Neway-焗個飯

打自Red MR出現，去Neway唱K既次數少之又少（前者多想唱既歌

但為左我地香港樂壇既兩股新勢力，我地決定要重臨舊地

入房坐低，第一時間搵我地既天堂鳥BOP同埋Faith仔仔啦XDDD

唱兩唱熱下身，跟住就係……睇Menu點餐時間xdd

（尋找共鳴：有冇人一樣都係拎起個咪之後連講野都要對咪講？XDDD）

Menu款式幾多既，對比起紅先生

粉麵、沙律同焗飯意都係照原價

而扒餐、套餐同一人鍋就要另加$12

只看價錢，講真感覺算是公道了，而且係包一杯飲品既

飲品亦有好多選擇，翻後頁就係飲品menu

焗白汁海鮮飯

賣相還是出乎意料的順眼XD

本身對Neway既食物都冇咩期望，但呢個飯睇落又ok既

白汁夠味，唔係一味得個膩字，焗完既焦香味都係加分位

海鮮其實都係大類魷魚圈呀，假蟹柳咁囉:^)

個飯都係偏乾，硬身但仲係粒粒分明既，起碼加左醬汁都唔會淋爛

焗意式香腸飯

好神奇地佢地既吞拿魚係冇哂既……因此只係有香腸啦

醬汁濃稠度剛剛好，可以包裹而非浸濕飯粒，酸甜得宜（其實係偏甜），開胃順口

香腸都冇咩好講，味道唔會太鹹既，正常味囉xdddd

面頭有少少芝士，焗得微焦香口，唯芝味不太重

炒底飯幾香口，有蛋香，略嫌油膩，飯粒好幼細，偏乾身唔係濕爛既

老掌櫃-親切感

朋友暑假番到黎香港，耐一耐都未約食飯

終於約左一日啦，又唔知食咩好

諗住上網搵下有冇咩新餐廳小店啦

就俾我地搵到呢間係大角咀既東北菜！

咁啱我地兩個都係特別少少（？）對中菜好有興趣

以前已經成日嘈住要去食小菜要食煲仔要食包點……總之充滿中國特色xdd

上Openrice搵下地址地圖咁啦，點知又發現左另一樣野……

店方係好用心咁不時會回應食評，仲要似乎唔係口講，係真係實事求事咁實際跟進

就憑佢地呢下用心，不得不支持、不試下味啦下話xdddd

京式醬牛肉　$58

牛肉切成薄片，厚薄均勻，份量比我地想像中多

夾起一片，可以看見筋位係半透明，有點透光

牛肉肉香甚重，但凍食冇咩膩感，脂肪位亦不多

牛肉夠哂入味香口，沒有腥氣，點少少醬汁更惹味

如果仲係怕太重牛味既話加埋少少芫茜香入口，清而不嗆既好配搭

乾煸四季豆　$58

四季豆感覺唔會好油膩，食落焦香味好重

除左爽口多水分，佢仲帶有絲絲清甜味道

加左蒜子去煮，蒜香濃郁辟青辟腥，沒有一點嗆味

肉碎唔多脂肪位，感覺唔會太肥膩，鹹香微辣，惹味香口

松子黃魚　$88

講真我真係好中意食呢道菜，自己整過真係原條既感到好考真功夫

係menu見到有松子魚有少少意外，但想食多幾樣

冇揀到原到既桂花魚，而係平少少既黃魚

上枱賣相係幾吸引既，同埋新鮮煮起唔會話太泛油

先試一試醬汁，稠度剛好，酸甜味道開胃而不刺激，夠順口

雜豆唔會有雪藏味，水分亦夠，身邊不少討厭雜豆既朋友大概也吃得下？

夾了一塊魚片輕嚐，魚肉鮮嫩沒有腥味，雪白滑身可口，唔會過老

嗯……？熱度係夠既，亦不覺油膩

但係……炸完該有既脆度呢？我只覺是魚塊附著軟掉的炸皮:^(

京蔥羊肉餃子（十隻）　$42

原來係想加$5食煎餃既，但落單果陣唔記得講，係其後先醒起

大局已定，都係乖乖地食番水煮啦

餃子粒粒飽滿，同menu上既圖樣類似，感覺好足料夠餡

餃皮不會過厚，表面看似乾身黏口，但吃下去卻帶麵皮香

輕輕咬開外皮，果然係帶點肉汁，鮮香味美不會過膩

羊肉肉質鬆軟可口，加蔥後羊羶味不重，而羊肉香卻是更被襯托出來了！

沾上少少醬汁，帶點調味，微酸微辣，更為惹味

煎肉餡餅　$12（兩件起）

問過店員，餡餅兩件起係可以混合不同味道既

咁就梗係兩款味：洋蔥牛肉、大蔥羊肉，都各要一個試試啦

首先兩款餡餅既外皮都係薄身既，但勝在佢又唔會有穿漏喎（Y）

煎得焦香，老實講我地一見到仲以為係好乾，實中伏啦

