再次與友相聚，選址依然是大牌檔系列
由突然醒覺的某天開始，嘗試每次嚐新，不再貪方便而翻兜又翻兜
然而，叫做試得過既小炒檔少之又少，有不少本就性價比低
即使是昔日大紅大紫的名店，也紛紛被評跌Watt，讓人卻步
去訪一間又一間，現在已經是隨緣的心態
找到價位看似合理，風評一般或以上都試下去馬，放手一搏
佐敦這邊的男爵大排檔風評是為平均之上
主理的李德榮師傅屢獲殊榮，入廚經驗豐富，據聞超過廿年
當晚我們有幸與他相會（就坐係隔離枱），吹左幾句水，影左張合照
對這類型的啤酒興趣不大，但似乎唔整番一兩支就唔夠氣氛
菠蘿咕嚕斑球 $78以均勻的橙色醬裹登場，酸甜胃口頓時大開
外層裹粉，可惜脆度不足，只帶少許皮層韌感
幸好斑球不腥，腍身不過乾，未算太油膩，可以接受
百花大腸 $83的金黃色澤甚為誘人，但不是釀，應說是攤放於面
外層略帶脆感，亦有點點大腸油脂層的香氣，不過未算豐腴
薄薄的皮脂感，吃起來不夠過癮，加上蝦膠偏腍，略有失色
脆燒豬手 $198已事先起好肉，外皮香脆不油膩，帶少許膠質黏感
肥脂部分不多，所之豬手肉吃起來瘦身紥實一點，有點乾
鹹度恰到好處，當然單吃會濃了些少，伴飯就比較順口
小鍋呈現生蠔煲 $118，蠔肉有湯匙大小，飽滿不乾韌
沒有腥味，吸收好調味料的色水及味道，又不至失去本味
雖然來得偏油，但是鹹度合宜，也有份薑蔥香氣
欖菜肉碎豆腐 $78金黃不滲油，趁熱吃，豆腐表層酥脆對版
中心是如溶心般細嫩脆弱，教人不禁要一口吞下，感受那質感，可是太燙了啦
欖菜肉碎的芡汁色水不親民，但總算叫鹹得惹味，肉碎亦不會太肥
難得相約來到大牌檔，盡情一吃想吃的香口野之外
食少見少的蝦醬豬頸肉蒸陳村粉 $78也在我們的菜單之上
陳村粉厚薄恰當，不至過份稔爛
蝦醬香氣顯得溫和，豬頸肉腍軟非爽脆版，喜不喜歡就真的見仁見智吧
白飯 $10附上豬油及豉油，頓時想起小時候碰到不喜歡的餸菜時
不是用豉油，就是用油鹽拌飯，吃得非常滋味
家人說那是他們舊時窮，雖然有飯吃，但沒有錢買菜，才會逼於無奈這樣撈飯
豈知我明明面前有三數款餸菜，卻不珍惜，吃油鹽豉油飯時反而樂得自在
問道：「你係咪痴左線啊？」
四人行，每人兩百幾，價位算不算相宜？
不清楚了，到到都加價，又不是每日都食大牌檔，市場價既野愈難捉摸
其實好多時去大牌榴食野都係食個氣氛，輕鬆爽快，食物倒沒那麼重要
雖然根據上述描寫，這兒的食物質素可圈可點，但是不至於差劣，是為正正常常既水準
有時見有好多獎好多證書好多人讚，講真咁唔代表間餐廳既出品百分百頂級超脫
加上之前提到主理人同我地坐係度吹埋水，你估道道菜都係佢親手做哂咩？
就算佢本人廚藝了得，都不等於伙計有同樣技巧，否則……佢自己再開一間添啦！
