Dazzling Cafe-淺粉系

是咁的，今日同朋友既年終約會提前舉行
食完個正餐，夜晚八點幾去到Dazzling竟然仲有最後幾個籌
或者果晚係星期日晚加上臨近冬至要做節，其實連條街都唔多人行
朋友仲話好似凌晨係尖沙咀咁XD
結果有幸見到係呢間開業數月，仲要派籌等位既咖啡店工作既台灣過江女僕（誤

環境舒適又優雅，不過又唔會叫人拘謹

主要採用天藍、粉紅及白色呢類淺色粉色系，一眼看去有放鬆休閒既感覺

坐落於商場裏頭，卻是另一世外桃源

可以悠悠倚坐而不會太過嘈吵

服務甚為貼心有體

如果佢地係有事要通知你或是跟你溝通，佢會靜待我地傾完自己野先

唔係話粗聲粗氣又要黑面話你阻佢進度果種

佢地講國語非常流利，朋友指因為不少直情係台灣人黎既

感覺好台灣在地XD想真係去台灣試下XD

聖誕限定蜜糖吐司　$120

限定推廣至12月26日，每日限量30份
本身店員話影完相佢會黎幫手切
我地坐出面既，結果就叫極冇人，可能睇唔到？都係自己動動手吧！

也許因為我地選擇「較脆」版本，烤焗後色水比較深色焦黃
吐司入口乾脆更有焦香，即使係配搭雪糕同蜜糖呢類水分濕度高既食材，都唔會濕淋發脹
同埋佢既乾身，只係指唔會過份吸水至淋爛
麵包心還是軟熟綿密既，唔會話好難嚥
中間係內藏吐司切塊，金黃吸引，配上清潤蜜糖點綴，濕濕口更易嚼
呢度既吐司盒挖得厚薄適中，冇穿爛又唔會厚得要浪費掉，外皮唔算韌到要直接拋棄

中間既雪糕原本係草莓味，只係當晚店員指該款味道售罄
雲尼拿味同朱古力味……嗯……都係前者似乎更配合整體食材配搭及賣相造型
雪糕滑身微黏，甜度不高，入口唔會話好膩
雖然唔見有雲尼拿籽，但味道都係偏向自然，不是十分人工

賣相同薑餅屋相似，富有節日特色
屋頂有啫喱糖，只係味道同吐司唔夾，都係分開食保險D
仲有士多啤梨雪人，酸甜果香降低忌廉膩度
聖誕樹係威化筒加糖膏，不過勸中意食裝飾既朋友放棄佢XD
因為個筒係濕到韌左皮，糖膏黏得實實又整唔走既，我地都係保持佢原貌算啦:^)

薑餅人外貌幾可愛既XD

只係個人認為佢既薑味……基本上我唔覺有

曲奇脆身，少甜，只要撥走上層大部分糖膏就唔會覺得甜膩

整體黎講，最特別就係個樣囉
其實不少人係貪樣靚用黎影相先會揀某款食物，然而其內涵反而被視為加分點
老老實實，唔只食物呢一方面……何為本？何為末？
聽朋友講其他口味既吐司係不錯既，我會揀普通版，平D而味道配搭又會更合心意

金莎榛果可可（熱）　$48

份量比想像中多，唔係兩三口解決得了

面頭有朱古力粉同果仁碎，入面真係有D金莎味喎:^0

泡沫叫做綿密既，氣孔算細，只係中間部分可能稀薄少許？

可可入口順滑，唔會有積存係底而上層淡味既情況

香甜可口，感覺不算過膩，配上少許果仁碎去增添香氣則更吸引

一旁既餅乾係類似消化餅，不過就重麥香

脆口細緻，甜度中上，只係又唔覺話係極度重要既亮點

香草抹茶歐蕾（冰）　$45

抹茶味清香自然，甜度偏高但不叫甜膩

順口滑身，只係抹茶部分不時沉底分離，要混合左先至飲

否則味道會一時重奶香一時重抹茶味，不夠一致

冰粒係偏大既，我覺得可以少冰D

加上而家冬天飲過冰既對身體腸胃似乎不太合適

總觀各項，我覺得呢間真係可以一試架

係香港黎講叫做唔錯，多款揀而味道都可以

雖然都係好似咖啡弄咁，要每人一杯飲品

但吐司質素性價比係偏高既（香港而言啦

服務、環境及氣氛都不錯，係叫做抵食既（唔係指佢好平呀xd

另外……好似見到謝曬皮XDDD
個樣幾QQ既:^)