點知一咬真心不得了！！！！！

外皮非常香脆，仲要有陣陣焦香

大口咬下的一瞬，滿滿濃郁既肉汁外皮破開的小口光速爆瀉

最好笑既地方係，親眼見住朋友咬落去果下d肉汁飛濺落茶杯，枱面都有

呢樣真係笑左好耐xddddd

洋蔥牛肉肉餡感覺綿身，香稔不膩

洋蔥仲要帶有香氣及甜味，嗆辣感同青味一散而盡

牛肉肉香亦十分濃郁，感覺係好集中好濃縮既肉味

大蔥羊肉肉質都係軟稔香滑，唔會話太肥膩太散碎

大蔥香氣重得黎好清，但唔會有嗆味青味

不過講真食完唔只唔覺膩，仲要明明好濃味都冇咩口乾既感覺:^)))

講一講環境

當日係週末，所以可以見到我地都係只能單點食

店員帶我地兩個人坐四人位，鬆動舒適

沒有垃圾，枱面都係清潔過既，衛生方面合格

其後竟然越黎越多客入座，而full house

這就是神奇的地方，佢地係full house既情況下仍然係冇打擾客人話要讓位搭枱咁

另外一個點就係……小店、街頭、非屋村地鐵站旁……

週末都仲係可以咁多客既，講真不容易

服務方面，我地都叫滿意既

除左先前講環境時有輕輕帶過冇叫搭枱

店員感覺都係有精神既，唔使點等就會應聲會過黎睇下咩情況

而唔係扮睇唔到，聳肩就轉身走咁

再加上一開始提及，係不時會睇番客人有咩反映

肯改進，唔係hea做既呢點真係唔易搵到

希望貴　餐館可以堅持此等用心，生意蒸蒸日上

土司工坊-嚐蛋糕

話說繼土司後，好友講過呢度既蛋糕味道不錯

見佢又有我中意食既香蕉蛋糕……

今次係講蛋糕既XD

班蘭蛋糕

外層乾身，焗得帶啡既薄薄一層特別香口濃味

蛋糕體一開始食落係又乾又密，食多兩啖已經覺得難以嚥下

幸好有部分既蛋糕體係濕軟綿潤，而且班蘭香氣特別濃，濃郁之餘又夠自然

因此整體俾我既印象都係可以接受既

香蕉蛋糕

呢個蛋糕係好實在既，唔算太乾身，但佢係爽d唔會咁濕咁油

香蕉味濃郁，我覺得算係自然，味道唔會人工得像香蕉糕

都係啦我真係覺得蛋糕最外一層係最正，味道最濃縮既部分再加上焗過既焦香，都ok既

檸檬薏米水

薏米水香味不太明顯，質感亦係稀身，未見稠度

杯底既薏米不多，而且唔係好夠綿密黏感

一杯飲完，味道都係好淡好清好清既……

PizzaExpress-小清新

一場出到黎，但諗極都唔知食咩好

唔想等好耐位，但行多兩行已經撞正放飯時間

係咁緊張既情況之下……

咦！都好耐冇食PizzaExpress啦喎

同行之人又表示中意薄脆pizza

好啦一於呢間唔好諗咁多了！！

Menu係全新既餐點設計

睇到Summer/Fall，已經可以想到佢地係定時定候有新菜式

為左帶來新鮮感以吸引客人，又係幾用心，畢竟不少人都喜歡嚐鮮:^)

Carpaccio di Salmone Affumicato

煙三文魚沒有一點膩感，入口豐潤，魚油甘香瞬間充斥口腔

鹹度剛剛好，作為前菜不會太過濃味

加入刁草、Capers及少許檸檬汁，感覺更是清新

Garlic Bread

呢個蒜蓉包面頭係有芝士既，焗得焦香，芝士香仲好濃郁

麵包底部感覺幾脆口，包心位香軟帶韌勁，越嚼越有麵粉香

可惜的是以蒜蓉包為名，卻是只有十分淡薄既蒜香，真係要好用心先感受到xd

Peking Duck Pizza

我幾滿意呢個中意合壁既配搭XD

雖然可以話食填鴨都有餅皮啦，但佢既質感係乾身帶粉，軟稔有麵粉香

呢個pizza就係乾粉重焦香，有韌性，咀嚼下有麵粉香……仲要係香脆可口的

醬汁味道同平時食北京鴨冇咩分別，佢呢度既鴨肉味道都夠香

同埋佢係肥皮既，我就一定連佢脂肪食，油香滿溢真係溶係個口到架

Sloppy Giuseppe

辣肉碎佔量不多，辣得黎好香口而唔係嗆既

加上佢係偏瘦，唔多脂肪，食完都唔覺油膩

表面有點芝士，焗後帶有焦香，半溶更加惹味:^)

