每次經過星街小區都會到處張望一番
因為果度既建築及規劃係比較似小鎮風情，唔會太過密集
比起愈漸熙來攘往既中西區，更能讓人稍為喘息
不失為磚瓦中的一個悠閒小角落
該區予人既感覺係比較高尚
一路見到好多餐廳，連餐牌都不多看一眼
總覺得係經濟能力有番咁上下先負擔到個消費
唔係我呢啲無業頹廢學生能力所及……呃，除左Pizza Express之類？
有時會望上去有落地玻璃既一間西式餐廳
眺進進去，環境感覺舒適寫意
採光不錯，日頭去一路食一路有陽光透入實好正點！！
不過睇落好高級，一直都冇動力去試
結果今次因為朋友生日，一大堆細路就約定闖入Beef&Liberty
餐牌兩張都只有前後兩版
列明食物或飲品既款式、價錢及所用材料
清晰明細，揀既時候就冇咁易中伏
而有食物敏感既話都可以大大減少食錯食材既風險
不過就冇圖睇既，中意看圖識「菜」既朋友大概要失望了XDDD自己FF吧！
特別餐牌係註明係另一個黑板上，唔會打印出黎
不時會更改既，帶來新鮮感之餘更可吸引新客:^)
話咁快就成枱食物黎齊
我地當然不遑多讓，瘋狂影相啦！
只係場內燈光暗淡，係有酒吧既情調，但唔係好啱影相
友人們就開始重提應該日頭黎先好xddd
Deep Fried Goat’s Cheese and Beet Salad（Special） 炸羊奶芝士配紅菜頭沙律 $68
這是其中一道特別餐牌上既限定菜式，不過我唔知佢供應到幾時啦
炸羊奶芝士球對半切開，分成四面
炸皮係裹麵包糠炸既粗糙外皮，厚度可以接受，十分香脆
羊奶芝士味道濃郁至極，質感香滑得瞬溶於口，沒有結塊
芝士香氣當中不覺有羊奶羶味，相當親和順口
紅菜頭沙律帶酸，固然係開胃菜，同時去除炸羊奶芝士既油膩
紅菜頭爽口得黎冇惹人厭既青味，稔而不爛
其水分讓人忽略炸皮既乾身，未有浸稔但可以令佢食落唔界口
Sticky Rib Fingers 烤豬肋骨條 $88
我一意孤行點選既頭盆，因為真心好中意食豬肋骨，係會去買番屋企自己烤焗
不過準備時間長，同埋唔知點解我煮咩都煮到好似中菜咁
明明跟足食譜，烤焗至微焦，用HP醬等等，但個味道都好似食緊中式燒排骨
最後我放棄了，都係出街食算啦……
一盆只有四條豬肋骨，但夠厚肉又頗大件
可能我食開既都係接近兩百蚊就一條細窄既
因此我覺得呢個價可以接受，而友人們就一路呻唔抵食
豬肋骨先用啤酒焗過，啤酒中既酵母有助分解肉筋
食落雖然就冇話好濃既酒香，大抵都揮發掉
但肉質稔軟鬆化，又不像用鬆肉粉咁失去嚼勁
大啖大啖咬落豬肋骨肉都唔會有纖維黏在牙縫，仲係好有肉韌感
店方聲稱用慢火烤焗，個人認為肉感軟身又不乾柴
當然又焗又烤，我冇可能呃人吹到佢嫩過豆腐
表面肉層偏老，近骨位肉質相對較滑，肉味亦更為濃郁
豬肋骨肉頗有肉香，冇雪味腥膻味，帶少許脂肪就多添份油香
外層沾滿酸香惹味既蜜糖燒烤醬
我覺得比平日好重喼汁、HP醬及羅望子味既醬汁，佢已經係溫和左！！！！！
醬汁稠度剛好，酸中帶甜，不會過嗆過激
加不加青蔥也沒有很影響味道，投不進加入位了:^3
