏暗既

但佢地有卡位，而且坐得都舒服，空間足夠

牛肉生菜包

話就話係菲律賓菜餐廳，其實只係主打菲律賓菜

都有其他地方既菜式選擇架:^)

我地揀左呢個牛肉生菜包做開頭

牛肉餡料幾足，肉絲脂肪不多，沒有多餘膩感

加上有洋蔥、青蔥及九層塔，香氣清新吸引，同牛肉都幾配

不過調味真心好奇怪，係好似食通心粉既味粉，加左肉碎果隻

蓋過左牛肉既肉味，搞到好似淨食味精味粉

生菜算爽脆，但睇色水有少許黃，俾人感覺唔多新鮮

份量係夠既，我諗至少包到五六件，但講真……唔推薦

泰式炸豬手

上到枱黎，真係堆到成座山仔咁:^00000

本身以為係配料太多，點知翻開先發現入面係好多豬手肉！！！！！

講下佢豬手先，炸得十分香脆，仲要係唔會覺得好油膩

脆皮附有膠質，有部分係帶脆香口既，仲有少少係膠狀帶黏性

豬手肉就熟透既，而肉質係實身至有少許硬

佢出菜果陣已經係起哂肉，只係擺番個形，連骨，靚仔d咁

配料有洋蔥、蕃茄……感覺清新可口，甚至有點爽脆帶水分

醬汁係稀身唔會膩口，酸酸辣辣既味道開胃又解膩

醬汁既份量亦控制得宜，唔會浸軟哂脆皮:^)

菲律賓海鮮燴飯

呢個可以預兩個人分黎食

海鮮料係足既，有青口、魷魚、蝦……，又冇雪藏味同腥味，好易入口

飯粒係微黏，同埋係碎碎地，好似濕炒飯

話明菲律賓燴飯，我地都冇預期用既米係意大利米

但佢用既係一般香米，吸水力不夠高，吸到少少汁就開始發脹濕爛:^(

飯底係用左蕃茄汁去調味，但味道係好淡好淡既酸甜

基本上整個飯既做法真心不討好了，我都唔會推薦呢樣

若論及海鮮料我係俾佢合格至滿意既，味道方面就適合唔想食濃味既朋友xd

Ruby Tuesday-香辣骨

今次係最後一次有Membership用既時候去Ruby Tuesday:^)