Ringer Hut-日麵王

放學十個肚餓，要食下野醫肚既:^d

剛好晚餐時間……嗯未食過呢間日本菜喎

係門外見到冬日鍋物宣傳，喂！正野！熱喎！

結果睇過餐牌……咦原來佢係主打麵食既

一場黎到就試左佢既招牌先啦:^)

長崎香脆麵（大）

日式脆麵係香港似乎唔常見，今次見到覺得幾特別所以要試試先:^)

麵條香脆不油膩，佢係偏向幼身，有像蝦子麵

比想像中易嚼易入口，咬落仲有淡淡麵條麥香

面頭一如其他款式……都係一大堆一大堆蔬菜，突然健康下xd

醬汁透明稠身如芡汁，不過撈埋麵食又唔係諗到咁漿黏

可能係因為蔬果幾清新，仲保有點水分可以潤潤口

黏稠及爽脆之間，佢叫做拿捏得到平衡點

長崎雙倍野菜Champion

呢款曾獲日本朝日電視台第一屆麵類總選舉既一位！

聽個名好似十級健康咁:^0，一份有480克蔬菜，滿足衛生署建議既成人每日攝取量

講到呢到，令人不禁聯想起港島一間有咖哩既小店都有類似既食品xd

上桌後先趁熱嚐湯，湯底雖說色澤濃郁呈奶啡色

但是入口清甜自然，並未有想像中油膩豐潤，店方稱係日本直送既

隨麵附上生薑同柚子兩款醬汁

前者薑味清香不嗆辣，後者酸甜頗開胃，但我覺得都係油左d囉/__>

四百幾五百克蔬菜完全係集合左成七款咁多:^0

感覺好似食左一年份量既菜（對不起地球，我愛吃肉……/___

最突出既都係包心菜，翠綠色感覺新鮮，菜甜味重

其實仲有蝦仁同肉絲，熟透既，冇雪味腥味，只係冇特別可以講既地方

麵條粗幼適中，還算帶有少許韌度及嚼勁，沒有煮至濕爛

只係未能吃出其麵香，單有流於表面既味道而稍欠香氣

Te Momento-主打茶

早在慕茶開店的時候已有所聞

就是四位女性合作開的一家主打茶品的餐廳

看到Instagram上有朋友去過，喜歡雪糕的兩位好友就不約而同地說要去

最後竟是一行四人，我、好友兩人以及Instagram主來到了

餐牌選擇實是不多，不過可以看出全是傳統茶品改良出來的

這麼多款口味，總是選擇不定

結果就點了很多甜品，目的是要一嚐店家的雪糕

環境就是讓人舒心的小咖啡廳

用色除了淡啡木感，還有純淨的白色以及清涼的薄荷色

在這裏坐坐，總可叫人放鬆享受寧靜一刻

話說同場遇到頗有名氣的Openrice用戶，女性的，名字不說了XD

Classic All-Day Breakfast　傳統全日早餐　$70

由十分豐盛的一碟開始，單看賣相已經覺得抵食過其他餐廳多多

香腸微烤至帶焦，外皮是脆脆的，內層肉稔易嚼，不肥膩

煙肉焦香味濃，不過肥脂部多不多，主要是瘦肉

多士烤得香脆，加點牛油香就更誘人

炒蛋不會過熟，蛋汁濃稠細滑，香氣郁厚

底下的一片方包就正好可以盛起炒蛋，就算蛋汁溢出也不浪費

蕃茄開邊焗熱過，但裏頭水分仍是多得一咬會滿溢，香草提香更減青味

蘑菇炒香，味道獨特突出，只是頗油膩

薯餅只有小塊三角形，勝在夠香脆，還有點薯味

沙律就是生菜車厘茄之類，但是加上橄欖油就總覺太過油膩不清

最後就是茄汁豆，焗豆稔身微粉，不是豆蓉的淋爛，調味可以更重酸甜

Rose Tea Molten Lava Cake with Rose Tea Gelato