友人都抱怨太酸太難食，嗯……也許個人口味分野吧！
又或者佢地唔多係外面食味道帶酸既醬燒豬肋骨
可能食開單純蜜味或辣味，就未必咁習慣
Lamb Burger（Set） 羊肩肉漢堡 $143
（原相謝Julie（右））
又要講句，佢塊威爾斯羊肩肉夠唔夠威，我呢啲入門平民係食唔出既
羊肩肉製成漢堡扒後仍是充滿肉汁及香氣，完全唔失去原有滋味
碎肉製扒，冇咩脂肪粒，卻是香氣逼人，濃厚個不行！
朋友紛稱羊肉羶味重，惹味香口
可能我自己重口味，又唔夠羶味勁到咁，只覺肉香自然又突出
希臘菜不時都有薄荷成分，就算係其他地方，食羊既話都會有薄荷坐陣
好在薄荷乳酪既薄荷味清淡，乳酪奶酸香味反更顯現
正合我呢個討厭薄荷味道既小子既心意xd
自家製既酸麵團漢堡麵包細密氣孔
盡情吸盡羊肉肉汁及油份，以及薄荷乳酪醬汁
單嚐麵包部分就已經食得出羊肉既香味之濃
小茴香既獨特香氣亦有助去羶，更添美味
酸瓜、牛油生菜及蕃茄既清新則減淡羊肉天然既油脂膩感
亦令呢個多肉既漢堡到胃冇咁飽滯（Y）
Chicken Burger 脆炸雞肉漢堡 $92
（原相謝Cindy（左）同Julie（右））
大堆頭既雞肉漢堡，裏頭夾的是兩層厚身炸過既雞扒
餐牌中寫佢係美國香炸雞胸肉……我理得佢美國定咩國啦-__>-
外皮厚薄均勻，金黃酥脆冇得輸
雞肉調味亦得宜，鹹中不失雞肉味，只是……
也太乾了吧？
老老實實，咬落係夠稔夠味，但佢乾到好似情人節孤獨一人既感覺
明明佢都有兩塊雞扒啦，不是偏偏只得一個，那你為何要這樣Dry？
奇榛蛋黃醬其實不奇，佢係一款源自阿卡迪亞既煮食方法
將當地煮食用既香料食材製成調味料，味道我覺得又係好中東感覺
加入蛋黃醬後，多了份豐潤，較易為人受落
麵包都吸左少許濕度，入口更香軟
配上椰菜沙律及火箭菜，整體清番少少，但都仲係過乾
始終乾實雞扒又厚又有兩塊，佔量多，未夠使
‘The Curly Pig’ Burger（Special） 捲毛豬漢堡 $150
呢個又係特別餐牌既款式，每日只限售30個
黑板上只草草寫下菜式名稱、價錢及「匈牙利曼加利察豬」
沒有更加簡介，又未附上相片
結果我地見到仲以為係重複送錯漢堡
我覺得呢個就係玩神秘既黑暗面
保密到令人食果陣有點不安，不敢肯定自己食出既係咪就係所想既
豬肉扒製成厚厚一塊，肉感煙韌，比牛肉、羊肉及雞肉更有咬口
豬肉稔香富肉汁，豬油香氣濃而不膩，沒有豬膻味，惹人垂涎
配上一片薄脆既醃製煙肉，又是另一番既肉味
僅僅嚐肉，已有兩種不同層次既香氣、味道及質感
中間配上既爽脆蘋果沙律，混合了清甜微脆既蘋果切絲
再者，酸夾甜既蘋果果香遇上鹹香味濃既肉類就更有種對比中的和諧
就算係多多既肉，食時都唔會咁飽滯哽胃
當然有少許苦香既火箭菜都係解膩能手
呢次配麵包食都唔會太乾涸，仲索埋從肉縫稍稍流出既豬油肉汁添！
Bacon Cheese Burger 煙肉芝士漢堡 $122
Beef & Liberty所用既牛肉聽聞係無激素草飼牛
記得家中一本食物營養學既書籍提及，草飼比穀飼另含有豐富既營養素