有個朋友一直都話想試下，最後機會一於三個去大食一頓

Spicy Barbecue Fork-Tender Ribs（Full Rack）

朋友中意食辣，加上先前已經試左Classic同BBQ味道

咁今次試下香辣味都不足為奇啦XD

三個人又唔想再食拼盤，我地就選擇要全份既豬肋骨

豬肋骨肉稔身易切開，外層係烤過既焦脆感，香氣十足

由於佢係慢煮既烤焗方式，肉係全熟但仲有肉汁

咬落唔會太韌，肉香亦十分充足，流竄於口腔舌頭間

醬汁稠身，辣度只係一陣子既

感覺唔會太過人工，辣味自然，麻感不大

薯蓉外表乾身，調味得宜

細緻滑口重薯味，食多d都唔會話滯

加上有少量蔬菜伴碟，算係解下膩既清新泉源:^0

Steak and Seafood Combo（Lobster and Scallop Mac'n Cheese）

又一Heavy之作:^0

朋友嚷著要試牛排，咁就順便點埋一路想食既芝士通粉啦！

牛排係八安士既，叫五成熟都係黎左七成:^0

牛肉油香甚濃，調味更帶出肉香

肉質稔嫩，中間係滿滿既肉汁，切開後油份及肉汁徐徐流淌

焗薯牛油香真係超濃，不過相對地就油膩左d

好彩佢有軟滑既酸忌廉清一清

芝士碎同煙肉碎完全係增添香氣既加成，同整體感覺好配合

焗薯既外皮微韌，有焗後既焦香

薯心既薯香十足，粉得黎好細緻，食多少少都唔膩

Mac'n Cheese好重芝士香，特別係佢夠熱就仲吸引

龍蝦肉同帶子肉其實都唔算少，係合格架啦，又冇雪味

加上芝士去提味，蓋過腥味又更帶出鮮甜

通粉部分唔會太水，食到底都係冇濕濕爛爛既

夠實身而不會過乾，配香濃既芝士已經好滋味

Double Chocolate Cake

朱古力蛋糕既感覺酷似心太軟

但佢係溶岩蛋糕，係蛋糕中間既洞口有朱古力漿

朱古力蛋糕外乾內濕，乾脆既外層可以沾上濃郁朱古力漿去增加濕度

濕軟易入口既內層朱古力香氣濃烈

雲尼拿雪糕香甜細滑，奶滑濃郁

而且夠凍，唔會上到枱已經溶哂（Y）

淋上既莓果醬係稀身既，酸中帶甜，果香濃郁自然不人工

酸甜既清新感覺好適合成個甜品，因為本身朱古力、蛋糕同雪糕都係有少少膩既

果醬既清爽感覺就可以好解膩

Blondie

呢個係我先前已經想試既果仁蛋糕

佢係有朱古力粒同果仁碎係入面既，外層係硬脆香口，老實講應該叫佢做批

甜度係偏高，另外有d韌度，有嚼勁，但不黏牙

成個感覺係實身又好濃重既，難免會易飽滯，同人分享就好d

雪糕都係雲尼拿雪糕，香滑可口

如相中所見佢係夠凍冇溶到係碟，個心都唔係結哂冰果種

焦糖糖漿帶焦香，微稠微黏，甜濃

幸好係佢用量不多，只係稍稍點綴，加添香氣

整體黎講唔可以話佢好甜膩既

大都烤鴨-去油膩

一直想試下呢間係K11既大都烤鴨

但好難約到一圍人咁食片皮鴨

有日同呀媽諗住再睇下佢地既Menu價位

見到原來係有細份量既片皮鴨選擇:^0

咁得啦唔好諗，去馬！

茶品揀左龍井

老老實實我就唔識品茶既

但佢味道夠濃而且好香，苦得黎幾清，為之後既肥仔裏做好準備:^D

片皮鴨（半隻）

色水啡中帶紅，外皮香脆可口

重點係佢稍泛油光，但食落係完全唔會覺得油膩既

其後Instagram一位朋友指出係片走油脂層既新式做法

因此係只嚐油香卻不見脂影XDD

鴨肉濕潤軟稔，肉香濃郁又易嚼咬

配料都好特別，佢地係有哈蜜瓜同心裏美（都係嗚謝IG朋友XD

哈蜜瓜水分不多，但食落清甜爽脆，連同鴨皮食都幾解膩

心裏美既顏色感覺高雅，微脆，味道清淡，又係去油膩之選