玫瑰花茶心太軟　配　玫瑰花茶雪糕　$60

賣相精緻典雅，擺盤盡見心思

玫瑰花茶主題的話是真會灑上玫瑰花瓣，幽香飄逸

心太軟既流心十分澎湃，稠度適中如焦糖漿

玫瑰香氣淡雅薰香，重點是自然不人工，而非讓人卻步既香精味

外層薄身帶脆，卻不是乾硬，微微焗過既焦香更添風味

雪糕因店方著重茶香而減少加奶，質感未有平常般順滑利口

卻是茶香濃郁，同時清新不膩，令人回味

一旁點上的草莓果醬酸酸甜甜，味清自然，跟玫瑰香也很搭

Earl Grey Chocolate Molten Lava Cake with Earl Grey Chocolate Gelato

伯爵茶朱古力心太軟　配　伯爵茶朱古力雪糕　$60

這邊奉桌也是心思十足，雖然未及我們理想，但可見用心

伯爵茶配上朱古力，感覺是甜香濃郁，兩者毫不抵觸

心太軟固然是非常成功，流心滿滿的叫人滿足

一切開是散出濃郁朱古力香氣，隱約一絲一縷的茶味清香

至於雪糕一邊就是細密滑香，甜度剛好，反而比心太軟更清

配上兩條果仁朱古力百力枝，脆脆的剛好形成質感對比，沒那麼膩

Kungfu Tea Waffle Paradise with Kungfu Tea Gelato and Osmantha Tea Sorbet

功夫茶繽紛樂園　配　功夫茶雪糕　及　桂花黃茶雪葩　$70

上桌才明解是將窩夫條斜切反起，擺成心形的模樣，頗有創意

先嚐窩夫，外層薄薄一層是帶著酥脆感，拿上手沒有油膩

裏頭是濕潤香綿，有如熱香餅的質感，紥實的

用上功夫茶，茶香清新深邃，甜度不高就更突出茶香

但是一旁的草莓果醬就有點不搭調，酸甜味道跟茶味是有著大落差

功夫茶雪糕當然也帶功夫茶的沉厚茶香，不太甜的

質感有點冰冰，不算細滑瞬溶，但可以接受

至於桂花黃茶雪葩裏頭是真材實料夾著大量的桂花

因此入口不滑溜，有點纖維感

不過甜得自然清新，口味是可口怡人，吃不膩

Jasmine Tea Waffle Paradise with Honey Jasmine Tea Gelato and Genmaicha Tea Gelato

茉莉花茶繽紛樂園　配　蜜糖茉莉花茶雪糕　及　玄米白茶雪糕　$70

擺盤跟上述的雷同，不過就是口味上截然不同

茉莉花茶茶香本比功夫茶淡清雅緻一點，可算是少女情懷

窩夫沒有太大差別，就是蛋糕的鬆軟綿彈感覺

茶味濃郁，當中還帶少許麵粉的香氣

蜜糖茉莉花茶雪糕還是滲著清香，甜得不膩

蜜糖的甜味沒有掩過輕微一捺的茶香，反是互相配合，更顯特色

玄米白茶雪糕也是清新一派，手工雪糕的冰感還需改善

幸好茶味清淡，配上一旁的焦糖漿同吃都不覺甜膩

看到有雪糕車在店內，好奇一問

原來可以外租至宴會場地，例如西式婚宴聚會

所之我們馬上叫友人快點結婚，緊記要租這部雪糕車xddd

Make It-整呢樣

話說Langham Place以前賣乳酪雪糕既位置

而家已經轉變成另一個品牌既甜品店

佢地都係有售賣自由配搭食材既雪糕，更可選擇製成雪糕花！

只係現時都己踏入冬季

寒流之下，我就實在無意進食太多冰凍食品

在店外既蛋糕櫃徘徊一會

好啦！就試下呢兩款甜點啦:^)