維他命B6、E、Omega-3及β-胡蘿蔔素
係會比較健康，至少唔會好似食一堆化學物質入肚
新鮮牛肉餅新鮮在於佢地午市及晚市之前先手製一堆牛肉餅
並非整好哂掉去雪到冰硬又無限解凍咁
牛肉餅足料大方，厚身得黎真係用肉塑成，唔係加好多粉漿去砌大件佢
肉香不算太濃，質地係偏乾，牛肉好瘦冇咩脂肪團
佢成塊牛肉絞得好細碎，本應係嫩既，但冇咩油脂就令佢顯得乾鞋左
蘇格蘭車打芝士幾襯牛肉餅既，芝士味道未會掩蓋牛肉原味
而半溶狀態為賣相加加分
醃製煙肉香脆，表面不算難以忍受既油膩
鹹中帶有香氣，唔係一味死鹹
煙肉醬都唔似個名講到咁膩咁可怕，配上自制燒烤醬
兩者交織之下令整個漢堡食落冇咁乾，酸得黎不太刺激既酸瓜讓人胃口大開
Liberty Fries Liberty薯條 $28
本想點蕃薯條既，但店方話冇哂/___>\
失望。
然而壽星仔話好想食薯條
係就係唔抵，但主人公出聲，冇計啦:^0
佢地用既薯仔係自家種植既啡色馬鈴薯
切成粗條，油炸至金黃，輕輕用海鹽調味
說真的，粗薯條比幼條更能食出薯仔自身既香味
炸得香脆又冇泛油光，夠熱係正既
嫌鹹味太單調？
蘸點酸酸甜甜，稠身如千島醬既自制醬汁再吃個不停吧！
Zucchini Fries（Special） 翠玉瓜條 $48
翠玉瓜係西方菜式中係好常見既食材，不單止係食中式飯盒既伴菜
通常係用黎製作各式沙律或是餐盤配菜
今次，我地食到既竟然係……香炸版本！
佢實則將翠玉瓜切絲，跟住當佢係薯條咁炸
味道比一般薯條多添一份清香，一份甜味
只係太過幼身，太過稔軟，炸完都沒有想像中既香脆感覺，食得不夠過癮
Argy Bhaji Burger（Vegetarian） 印度素脆漢堡 $88
這是一個十分香脆可口，賣相金黃吸引的素食漢堡！
鷹嘴豆及洋蔥炸脆，外層薄身不油，酥脆可口
餡料當中有墨西哥辣椒，加上芒果酸辣醬，香辣之中滲出開胃微酸既果香
入口不會太過嗆辣，濕潤易嚼，就算係炸得咁勁抽都唔會乾到參口！
另外佢仲有印度香料，連同印度菜常見既酸辣醬，讓整個漢堡味道富有印度風味
炸物點都帶油，食多就好易膩
牛油生菜既清爽和紅菜頭沙律既稔香就大大降低漢堡既膩滯感
特別係紅菜頭沙律，其實參考左Colesaw 涼拌卷心菜既做法
儘管拌入醬汁，但是味道仍是清新既酸辣香，消去紅菜頭既青味，只留香韻
漢堡包身光滑但乾身，內層麵包軟稔帶淡淡麵香
微甜，若果加點烤過既焦香及脆度就較理想
重點真係要趁熱食儘快食，因為炸物係唔等得耐既
尤其係餡料主要係炸過既菜式
由於要影相，同埋食物一次過上左好多，佢稍為放涼後……
我諗大家都有不少經驗了，在此不多提
Falafel Burger（Vegetarian） 法拉費素漢堡 $86
又是一道帶點中東風味既款式
事關我都中意食中東菜既，通常食到都係炸球既製法
係香口係惹味，但好易會膩會飽滯，亦都係幾油膩唔多健康既
先前朋友帶我去左上環主打健康食品既Kale，有法拉費小漢堡供應
當時我係第一次接觸製成漢堡扒狀既做法，感覺幾特別又好似冇咁油膩