批底脆口，底醬微酸，令整體感覺愈是清新開胃

Salad

隨Pizza附上既係一碗沙律

蔬菜色彩繽紛，爽脆新鮮

配上黑醋醬，甜甜酸酸，清新夠開胃，稠度剛好係附係多水分既蔬菜上

Tiramisu

mascarpone cheese既芝士味甚是香濃，但感覺唔會好膩

質地幾幼滑，輕綿軟柔

手指餅層帶點濕潤，咖啡香氣頗重，但唔會太苦澀，個人認為係算易入口的

Chocolate Fudge Cake

朱古力味道偏甜，香味係幾濃郁既

蛋糕體都係朱古力味，但甜度就一般

感覺算係濕潤既，同時佢又會有少少油膩感，或者又係兩睇啦

服務本身係覺得幾好架

server親切又用心，成個感覺係幾cozy

同埋睇到有server同客人推介食品既時候唔係一味死推自己講

係有問有答、有講有笑咁，俾人印象真係唔錯

只係可能客太多，人手唔係太夠？

有時叫人真係等好耐都冇咩人理

同埋食物又係等左好耐都未上，請職員幫手跟一跟都係慢速度

感覺都幾失望

因為我地係leisure食，但如果係放飯既話一定唔會等得切

都係果句啦，收錢又真係幾快既……效率真係有d……

Little Bao-為人氣

講真我唔係好跟潮流既人

通常大家追熱潮果陣我都只係隔岸觀火

也許三五七年後我先拎番出黎自己hit XDDDD

就好似食野咁，香港而家好興係突然流行一樣食物就好多人為之瘋狂

日日排隊等位，仲要排哂籌咁

我就好懶又唔中意等既，卒先試新野就冇我份架啦

講左咁多，其實係想講……呢個雪糕包仲不時出現係Instagram

究竟佢有d咩魅力呢？讓我們看下去……

先前已經飽餐一頓

因此我地只係點左甜包包

但店方規定只點甜包無其他食品就只可以外賣

要試都冇辦法，只好外賣

等左好耐……大概係即叫即整既原因，十幾分鐘走唔甩

當日未開店已經有人等位，其後人流愈多，亦令我對小包兒更有興趣更好奇了

炸雪糕包　$48@

同好友兩個人去食，一場黎到，見佢有兩隻味不如就試哂佢啦:^)

炸包係即炸既，香脆得輕輕一壓已有咔嚓碎裂聲音

個包都幾乾身，絲毫沒有油膩感覺（Y）

味道偏甜，其實我地一食已經覺得似炸饅頭，只係佢係脆口同埋表面粗糙d

綠茶雪糕版本係加上煉奶

綠茶雪糕幾幼滑，說實話綠茶味唔係好濃郁，但甜中帶絲絲苦甘味，感覺算清新

煉奶有奶香之餘仲好甜，剛好再加添了甜味

雲尼拿雪糕版本就加入左海鹽焦糖醬

雲尼拿雪糕味道自然又香濃，細滑creamy得黎唔會太甜膩

海鹽焦糖醬稍為稠身，焦香味重得黎有甜有鹹

加上食到有粗粒，質感同味道既對比大大降低膩感！！

整體黎講我覺得好gimmick

因為俾到我地既感覺係炸饅頭中間夾左雪糕

但佢個價錢係嚴重地over-priced！

另外想講下既係……

大佬我真心唔知可以點樣去食佢！！！！！

話說我地已經係隨手影一秒咁就食，但由於熱炸包既熱力，佢真係秒溶

仲要真係太聰明，完勝愛迪生同愛因斯坦！

裝係個咁高身既盒入面，莫非你認為會有人閂埋個盒拎番屋企先食？

老老實實連拮都拮唔起，整兩整成個溶哂散哂

最尾真係要爬個包入口咁，儀態一早放棄左，但食到咁狼狽真係零好感囉（N）

壹餅房-點西式

續上篇

係南龍冰室睇到一個西餅蛋糕既甜點餐牌，圖文並茂

食完晚飯正餐後就迫不及待要點了xd

（講開又講，上網見有食客話最好一早預留定，廢事夜左D心水款售罄或者餅店關門

栗子鮮忌廉蛋糕

栗子蓉既用量似乎又幾大方喎，而家廿蚊出頭既價錢好少有咁足料

栗蓉味道清甜，栗子香氣都幾重，又唔會太Creamy搞到膩哂

中間既蛋糕層軟綿可口，用黎分隔開層層用料就唔會咁易膩滯:^)