榛子忌廉蛋糕　$30

賣相甚是美觀，感覺高貴卻不浮誇

表面既朱古力片帶有金粉暗紅，雅緻但低調，與紅莓色調相配

外層為濃郁朱古力漿，甜而不膩，可惜是未達我喜愛既苦香層次

有點像薄膜包裹住裏面既忌廉，保持濕度

邊緣沾滿粗幼不一既果仁碎，脆香不膩，更添果仁香氣

內部感覺紥實，氣泡分佈平均緊密，卻是有點太粗大

結果係毫不細滑既質感

榛子香清淡，不是十分甜膩，而忌廉自身香氣亦頗弱

紅莓慕絲蛋糕　$30

將慕絲塑形成為玫瑰花樣式，以金箔點綴

典雅之餘又配合主打商品雪糕花，一舉兩得

最外層比較粗糙，形造出絨面既視覺效果

入口酸甜有致，果香濃郁而不人工，不覺是藥水味

內層既慕絲較為細緻，香稔順口，甜度屬一般水平

中間夾有果醬餡，稠度適中，稍有溏心效果

不只是增添紅莓酸香，更提升整體濕潤感覺，入口減膩

蛋糕層叫做鬆軟既，薄身不濕淋，為重要一環

全因蛋糕既慕絲部分較上面既榛子蛋糕為多

亦未加入如果仁碎般有質感對比既食材

總體甜膩感會比較高，因此需要蛋糕層作平衡及緩衝

服務態度算不錯

人手不算多，因為要分人手去製作及看管店面

有時候人流多就難以照顧各個客人既個別需要

只係佢地都會表現出主動及關心

而非視而不見，側側膊既趕客表現

環境都幾狹窄，座位只有十個左右，而且係幾貼既

加上人手編排既情況，有時候用餐區弄污係未有人手清理既

今次有點可惜係我地堂食蛋糕

店方只有提供派對用紙碟……

老實講我寧願你就咁俾硬卡紙托底俾我算數……

因為整體感覺真係有點不搭軋-__>-

至於雪糕花，賣相都幾似模似樣不馬虎……

呃……我諗都要熱番先會想食……

Suzuki Cafe-紅豆飯

睇過鈴木既Menu就俾佢既石燒飯吸引左

咁我又係揀唔落手揸唔定主意既人，當然係想搵腳齊試多d款啦

只係一直冇親朋好友有意一試

最後都係拉左自己呀媽去食下xd

環境裝潢走清新路線，仲有可愛既小鴨裝飾:^D

我見過佢幾間分店，都係主要運用自然光

令人感覺舒適休閒之餘，雙眼亦不會過於勞累

其實坐得舒服已經係入門第一環，至少佢係合格既

照燒雞翼　$42

講真係唔抵食既，雞翼咋喎，五隻就要四十幾蚊係咩性價比？

不過呀媽想食到會講出聲，咁就冇理由唔嗌既:^0

雞翼大小一般，內部肉質稔香夠水分，未至於有肉汁但絕非乾柴

當然，佢地都唔係好似有用藥催化既特大雞翼咁驚人

照燒汁調味下鹹甜交融，加上白芝麻香，更是惹味

同埋佢既醬汁只係剛好沾滿，唔會過份漿口

一旁更有薯仔沙律作伴菜，冷而不冰，帶點爽脆

表面既木魚碎增添少許香氣，叫過得去

半熟三文魚紅豆飯鍋　$86

呢款就係最吸引我既菜式！！！！！

紅豆飯係日本不難找到，只係香港毫不普及，更會有人覺得好怪異

呀媽以前都食過呢間既，只係當時覺得調味濃重得過份，要用水沖淡

半熟三文魚都唔係半熟，上枱已是全熟程度

雖然未有濃郁三文魚香氣，魚油亦不多，但冇咩雪藏味同腥味就姑且放過佢地啦:^0

醬汁微稠，鹹中帶甜，係類似照燒汁既朋友，但似乎偏鹹一點

今次既紅豆飯底香口軟稔，仍是粒粒分明飽滿，唔會濕得淋爛

紅豆爽口，咬開有少少起沙，清甜不膩

配上醬汁既鹹味，交替之下卻不覺怪異

香煎鵝肝牛柳粒飯鍋　$92

聽個名就覺得用料十分高貴，只係有點罪疚

講真論及鵝肝……算係少食左，每次都諗起d鵝俾無良商人如何折磨……;^(

好啦入番正題！呢個飯鍋既飯底係普通白飯，唔係紅豆飯

個人認為稍為淋身了點，水分濕氣比較重

鵝肝煎過後帶焦香，油份外滲因而泛起油光

外觀有點參差，因為稔身易爛，比以前食過既更易散開:^|