我地點既係正常大小，望落就好似將果日既素食豆蓉扒放大
只係呢個就似乎比較乾身，而且紥實
咬了一口，果然十分健康！！！！！口裏完全係俾纖維佔據既感覺
雖說是豆泥，但乾身又漿口，不斷不斷默默吞嚥也有點困難
加上麵包一層都係稔身但偏乾，我不應該一併咬下的……
幸好麻香濃郁既芝麻醬以及奶滑微酸既哈里薩乳酪幫了一把
餡料隊伍中，牛油生菜及蕃茄兩名成員亦費盡其水分及自然清香營救我
在此，表示對他們的謝意。
Warm Skillet Cookie & Cream（Medium） 暖曲奇配奶油 $59
曲奇用鐵鍋熱住上，講真佢中型都係好細架咋
大概係Pacific Coffee大曲奇既大小
端上桌後不久，職員就手拿一個小鍋過黎
我地當然都係好煩咁一齊嗌停佢，等我地準備好手機相機先
從小鍋流出來的是稠滑濃郁既奶油
雪白既奶油徐徐覆蓋褐啡既朱古力曲奇，變成白白的一鍋甜品
事不宜遲，我地都應該趁佢未凍，奶油入口冇咁膩既時候食左佢！
因為蓋滿表面，不得不先嚐奶油
黏稠細滑，忌廉香氣在每個味蕾霸道橫行，縈繞著，久久不散
對奶油愛好者來說，一定係天大既喜訊
可惜，我真係好憎太過膩太過稠既奶製品味道……
暖熱微溶既軟身朱古力曲奇真係無人能及既小伙伴！！！！！
朱古力香氣及甜味一出，奶油馬上要靠邊站
暖而稔既曲奇在口中慢慢軟化，直至有少許像布朗尼既泥感漿感
此時，只會嚐到朱古力既甜度及香味，奶油根本不是一回事！
雖然話甜得黎，稍欠我個人著迷既苦香，但都足以除去奶油既奶膩
因此我覺得配搭起來，反而又唔算過份甜過份膩
Apple Pie with Creme Anglaise 蘋果批伴法式奶蛋醬 $63
蘋果批唔係用鍋熱住上枱，不過都係有醬汁要淋既
今次淋上既就係法式奶蛋醬，顧名思義，有奶，有蛋
醬汁稠度未及剛才奶油既杰身，佢係稀少許，有如奶昔
我率先舀了一小口醬汁嚐嚐
呃……那個……雲尼拿味道有點不自然啊……
呢個係奶蛋醬，唔係雲尼拿汁，但奶蛋醬有時都會加雲尼拿成分入去
呢度既版本，只有一絲頗人工既假雲尼拿香味
淡黃既醬汁亦未見有經常出現既啡黑雲尼拿籽，可惜之餘還有點破壞了奶蛋香
蘋果批面頭係有少許脆糖面，酥脆重層次
嚼咬下更透出環環既酥油香氣，卻是不油不膩，只有香口吸引
美中不足既係底部既酥皮過度稔軟濕潤，未至於爛，但毫無脆度
可能係因為蘋果批未夠充分放回至室溫就奉桌，會回吸蘋果餡既水分
醬汁亦會浸軟底皮，讓其失去應有既酥脆
餡料係大大塊既蘋果，讓人想起美式蘋果批既澎湃
蘋果部分淋身不會水爛，甜中帶酸香
但未有記憶中蘋果加熱後很重既酸味，佢係比較柔性既味道
配上奶蛋醬既奶香微甜，甚是合適
如果雲尼拿香自然一點，或者直接剔除，更能叫人大快朵頤
Ginger Vanilla（Set） 薑汁雲尼拿 +$35
白茫茫一杯XDD
飲落薑汁竟是格外香濃，比想像中淡淡一掠既香氣更加誘人！
仔細一看，奶昔面層浮著細碎既薑粒，怪不得薑味自然可人
加上薑粒係剛好切到有咬口，又唔會明顯得嗆辣既碎粒
細滑濃郁既雲尼拿奶昔，香甜到咩地步都有機會飲膩