所有配料都切成相約長度既條狀，包起黎好方便

餅皮十分透薄，但包埋又唔會話好易穿爛

帶有少許韌度及水分，不會黏口難嚥

咀嚼之下會散發出陣陣麵粉香氣及甜味

醬料係可以任加既，不過餅皮同配料就要加錢先可以添

胡同牛肋骨

賣相又幾得意，唔只有肉塊，仲有番條骨擺盤（Y）

牛肋肉大塊厚身冇失場，睇得出真係大大方方唔慳皮:^DDDDD

肉質稔嫩不韌，本身仲擔心佢塊塊都>1cm會唔會韌到咬唔開XDDD

顯然是多慮了，入口即化……唔係！係連夾起都要用湯匙輔助

肉香非常濃郁，但脂肪不多，唔會食到成口油

筋位係即溶既啫喱感覺……邊打邊回味，真係好邪惡xddd

醬汁鹹中帶甜，雖然係稠身，但份量剛剛好，反而更帶出肉香

整體黎講呢個真係我心水，如果再去大都，都一定會點呢道菜！！！！！

（順帶一提，雖然唔記得個實價，但係佢係抵食過平時食韓式炆牛肋骨平均價

荷香包鴨飯

Menu有得揀份量既，呢個既大小其實等於大粽:^000000

我諗一個就大約一隻手掌大小（計埋手指唔該XD）

講真賣相就普普通通，好平實既感覺，諗兩諗仲似糯米雞XD

一打開係滿滿既飯，荷葉香氣撲鼻而來（Y）

中間有d鴨肉絲，夠肉香又冇脂肪位

加上充分吸收荷香既飯粒，粒粒分明，有少許嚼勁

美中不足既係醬汁真係少左d，對我黎講味道唔夠濃，如果中意清新既我諗會適合閣下

驢打滾

講樣傻仔野，其實我好中意以前果d宮廷點心，所以一直話要去北京食-__

見到冇理由唔試既

賣相……老實講唔吸引，感覺好參差，好似係半溶既甜品上面鋪滿黃豆粉扮冇事咁

味道係可以既，糯感重，煙韌可口

紅豆蓉甜得黎幾清新，份量同調味得宜，不覺甜膩

熱豆漿

豆味尚算香濃，稠度一般

冇咩甜味所以唔會飲到膩口

服務都係ok既，至少佢地係會問過你先而唔係自己行動

例如包鴨飯係要拌勻既，見我地無從入手佢地會禮貌問下使唔使幫手

環境就幾舒適既，兩個人被安排坐到卡座

寬闊鬆動，又有私人空間

衛生方面都做得不錯，肉眼所見係冇咩垃圾污漬咁

德興-有特色

話說德興酒家個名真係笑左好多年

因為屋企人個名好似，一提起就會笑係咪佢開架xddd

但抽左咁耐水，其實一次都冇試過

係觀塘諗唔到食咩好，又想食熱辣辣既食物……

邊爐啦唔好諗咁多xddd

收費表分項詳細列明，清清楚楚一目了然，冇巧立名目搶錢之嫌

咁今次就係食$160／位既價格（另加$9醬料拼盤）

Menu其實只有右邊係任食既，左邊係要加錢

不過選擇都幾多架，單是肉類同菜類都有好多種

醬料拼盤

呢個係另加錢既，講真個人認為幾抵玩，唔加錢就只有豉油用

呢個拼盤係開始任加一次就會收走，有需要時叫職員拎黎又可以任加

其實佢個盤都好大，收走冇咁阻位

芫茜蔥花呢d唔特別講，但醬汁就有d特別既

佢係有芝麻醬、酸辣醬、紹酒、魚露、XO醬、陳醋、柚子醋等等任玩

當然一次過拎多幾個小碟裝好哂就唔使下下搵人拎盤黎加:^)

湯底亦係有多款選擇，橙色果幾款就要另外加錢既

雪耳雪梨蘋果鍋

諗住話想打邊爐又唔好太燥熱，所以就揀左呢個似係健康少少既款式

唔使驚佢好甜，會搞到邊爐料都有甜味好怪異

佢只係有淡淡既清新果香，幾乎係嚐不到甜味

連湯底係有d豬肉條既，肉味幾濃，唔算好肥膩

仲有少少軟肉位咬下，我個人幾中意:^)

泰閣-咖哩香

呢間係隱藏係精品酒店既上樓泰菜餐廳

成日行過向上望都會見到，入面仲好似好多客咁

次次話下次食下次食，結果一直都係冇去到

今次去到油麻地終於試得到啦:^)