忌廉細滑又有奶香，味道自然，手打既唔會有即唧咁油膩，比較清新既

情迷黑森林

呢個蛋糕cream多，真係正中我死穴，但朋友好中意就試下

朱古力碎片甜得黎帶有朱古力香，唔係一味死甜既感覺，冇咁膩:^)

忌廉也許因為係手打？感覺係鬆軟泡沫而唔係雪到硬實既牛油質感

蛋糕層香軟不濕爛，配上啫喱酸甜微黏，起碼我係食得落既

紅豆抹茶蛋糕

個賣相都幾正常，綠色算自然，唔係螢哂光咁，係可以安心食既

表面薄薄一層蛋糕碎感覺軟綿，帶有淡淡綠茶香

亦冇咁易好似食粉霜咁會嗆到

綠茶mousse部分香滑，唔會雪到變冰咁，綠茶味我覺得一般，不太濃郁

紅豆聽聞係自製既，味道甜得自然但甜度不高，粒狀唔係碎蓉，食落係幾清既

蛋糕層綿密，唔會太過散碎，軟稔不濕易入口

南龍冰室-咖喱多

話說先前去左食羅麥記既焗豬排飯吐司盒

就、係、同、一、日！

我地又去左食另一間都有供應鹹食吐司盒既南龍冰室再擦過xd

環境設計幾特別，格局係冰室但又帶點新意

假天花掛左一堆黑白鳥籠作裝飾

令人想到舊時不少食客會帶埋自己養既雀鳥去用餐XD

Menu色彩繽紛，仲有好多自創人物，我地就覺得佢幾有趣又吸引xd

但我覺得放多d食物相俾客人對食物有個印象先，反而好過呢d公仔噱頭

金磚咖哩牛腩飯

對不起搞到佢個賣相咁噁心係我既錯/____>

一開始佢係牛腩飯上，咖喱汁自己倒，但……我好明顯係失敗左……

算啦請自行飛左張相或者掩住佢……又或者係腦海ff美化佢XDDD

牛腩都有幾件既，算係大塊（以外食黎講？）

肉質非常軟稔可口，濕潤帶點肉汁，入口一抿即化，牛肉味香濃

脂肪不算多，配上濃郁微辣既咖喱汁，不覺油膩，更感惹味

飯底濕度剛好，也許焗左係吐司盒內，容易食出米飯微微香甜味

將吐司盒切開，原來仲有不少包心，飯量用料比先前到過既餐廳少

吐司外層不脆，質感乾身偏韌，有淡淡麵包香

從侍應口中得知原來係可以免費任添咖喱汁既

好彩姐！我地拎多左碗咖喱汁黎點吐司食，顯然是令其易入口了

其實呢度既吐司盒勝在任添汁，同埋款式多

只係要論及其他方面……會有更好既選擇

瑞士汁牛河

睇色水似乎唔錯，翻翻碟底又唔見有滴油:^)

一食之下，瑞士汁既甜味呢？

老實講唔係自己點菜既話我真係未必會知佢係用瑞士汁……

河粉炒完唔會太濕爛，條條分明卻不會過份油膩，又有少少咬口

牛肉片滑身不老，佔量不多但感覺都夠料既

而且食牛肉片先會食到有瑞士汁既味道:^|

份量都ok既，我地分黎食都覺得夠，畢竟佢點都係油底易膩滯既

服務其實都可接受的

雖然不時要等一段時間先叫到人，但當晚食客幾多，等一等係可以理解

態度係ok既，有問有答，唔會黑面催趕咁:^)

唔好諗住呢餐就咁完呀xd

仲有下文架:^)

事關我地發現南龍冰室竟然有西餅甜品既餐牌

原來佢係同對面街壹餅房合作

路經時一督，該店大概係外賣店

香港唔少人都中意飯後一點甜

由此看出點商機，而家咁有埋堂食又似乎有發展潛力XDDD

noodle LAH!-午後歎

午餐食得飽飽，但行兩行又已經口痕

去到金鐘又想食下甜野，但好多間on list既其實已經試過

心郁郁想試新食店，唯有周圍行下睇下啦

亂行一通之下竟然俾我發現左呢間餐廳

細閱餐牌後原本係想試佢地既Cake Set

但店員指蛋糕係外面攞貨唔係自家製，而且少客揀就暫停左

冇所謂啦咁試下其他野:^)