薑汁及薑粒清清地又醒神既味道
仲有少少既可嚼位，質感對比令其感覺不再單調乏味
Southern Slur 威士忌奶昔 $98
混有波本威士忌、焦糖糖漿及雲尼拿雪糕既烈酒奶昔
基本上不需多想，就好似平時雲尼拿雪糕澆上焦糖糖漿
雲尼拿香味配上焦糖焦香，甜得黎係唔同既味道，未算太膩
至於威士忌……主要飲落就唔多覺酒味，佔量應該好少好少
奶昔既奶滑香甜一早已經將酒味銳減
淡至兒童餐跟呢杯都似乎冇咩問題:^P
Colombian Scream 調皮雲尼拿 $98
以甘露咖啡酒、百利甜酒、意大利咖啡及雲尼拿雪糕製成
呢個叫就叫雲尼拿，味道側重點卻係咖啡味
顏色隨之變得帶點淡啡，而非前兩杯既白調
飲落其實同飲百利甜酒冇分別，味道極度顯著
奶昔就加添左份奶滑，好似有緩衝位，唔會一下子太甜太重酒嗆
而咖啡另配酒，再添奶昔既奶滑感……
我不禁想起愛爾蘭咖啡，是有點像吧？XD
Midnight Wake Up 午夜夢醒 $98
一睇杯烈酒奶昔就諗起凍朱古力
冇錯！因為佢真係注重係朱古力味道
內含甘露咖啡酒、朱古力力嬌酒、曲奇加朱古力雪糕
朱古力味道香濃細膩，甜香既同時又帶有酒味既微苦
唔會只得甜味，係最甜既一杯，又係最清既一杯
曲奇碎屑既脆感咬口進一步消淡甜膩感
這杯真的是不錯，我地果陣有爭住飲佢xddddd
Liberty Sling $98
來點酸甜莓香，新鮮草莓打碎混入Gin酒
再加點檸檬、橙及紅莓調成的多味果汁
調酒杯中放入一支串上原粒莓果既小籤，完成
也許Gin原本酒味都幾出既，入口冇準備既造會有少少乸
友人可能飲唔慣一黎就出招既烈酒，灑手擰頭
加上莓果既果酸味幾重，混入Gin就會有輕微人工味，不太平易近人
Golden Prestige $103
睇個樣就覺得好熱帶風情既調酒：
淡冧酒、新鮮柑桔及熱情果、接骨木花及橙花水
味道有濃濃既柑桔酸甜，熱情果既特有香氣也不失色
接骨木花香淡雅，橙花水既近似橙香頗出味
冧酒酒味比Gin較大路，淡酒算頗利口
呢杯比莓果既更為調和，依照入口既酒味可算是入門級的
你未必有興趣睇，但我係中意放出黎呀:^\\\\\
洗手間入面都係夠哂玩味
除左常見用牆壁既有趣貼圖，仲有安全套售賣機
一般呢類機器唔多係普通餐廳見到
佢既外形亦都係得意多於露骨，有別於以前見過既，係好笑又唔會太招人反感
講真佢服務算係咁啦，人多但都唔會過分待慢
態度方面……綜觀而言都係合格既
可能我地麻煩，成日揚手叫佢地XD
叫到後期個感覺係輕鬆左，職員過到黎都冇話咁公式咁正色
仲有件事係……我地買左個細細既蛋糕去
切餅費$180，幾乎係蛋糕既兩倍……
仲要收切餅費係不切餅既
不過我地幾個分番數，同埋店方幫手雪蛋糕
適時仲好配合咁點哂蠟燭俾到主人公驚喜
切餅費呢家野就算啦！我地著重既地方都係想朋友開心姐
只係呢度打出黎提番準備自備蛋糕既朋友咁解
點都好啦，恭喜CTung Lee踏入二字頭既懷抱！！！！！
.jpg)
.jpg)
.jpg)
.jpg)
.jpg)
.jpg)
.jpg)
.jpg)