入口油香濃郁，可是有少許苦味，很失望啊……

牛柳粒是有肉香既，不油膩，很少脂肪帶，而且唔會過韌，過關了

不過我覺得以上食材配上菇菌有點不搭調

或者係佢用既雜菇未係好配合到鵝肝同牛柳粒既味道

可能只係配上黑椒，淋上菇菌醬汁就已經足夠

田園沙律及餐湯　+$42

沙律感覺清新，配上微酸芝麻醬，香口得黎唔油膩

餐湯係南瓜湯，滑溜易入口，甜度低而自然

只係兩樣野都真係好細份xddd

榛子鮮奶咖啡及黑糖薑母鮮奶咖啡　+$42

前者為凍飲，香氣偏淡而清，不過個人認為佢打得唔夠細滑

後者味道完全不協調！！！！！

黑糖香氣濃郁，配上薑母清香，反倒有點怪異既苦味

品香樓-小食堂

終於食到聞名已久既石峽尾學生飯堂！！！！！

老老實實明明這麼近，但一個人去食好似好怪咁，拖拖下冇左件事

今次係完果科考試就即去食個晏，夜晚再考

好彩呢科有呢組人一齊，爛grade都感覺良好一點：^）

辣味羊肉炒飯

是日午餐選擇！

有點奇怪既係佢加埋仿蟹柳，仲要係細細個食好粉好甜果款

不過又係既，港式炒飯有時係咪都掉入去，特別係雜豆同蟹柳呢兩款料xd

先試飯底，入口頗香辣，甚至帶點麻辣，同羊肉好配合，且辟羶

質感偏稔軟，濕潤水分多，易嚼易入口

雖然唔係淋爛出水果種，但唔係我中意既乾爽飯粒

羊肉份量少，而且十分薄身又肥膩，羊味不重

只是羊肉價格也不便宜，炒飯價錢都係三十幾蚊，飯量不少，我也不會要求太多

京蔥牛仔骨菜飯

牛仔骨至少有五塊，份量算教人滿意了

因為都係三十幾蚊既餐，而家外面隨隨便便食，呢個價位可能只有三分二

肉質甚是綿稔，又未至於霉既程度，骨肉易離，食得不狼狽

蔥多得出奇，要知道現時買蔥都唔會好似細個咁平

十幾年前讀幼稚園時，經常同婆婆去街市，當時既人情味同疏爽，今天已難復見

經濟考慮畢竟主宰大家生活，物價飆升

即使係檔販想平想搭蔥俾個客，都唔係可以順手就算既事了

醬汁都係一般如豉油豆粉糖既味道，勾一勾芡

稠度剛剛好，沾上牛仔骨又可以均勻撈埋飯粒，而又不過水爛

菜飯不會過油過濕，亦無青味，呢餐……感覺似乎健康了一點點xd

南乳炸豬手

醉翁之意不在酒，在乎……

上述兩款都係開個頭咋xd，呢個先係我一直好想試既菜式

炸豬手外皮帶金黃，配上炸蒜，賣相甚是吸引

咬開香脆表皮後則是滿滿膠質，晶瑩剔透，黏香不膩

南乳醬汁稀身，味道十分濃郁，酒香突出卻不算嗆口

不過食得呢味就要預左冇咩肉又多骨，主要係食皮層及膠質

而且油炸過後，的確是誘人而香口，但同時會有點油膩

整體黎講，食物質素……個人認為叫還可以接受既

只係如果為「食」，我應該……不一定會再去，但有人一齊又係另一個講法xd

始終我覺得呢類型既食肆真係要多人去至會夠氣氛

另外，跟餐飲品只有兩杯，俾朋友飲我就冇試到

冇嚐過味，就算係俾左錢都唔會老作，亦都唔會吹到:^0

服務方面就有少許混亂，不時搞錯單號同座位

餐廳員工冇平時同行既少許串嘴感覺，亦未至於高價餐廳既待客服務

但坐係入面唔會覺得俾人催逼，員工都甚為隨和

環境就預左唔係非常乾淨一塵不染咁

我重申我有點點潔癖係接受到既:^0

同埋卡位佢上面有個吊燈，周圍都幾暗，好似有種打左燈既效果

上面既相都冇執冇處理過，其實我係一秒影完就快手食果種

唔會較角度又唔會點擺盤，但佢個光源就係正上方打落黎，識影既會影到好靚好高質咁

話明學生飯堂，真係成日都好多人好逼位，亦唔淨只有學生

如果午餐時段可能要等一陣，但上菜就唔係好慢既

Fusion Deli-香辣卷

繼上回既煙三文魚卷，今次係燒雞版本:^)

燒雞沙律墨西哥卷

今次既外皮就啱心水d啦:^)

