談起瑞典菜，想要又平又大份，基本上是難得很
雖說平時點主菜後常有沙律麵包等任食，但那些就不是我們的焦點
有時上網搜尋下瑞典菜，無論是高級還是平民，價位都不是我們熟悉的
他們的普通價，也許就是一碟肉丸近百元這樣
（當然，自己超市買一包肉丸三四十粒先三十蚊，但自煮就唔同講法啦）
到最後，網上問起要抵食既瑞典菜，總會看到IKEA的身影
然而，眾裏尋它千百度，瑞典菜式卻不時在Buffé中可見
WKB West Kök & Bar是連鎖餐廳，1989年成立，Gärdet、Marieberg及Västberga三店
90SEK，早上9時至下午2時，係啊冇睇錯，真係朝早就已經供應
官網有餐牌睇，每個星期每日既款式都係截然不同
食呢間既原因除左係又平又食得飽之餘，款式都係個考慮因素
除非非常想念亞洲菜，否則我係唔會去食周街都係，仲要平到五六十蚊就有既Asian Buffé
之前提到瑞典既自助餐文化盛行，不過我會真係揀住黎食
好似今次呢間咁，就係見佢會有啲本地既菜式先會選擇一試
有時候仲會有通常瑞典Buffé唔會供應既甜品，尤其係星期三及五
在這邊吃的自助餐感覺好街坊，因為就如平民飯堂，一餐都係幾十至百幾
係香港既話，唔少Buffet都係酒店餐廳既推廣，印象就係「好似」高級些少
如果講香港既平價Buffet，諗到既就只有伏、品質低劣、填飽個肚、冇款、要爭……
但瑞典呢邊就係抵、質素中庸、款多、不斷Refill、有秩序（排哂隊）、任食冇白眼……
大家的共通點就是，一定填得飽個肚！
其實好多時會忽略左瑞典都係個食魚既國家，因為重點放哂係肉丸野味，或者小龍蝦
今次食到既就係Panerad Torskrygg 炸鱈魚，唔係英式沾漿炸，呢個係撲糠
魚肉係片到薄身去炸，唔係追求厚身啖啖肉既感覺，比較注重香口
十分大氣的一大塊上，未有分成小段，都唔會爛哂出黎
好彩唔會好油，炸得夠脆，冇溢味又唔會腥，不過一食就已經覺得好熱氣lol
另外一味海鮮，Inkokt Lax 水煮三文魚，算比較健康的一道
當然也期望是非常優良的魚穫品質，畢竟是任食的
即使如此，厚身魚扒沒有腥味，略略帶點三文魚應有的油份脂香，亦未覺膩
不能怎樣稱讚它為完美，但以Buffet的標準衡量，合格有餘
Köttbullar 肉丸不能少，附上傳統醬汁及紅莓醬
個人認為還是有點紅莓醬，來個酸酸甜甜的Twist，食落先唔會覺得膩滯
還有炒牛肉片及醃烤雞腿等等的肉類選擇，只是非瑞典傳統菜式就不多說了
然後來個別開生面的Raggmunk 薯餅，薄身而大片，以幼細薯絲製成
平時食開既薯餅就係M記果種，薯仔切粒，整成橢圓形再炸
得意少少既咪有啲笑臉薯餅，將薯仔壓模整個笑哈哈樣出黎
今次瑞典版的就是用比超市見到果啲包裝好既芝士絲更幼身既薯絲整
食落非常香口，仲有些少煙韌，煎過之後當然不乏焦香，但意外地仲有少少薯味
是日飯後甜品除左有常見既三款曲奇：檸檬、果乾及朱古力（會加糖粒）
仲有我好中意既香蕉蛋糕，固然不能說這是瑞典的特色甜品
只是這次嚐到的香蕉蛋糕表面香脆，鋪上了朱古力粒，添點甜味，再灑上椰絲就更香口
而蛋糕體鬆綿濕潤，香氣自然，甜度恰到好處，並且不會油滋滋的，教人喜愛
有這麼的一個說法：離開是為著要回來
出門在外，玩得開心過癮是再好不過的，教人歡愉喜樂的是因為不斷有嶄新的體驗
無論是好是壞，自自然然就會將其與廿年來身處的香港作比較
可是跟大部分友人談起時，他們均會透露出到外國扎根的意願
在此並非要歌頌瑞典，也不是說崇洋，外國月亮特別圓，咩都好過人
人無完人，就算有千樣百般好，同時都會有著缺點，被比下去的一處
只是看著越來越殘缺不堪的香港……最好的一點就是沒有地震。
WKB Marieberg
Gjörwellsg. 22, 112 60 Stockholm
每日9-14
沒有留言:
發佈留言