不過我覺得直接封左果欄更加好，避免有誤會啦

香蕉麵包配乳酪

上桌賣相真心差左d，香蕉麵包係深啡燶黑既色水

講真未食已經驚係伏，唔知會唔會係又乾又苦:^S

要安定心神先，食左一旁既香蕉乳酪先啦:^)神速秒補Serotinin

Yogurt夠凍，唔係冰既程度但唔係暖熱半溶出哂水咁

香蕉味自然又夠清，仲食到有香蕉果蓉

乳酪帶酸，creamy得黎唔會膩，細滑開胃

然後我地就黎挑香蕉麵包啦！！！！！

入口……咦外層幾脆口喎:^0000

膿黑既部分又未至苦焦，卻是帶點焦香

香蕉味感覺好自然，麵包心係綿軟濕潤，未覺油膩

咁睇黎真係個賣相問題啦……

因為我知唔少人係會去除燶焦部分先食既，好似健康d

但就失去左焦香微脆既美味/__>

環境真心幾正幾舒適

我係下午茶時段去既，當時個場都幾靜

附近上班族通常都係番緊工就梗係啦xdddd

仲要有得坐窗口位，落地玻璃有景有光線，感覺幾舒服

順帶一提，睇到佢地早餐有優惠

惠顧食品+$1就有Drip Coffee

星星Pho Cha-清靜宵

朋友話想一齊食韓式炸雞

但我諗大家都知係香港最出名果幾間排隊排到點

（聽聞而家熱潮過左冇咁多人啦

結果我地兩個去到一間位於佐敦……

我諗都算係新開既小店一嚐滋味XDDD（兩三個月？）

環境幾夠燈光，睇menu同影相都方便好多

餐廳內牆壁貼滿韓國相關既海報剪報等，一睇就知係韓國菜啦xd

同埋佢地有幾部掛牆電視係播緊韓國節目，配合番個主題

衛生程度都令人滿意，冇垃圾又唔會周圍黏笠笠

前菜佢應該係隨機執三款既，事關隔離枱食既同我地既有別

泡菜味道偏向溫和，辣味唔算好重，酸度都係一般，唔會太刺激

魚糕香腸味道真心冇咩特別好講，但呢款又唔係度度都有既前菜

感覺好似食緊韓國既路邊攤咁，幾得意

南瓜係鹹既:^)，本身係軟稔清甜，但入口係會食到鹹味先

海鮮煎餅　$98+10%

睇煎餅份量係香港韓國菜黎講都算係食得過

材料中，海鮮通常都係我地熟悉既魷魚鬚啦，以及有蔥段辣椒

賣相幾吸引，起碼淨睇樣會覺得佢用料算大方

煎餅外層略帶脆，金黃色仲有輕輕焦香

餅心有少少軟糯感，但唔會係粉漿粉糊果種未熟或過濕既感覺:^0！

食落真係有蔥香既，完全冇腥味同雪藏味

點下加左芝麻既豉油食又幾香口既:^)