上次既青綠餅皮味道有點澀，但而家呢個橙紅色既係香辣版

唔會太過嗆口，辣得黎係有酸香既，就好似莎莎醬咁

餅皮厚薄均勻，包得密實不漏，外層乾身但唔係難嚥既程度

一咬開就見到滿滿既食材包裹係入面:^ddddd

翻熱後微溶既芝士條搭著絲絲不膩既雞肉

雞肉調味好夠好入味，其實係同平時雞肉沙律果種既味道一樣

加上新鮮爽脆既蔬菜，食落毫無油膩感，仲幾惹味可口

咖啡弄-鹽糖鬆

同朋友食過正餐之後再戰甜品

黎到銅鑼灣，順便去試下台灣過江既咖啡弄啦:^)

話說開左咁耐，但唔想等位

同埋大部分朋友都話台灣本店又平又好食，香港差得遠

種種原因之下就一路都冇試過

今次可能因為係平日啦（雖然都係五點左右尷尬位）

等左半個鐘已經有得入座，不過都係限食個半鐘

餐牌外型幾特別，好似外國報紙咁

話說近年見到既餐牌設計都幾有特色、有創意

圖文並茂，吸引客人之餘又方便客人點菜，店方亦省去不少解答既時間同人力:^)

蜂蜜生薑茶

又來到冬天，我本身血氣唔係好順暢，經常會手腳冰冷

咖啡弄既然規定每人要點一份飲品

室外氣溫比較低，剛入店仲係凍凍地

因此直接就打開熱茶飲一版，不假思索點了這壺

上枱時職員發現有少許茶水不小心漏到盤子

即刻拎番去抹好先上枱，俾人感覺十分細心

職員亦提醒如要加水，飲到壺中至少淨三分一就要加

否則茶味會太淡，不好入口

迫不及待要一嚐薑茶暖暖身！

入口溫和不過激，雖說薑味非常濃香自然

但只會有溫熱清香及微辣，唔會過份乸口:^)

蜂蜜清甜不膩，調得均勻冇痴底情況，並且令薑茶更利口

隨手拿起一片隨茶附上既薄薄芝麻餅

芝麻香氣甚重，沒有膩感，甜度剛剛好

三塊既份量剛剛好，大概係飲一杯就食一塊咁

冰抹茶歐蕾

這是友人點既飲品，出於好奇，就算係冰凍既，我還是嚐了XDDD

抹茶味道香甜清新，可惜是淡了少許

冰粒都幾大塊既，會唔會係多冰搞到淡口左呢？

鹽味焦糖鬆餅

鹽味鹹、焦糖甜；果仁脆，忌廉綿；雪糕冰，鬆餅熱……

盤子裏正在上演一重又一重的味道、質感及溫度對比

鬆餅外層微脆帶香，中間似係雪芳蛋糕既綿密鬆軟

問題癥結所在……大抵是乾巴巴既感覺旁邊既配料

大多係濃郁稠身既，只有雪糕能夠加添少許水分及濕氣

也許我太重口味，兩三下手勢就用盡佢既配料

環顧四周，不少食客都未能解決全份

他們不時嚷著「好滯」、「飽到嘔」……

雖然甜膩感覺不算過份倒人胃口，但重覆而缺乏變化既鬆餅就顯得乏味了

Green Waffle Diner-香熱鍋

有時去銅鑼灣會經過呢個商場

其實都幾多野食架:^)

Green Waffle Diner開左都幾耐既，只係之前只係留意到窩夫，興趣又唔係咁大

今次係朋友搵我一齊先會黎試到熱辣辣既鐵窩款式:^D

Mac n Cheese Skillet

芝士香味濃郁，滑順可口，鹹度亦是恰到好處

通心粉已被浸透，係非常濕潤既情況下都沒有淋爛

當然唔會用平時al dente既準則去衡量，畢竟用料、煮法同用具都有分別既:^)

