MEATS-午市會肉食之友

每一兩個月總會想念起牛扒；為著解饞，這回約定好友試試肉食為重的MEATS

Pirata Group旗下的Meat Bar概念休閒風餐廳，多採用燒烤及煙燻方式烹調料理

午市套餐包括時令頭盤、主菜及甜品或咖啡，三道菜連加一，每位落樓約兩三百

避開用餐高峰，改投Late lunch就可以輕鬆慢享，遺憾當日天色普普，未盡如人意

即使加入肉食仍是清爽得很的前菜，Duck Salad配搭有趣而層次分明

以甜脆西瓜粒墊底，灑有腰果碎，鴨肉味濃，用鹹甜並重的海鮮醬調味，可惜頗為韌柴

相比之下，Fish Taco則是安心之選，魚柳脆炸至金黃，但魚肉仍然腍身

墨西哥粟米餅皮薄而煙韌，未被濕料水分浸爛，並抹有薄薄一層綠色莎莎醬

配合香潤酸辣的Chipotle aioli更加醒胃，再添菜絲去膩意，即使油炸加澱粉都不易飽滯

主菜可選豬、牛、雞、魚及素菜，每份均附炸薯條，脆得可以又無油溢，沾醬與否都可

USDA Ribeye壓有格紋焦痕，中心保留些少紅嫩，肉香不腥膻，但微韌、肉汁不多

灑有細薄鹽花，亦可蘸點香韻複雜的阿根廷青醬，令其更為油潤易入口

而1/2 Rotisserie Chicken混合迷迭香、檸檬及黑椒香味，輕添酸辣，突顯肉味並喚醒味蕾

烤至皮薄帶焦而不肥膩，只是雞肉雖厚但略顯乾身，但憑其香口冶味程度，仍然討人歡喜

為午餐作結，兩個選擇一人一款剛剛好，秒速鎖定酸酸甜甜的Rotisserie Pineapple

以焦香烤菠蘿片作基底，未會酸得過份，亦沒有太多韌纖維，伴上水果雪葩，毫不致膩

至於經典款式Chocolate Brownie朱古力味濃郁，疊上冰感不重的雲尼拿雪糕，香甜得很