酸辣炸雞　$158+10%

呢個份量又係算抵食既，炸雞之外仲有醃蘿蔔同沙律

咁主角係炸雞呀嘛，梗係試左佢先既

外皮裹得均勻，厚薄亦適中，而且係冇咩油膩感

可惜的是外皮未夠香脆，感覺似係俾醬汁包住，稍為濕潤了

雞肉唔會太乾，冇腥味雪味，算係多肉少骨，易食易入口

醬汁稠度剛好，辣度其實不算高，幾惹味一路食都唔會好滯

醃蘿蔔算爽脆，味道都係偏溫和，食炸雞食到膩可以用黎清下味蕾

沙律既菜夠爽，感覺算係新鮮，醬料用量都得宜，剛好夠拌勻食

酸辣豬直腸　$128+10%

自從係韓國大邱，朋友帶我去烤腸街食左我人生第一次既豬腸後

真係念念不忘呀xddd

平時見開都係街邊檔港式既，但都係想食番烤腸，帶有焦香味果種感覺

所以就算食左好多野，都係要點番黎過下口癮

上桌係鐵板的樣子，夠熱夠保溫（Y）

酸辣味好自然，仲要唔係落一大堆醬調味，唔會漿口真係好好多

豬腸首先係冇異味既XDDD，入口彈牙帶點爽脆

中間既脂肪帶係熱力底下更為香口惹味，肥？食左先啦，點可以錯過？

食豬腸食到覺得膩就可以食下旁邊既雜菜

清新爽口鮮甜，仲要保留到少少水分唔會太過乾

其實我本身唔中意芝麻葉既味，但去旅行果陣食得多

談不上喜歡，而係覺得食比較易膩滯既菜式時同食，加添一份清香之餘又可以減低膩度

服務又不得不提

當晚我地去到係坐左係兩枱中間

但我地兩個大食仔又點得多野放唔哂

最後一旁既客人離開左，店員清潔完，竟然主動過黎幫我地拍埋張枱有多d空間

雖然當時我地已經係清到得番一道菜，但咁貼心主動服務又豈可不讚？

由頭到尾個印象都係唔錯既，對我地同其他食客亦冇黑面、惡言或催促情況

結賬離開時，負責人同店員都好好禮貌咁送客，表現令人滿意（Y）

真心泰國菜-真心嗎

以前聽過呢間泰國菜既店名

我認我衰，一聽到真係笑左出聲xd

呢間泰菜既Back up集團好似都係得幾間分店咁

為左分market share，唔知會唔會比大型連鎖店更用心於保持和改善食物質素及服務呢？

結果今次同幾位友人終於可以試下佢有幾真心（月

環境好有泰國特色，有好多特別既裝飾

好似d旅遊節目同旅遊書介紹既樣咁xd

利申：未去過泰國:^(

店員安排左我地坐係轉角既半卡座

果邊初時得我地一枱幾清靜

但其後黎左一枱……大概係附近番工既女性

講真……吹水講笑大聲真心唔介意，只係你地自己播片播到好大聲就……

心諗好唔尊重其他食客囉（當時轉角區已經唔只我地兩枱人

泰式豬手飯

份量似乎都OK喎，係睇到算係唔少配菜，而非單純用飯填碟既

蛋就真係冇咩特別可以講，就係全熟既烚蛋:^|

豬手先係重點，表面雖稍有泛油光，但食落又唔會覺得好油膩

味道鹹中帶微甜卻非死甜，肉絲間淡淡五香香氣滲出

講真係入味既，而且肉質軟稔易咬開

我覺得豬皮部分都不錯，冇咩脂肪不突止，仲要好重膠質

基本上係就咁成舊食都唔會覺得膩

不過唔知係咪因為我重口味，個人認為醬汁唔係好夠，食到旁邊係純粹白飯

亞塔子冰

亞塔子係有d似椰果，半透明狀既果實（？）

佢既質感係稔身帶黏，好易咬得開，同軟糖有點相似

其實我覺得佢真係幾多冰既就xdddd

同埋太甜了，佢落既亞塔子本身已經係糖水咁既糖度，甜得黎仲有少少膩……

甜品（送）

店員冇講到係咩甜品，其實我覺得講一句講個名已經可以好好多

起碼知道係咩黎，唔食既唔使驚中伏，特別係食物敏感果d朋友

我估係綠豆大菜糕囉xdd

佢個感覺係實身以及爽口既，因此我估計佢係用大菜黎凝固佢:^0

除左個味係有d綠豆清香，仲有豆皮，應該都係自家製又唔係用包裝豆蓉既

服務方面，我覺得就一般啦

最滿意既位就係安排我地坐係寧靜d既區域自成一角

（雖然其後既事……不過佢地都控制唔到，真心希望食客識得體諒坐係附近既人

要叫待應真係難既，某一兩個職員亦似乎比較hea做（未有黑面惡言就算了:^0

羅麥記-厚多士

「你厚多士呀！」

我諗有睇爵爵既朋友都會熟知呢一句xd

除左食開既甜既蜜糖吐司

其實香港仲有鹹既厚吐司盒

是次偕同暑假回港既好友去試下呢個新滋味

（至少對冇食過既我地係新XDD）

Menu好似學生手冊，感覺幾有特色

入面係圖文並茂，有樣睇可以吸引客人，重點係我地點菜時減少中伏機會

羅麥記係我地當日既第一站

上網上IG都不時見到有人食佢既芝士撈丁同埋吐司盒

午餐就要試哂兩樣（Y）

芝士豬頸肉撈丁

嗯……好似唔係好夠芝士汁/____>