不過剛上桌時醬汁似乎不夠稠身，未能充分黏附通心粉

因此相中都係要另外舀起醬汁淋上

要食到一半，幾乎放涼既時候……

我最期待的畫面出現了！

其實都係芝士稍微牽絲

只係當你先前食到既都係稀身醬汁，就會自然不會期望太多……

雖然份量細，但食落好溜係十分易滯既

整體黎講係可以試下既，又唔係話強差人意

就係並未有想像之中芝士牽絲既澎湃景象，唔會抱過大既期望

Steak and Egg Hash Skillet

未食已經聞到好香好惹味既香氣，讓人不禁垂涎三尺

輕輕戳開放在滿滿食材上既半熟蛋……

濃稠金黃既蛋黃薄膜裂開，蛋汁慢慢流淌而下，誘人非常

入口蛋香甚濃，清新又不會過黏口，沒有蛋腥味順滑可口

肉眼粒份量不少，比我地想像中更足料，用料大方呢點令人滿意

牛肉粒熟透卻不會過韌，冇雪藏味腥味，入口亦不覺油膩

但我地不約而同都認為稍欠肉香，調味也不太足夠

薯粒金黃帶焦香，可惜係失去了脆度

濕氣水分過高，只有稔散既感覺

我地都好中意食菇菌，呢鍋入面用料未能帶出菇香，有點失望了

一風堂-赤丸麵

第一次食一風堂，竟然係食完Pizza唔夠喉直落XD

其實已經係味噌赤丸第一日開售既事

只係見月尾就完推廣，快快手打出黎俾大家睇下佢係點既樣XDDDD

睇相已經得（自己講:^)

辣豆芽

未有主食時就食下桌上既免費前菜，佢地整到個賣相有少少霉

辣度只係少許香口既程度，相中可見都係微微橙色

偏稔身，只有極少爽口感覺，不過都放得入口的

一風堂炸蛋

即是Scotch Egg，不過佢既用料份量同平時食既唔同

呢度係裹非常薄既一層豬肉

炸完十分香脆又不油膩，入面既雞蛋就保持溏心

為左趁熱食，拉麵就先擱一邊了xd

味噌赤丸拉麵

這是秋冬限定的。

先嚐小口湯底，豬骨香味濃郁，夠味又香口

稠度高可以黏附係麵條之上，唔驚食到冇味麵:^)

味噌夠濃香，啱哂重口人士

不過佢唔係話淨係得個鹹字，係其後會有淡微甜香

叉燒係圓卷狀，薄身

肥瘦適中，軟稔重肉味，油香反而不算突出

拉麵放耐左都仲彈牙，並沒有糊掉:^)

而且用既麵條頗為粗身，大概比平時既粗半倍，叫做帶點嚼勁

牛油粟米

朋友有登記過做會員，用Bari Card App就有張優惠劵送粟米

粟米粒粒分明不水爛，甜度中上

混入帶有鹹香既牛油都算合格既，重點係佢杯底冇咩水唔會溝稀哂

一風堂吉列叉燒漢堡烘底角包

角包今年係香港不罕見，不少餐廳都有推出類似fusion小食

呢一道其實只係因為見到佢係炸叉燒漢堡，好似幾特別咁先點

佢係一風堂環球精選中一款，係美國紐約店傳來

只係佢既精選不時會轉款去吸引食客，出blog時或者已經冇左

真係十分細件，掌心……大概也比它大吧:^0

吉列叉燒漢堡非常細小，厚度都合格既

只係佢切到好唔平均，我同朋友都唔知如何分享了

咬落香脆，滲有點點肉汁，趁熱食比較不油膩

配上爽脆既生菜就更加解膩

只可惜個烘底夾包乾身，係有絲絲麵包甜但冇咩烘過既香氣

服務……員工既語氣比較急重，可能有時繁忙時段多人慣左？

當晚吃得有點不夠暢快，不多提了

Chips Republic-選漢堡

Bacon Cheese Burger

包面芝麻滿密，脆身又重芝麻香

鬆軟綿密帶微甜，仲有烘包既淡淡焦香
煙肉油膩呢點唔特別講，要數邊緣焦脆

而牛牛店方聲稱用左100%安格斯（好似係
味道香濃重肉香，不太油膩亦不會老韌，稔軟卻不過分鬆散

半溶芝士香氣同味道都頗為濃郁
加上酸甜開胃既醬汁同清新解膩既蔬果，整體感覺唔會好肥膩
只係薯條仍是軟身帶油，反倒是很一般

Green Tea Milkshake

去Chips Republic飲milkshake是常識吧

綠茶味幾香既，不人工又唔會苦澀
只係奶味既香濃程度更勝一籌，茶味不夠突出

稠身細密，甜度算高，奶昔感覺有點甜膩
不過呢間都係足料既，唔係水汪汪果種