環境幾舒適架，我地仲有窗口位坐

從玻璃望出去有都市景觀，重點係當日唔會太過曬，有d日光夠自然

泰式豬脾飯

豬脾份量係合格既，仲有少少配菜，如冬菇及滷蛋

豬脾肉質稔嫩，肉香濃郁但不膩

沾上一旁既酸辣汁，感覺更是開胃去膩

滷蛋夠哂入味，蛋白好彈牙，而蛋黃仲帶微香既

醬汁稍稠，味道不濃，撈飯都唔會好重口味

紅咖哩豬軟骨飯

紅咖哩味道十分香濃，稀身食落唔會好油好稠膩，撈飯一流

辣度不高，反而係帶點椰汁香同甜味

豬軟骨不肥膩，軟稔易嚼，份量亦足夠

一旁還附有少量伴菜，多款式，有西蘭花、粟米仔同車厘茄等

唔係炒菜冇咩油份，食落都清淡，可以中和番咖哩既味道

黃咖喱牛腩鍋

上桌放低已經睇得出下面係墊起既

牛腩佔量算係合理既，另外有薯仔、車厘茄等配菜

咖喱都係稀身既，但呢個就濃味d，同埋冇咁甜

牛腩肉質綿軟，稔身唔會乾柴，脂肪部分不多，食時冇咩膩感

呢個都係好適合撈飯既

用鍋盛起，熱力冇咁易散走，一路食到最尾見底都仲有微溫

椰汁西米糕

椰汁味道香濃，食落有少許鹹度

西米粒綿軟又未至於散爛，整體黎講都ok既

椰青糕

半透明，椰香清新非濃郁類型

咬落爽口有如大菜糕，沒有甜膩感

千層糕

糯感甚重，綿身黏軟，甜度適中

不過咀嚼間沒有黏牙，整體都係清新既

泰國紅花茶

同平時飲既洛神花茶其實係一樣既

酸甜解膩，有種開胃清新既感覺

服務態度還是可以的，但效率速度就一般般

人手唔多既，另外係店舖間隔問題

有時揚手都要等一排先會有職員睇到

最後我地都係等到職員經過先方便叫佢地

恭和堂-清涼喉

川貝枇杷膏

同龜苓膏質感相似，都係啫喱狀既

味道帶點甘香，但材料又唔見列明有甘草:^0

感覺涼喉，食完果下係舒服左少少既

桔梗茶

清甜得黎有甘草既微甘

因此飲完甜都唔會起痰同埋膩口:^0

問題出在佢地既膠樽係好薄身既，注入熱飲後係扭曲變形

去到個地步係好似崩左一角咁，樽蓋都難扭開

金拇指米線-重芝味

先前同朋友經過，見到門口宣傳既食物相賣相幾吸引

話要搵日黎試一試

結果我係同屋企人去左食晚餐xdddd

Menu選擇都幾多架

除左西式既烤焗餐點，仲有店名都寫明既主打－－米線

芝士焗青口

醬汁係粟米汁，其實姐係罐頭湯果種

色水就唔係好吸引啦，透明黏液咁，搞到屋企人以為佢未熟xd

表面帶點烤焗後既焦香，醬汁香甜不膩

青口肉軟稔唔會太過乾韌，冇雪味

大小都合格，係平時未煮咁啦，唔會縮哂水

芝士粟米海鮮焗飯

醬汁同焗青口同出一轍，都係罐頭粟米湯

表面既芝士份量剛好夠牽絲，帶焦香而無苦味

海鮮都係魷魚鬚呀蟹柳咁啦xd，但份量唔少既:^)

飯底濕度得宜，未有濕爛，都叫易入口

豬頸肉炒飯

呢碟飯既份量幾多，本身冇預到係咁既，上枱都稍有驚訝（唔係驚食唔哂xd

豬頸肉軟稔香口，肉味夠濃

不過就唔係爽口既，外層帶有少許脆度

飯底偏濕，有時候會黏成一團，炒得不夠乾爽

另外既係呢個炒飯真係好油，係夠香既但食冇耐就膩，同埋碟底都會見油

菊花蜜

清甜得黎唔會太重味，甜度適中，飲落幾舒服