豬頸肉有幾片，外層帶點焦香及脆度，食落都爽口既

厚度……係可以接受既範圍內

芝士汁既芝士味頗為濃郁，香口

稠度算似有點黏既白汁，將麵條緊緊附住，乾拌係不錯的

麵條煮得條條分明，有少少咬口唔會太淋爛，感覺正常

金磚鮮茄焗豬扒飯

體積一般，對我呢個大胃仔黎講自己解決都冇難度，結果真係食清碟咁滯

賣相都幾吸引，起碼第一印象唔會覺得佢好凌亂

表面有少少芝士，溶溶地又有少少焦，加添香氣

豬扒調味得宜，夠哂入味，仲要有少少烤過既焦香

肉質稔身易入口，唔會太韌太多筋位，但又帶點嚼勁，唔係鬆肉粉既霉感

醬汁酸甜開胃，帶點濃稠

可惜既係醬汁實在太少，最後食包果陣冇野點淨食:^(

飯係炒底既，粒粒分明幾香口，包係入面都唔會濕爛

吐司已經被起走大部分包心，所之佢都係算足料不吝嗇的

外皮金黃香脆，有少少焦香又唔係過燶既

吐司內層鬆軟可口，咀嚼出麵包微微香甜既麵粉香

整體黎講個味道同質量都ok架，係個醬汁少左d，美中不足囉

另外個人認為個配搭唔會太怪，可能我地都幾勇於嘗試以及接納新意xdddd

熱美碌

既然呢度主打懷舊感……

黎杯美碌扮食學生餐都不足為過姐xd

環境都不錯，起碼係商場入面唔係太焗熱

衛生係ok既，唔會黏笠又冇咩垃圾咁

服務就……態度都可以既

不過午飯時間真係幾旺場，都係要搭哂枱咁，叫人難少少

仲有要預左佢係連鎖店經營既感覺，唔好期望cozy

（我地去之前已經知，但聽講有d人以為係小店果種感覺……

漢城美食-甜辣雞

話說已經試過香港大部分既韓式炸雞店

知道仲有其他選擇就梗係會想試下新店而唔係翻兜啦:^)

有時行街都會見到漢城美食

呢間算係連鎖店了吧，數間分店都係集中係油尖旺一帶

今次就係午飯時間剛過少少既位黎試

避人流既戰術係成功既！

入店只有我地一枱，係其後先有兩三枱客入座

甜辣炸雞（全）　$163+10%

講真個性價比……對比起大部分係香港既韓式炸雞店，係可以接受的

去過韓國食過好多間，連鎖有小店有，首爾有市外有

真正最original既韓式炸雞真係唔係勁好食，仲要帶點乾身

因此我一直唔明點解大家咁追求所謂的原版

各花入各眼我都唔想俾人插我唔識食定係點

但想要原版請去韓國走勻全國食番十間八間先定奪真正既韓國炸雞係點啦:^)

發完牢騷講番呢碟炸雞:^)

甜辣醬味道大概係有時去韓食店食拌飯落果支紅通通喜洋洋既辣醬

灑左少少芝麻，食落有芝麻既香味，算係加左一層香氣

炸雞唔可以話係食過最好食既，但都入左我既上位圈

外皮厚度一般，唔係太脆，但沒有滲油情況出現

雞肉仲保持有點水分，易撕咬易入口，配上甜辣醬汁更是惹味

雞骨唔算多，相比起出名多骨既李家，佢最多係第二或第三位

總括而言又係可試可不試

呢間既優點係多分店同埋唔使排好耐隊，價錢質素都算相宜既

土司工坊-脆口多

晏就食完個heavy lunch仲唔夠喉（我認我太大食

過左黎吐司工房整兩件先:^)

但佢就算係平日下午茶都幾多人，唯有搭下枱

細看menu先知原來有幾款吐司可以揀既

傳統吐司就係兩片烤過既吐司夾餡

南洋西多士就係炸多士啦

鬆軟麵包係類似餐包咁夾餡既

厚土司就係厚切烤多士:^)

話明土司工坊，我梗係揀番多士啦！！

潮州辣蝦米傳統吐司

內餡唔多，要預左真係薄薄一層仔附住咁架咋

內餡乾身，但比肉餡更為濕潤，鹹中帶辣，有少少似蝦醬既香氣

吐司烤得金黃香脆，咬落有焦香味之餘，仲會慢慢有麵包香溢出

咖椰厚吐司

因為腸胃問題唔係好想食牛油，一問之下可以走就當然走油啦:^)

呢個咖椰醬係佢地自家出品既，有一罐罐可以買番屋企用

都係果句你要預佢係薄薄一層，唔好諗太多！

椰香味重得黎算清，並非油膩類型，而班蘭香唔算好濃烈

吐司厚身帶點脆度，配上香甜可口既咖椰醬，簡單但味道都不錯既

煎蛋（餐）

本身想要半熟蛋，但店員竟然話冇！！！！！

好傷感……不過冇計啦都，只好轉點煎蛋/___

煎蛋都幾細隻，煎得乾身全熟

外皮金黃有焦香，咬落去外皮仲有少少脆度:^0

加左豉油醬食重口味都ok既，只係冇半熟蛋真心好可惜……

環境真心麻麻

有不少昆蟲周圍飛，坐得都唔安落

另外我真係好唔明點解d人可以見到咁多人搵位等位都仲要坐係度慢慢hea

又用電子產品又睇書又傾計咁

呢d係人地私事我又唔應該亦無權干涉既

當我冇講過啦^^

大戶屋-日式甜

朋友暑假番香港梗係要聚一聚啦;^)

食完正餐想黎d甜食，仲要係日式果隻

行黎行去都揀唔定

睇過menu，嗯……賣相同價錢都可以接受既……

一於就試下呢間啦！:^)

抹茶啫喱芭菲

抹茶雪糕味道清甜，富有茶香，感覺唔似係馬虎平貨

紅豆蓉亦不簡單，睇到係粒粒起沙狀，非完全磨碎，香甜可口

抹茶奶凍十分幼滑，茶香甚為濃郁，感覺算爽口，唔會太黏

威化餅冇俾濕氣浸軟，仲保持到酥脆感覺

與其他食材既軟滑感形成對比，同時令膩感降低

都係果句，我唔係太中意佢d cream

今次既忌廉有少少膩感，好似破壞左清新既感覺/___，都係各花入各眼既

紅豆湯丸

糯米丸子彈牙軟糯，咀嚼時有淡淡糯米粉香及微甜滲出:^)

下面墊左紅豆蓉，仲有少少豆乳

整體甜度主要來自雪糕，但其實都係普通，唔會話太甜膩

另外呢道既感覺都係清新路線，cream又唔多，撈埋食都唔heavy

Main St. Deli-重量級

有時見到Main St. Deli既大大份美食都會流哂口水
講真好想搵次約好多人一齊分個大漢堡
當然唔少得佢既大件甜品啦:^)
今次發左癲咁食完個飽飽午餐後拖左朋友黎呢度
仲要兩個人點左兩份大既飯後甜品
想扮淑女小鳥胃係不可能的任務了XDDD

檸檬芝士蛋糕

面頭既忌廉應該都係自家打出黎唔係即唧果種

重奶香又濃滑，不過我本身唔中意cream就覺得麻麻啦，好彩佢少少姐

檸檬層夠酸，甜度不算高，又唔會好漿口，小清新xd

中間有蛋糕體令到cheesecake冇咁膩滯，鬆軟有質感既對比

芝士部分香滑，芝味濃郁，配合檸檬清香卻又不會太油膩

餅底甜得剛剛好，補足芝士層既淡淡鹹味:^)

檸檬蛋白撻

感覺幾大件，但知道上面既都係蛋白，唔會過飽

先食蛋白啦，烤過金黃色係幾靚既，仲會有點焦香味

食落其實幾似棉花糖，而且佢冇溶化又冇出水既跡象，細密綿軟

檸檬餡酸度令我幾滿意，好滑，亦唔會太油（Y）

撻底內部有一層薄薄既朱古力，為甜品帶來另一個味道既層次

撻底甜度不高，連埋一齊食就唔會太甜膩了！

可惜的是……撻底未免太硬實了，連切開都難

當時係咁用叉一下一下咁拮開佢，製造不少噪音

也許影響了其他食客，在此說句抱歉/___

環境係幾歎既

地方闊落乾淨唔特別提啦

光線又夠，影相都方便既:^)

仲要當時下午茶尾尾既時間唔多人，自然寧靜得多

服務方面……大概係該時間一向少客

感覺人手不多，咁又係既有冗員又唔合符經濟效益

或者各位食客就要有耐心等一等啦:^)

Italian Tomato-桃之季

以前話要試哂意大利蕃茄既蛋糕XDDD

最後都係冇左件事

但先前路過見到有桃子新款

聽講供應至8月底

今次就同好友一齊當飯後甜品試下:^)

霧の白桃

上層既白桃啫喱富有白桃清香

味道十分清新自然，唔係藥水人工溝出黎果種味

不過啫喱層係有點黏口似custard既感覺，個人認為爽口d會冇咁膩

中間夾有少少白桃果肉，香甜爽口得黎夠水分

接著下來就係蛋糕層，鬆軟不乾

帶點濕潤唔會漿口，同時又可以解下膩

整體配合都不錯，只係啫喱層可以再諗諗佢？

日本栗子蛋糕

栗蓉佔量合格，感覺足料既

忌廉部分都好多架，係自發忌廉既味道唔係買番黎即唧果種

甜度一般，重栗子香，但忌廉稍嫌有點膩度

蛋糕層香軟不乾散，層層分隔開忌廉，食時感覺冇咁膩滯:^)

幾時先可以食到佢其他款架/_____

仲有好多撻都想試

次次經過見到個賣相都OK

不過今年見到個份量縮左水……

一個Whole cake分多左咁，感覺冇咁抵食了