The Landmark Mandarin Oriental-MO Bar-又一早

之前提到要再去MO Bar食下早餐
君子一言，駟馬難追，我要言出必行xd
結果今次又係早早去到了
喜聞當日係較少Booking，可以慢慢食全場
懷著歡愉心情展開新一天

煙三文魚仍是必吃選擇，特別係佢香草芝士版本

脂肪不多但好重三文魚香氣

肉色橙紅吸引，肉質爽口有嚼勁，感覺夠鮮美

香草香氣濃烈而清新，芝士香濃Creamy，同煙三文魚底好夾

炒雜菌都可以一提

其實佢唔係好熱咁

菇菌香氣十分濃郁，加上有少少香草味，感覺好清新新鮮

炒出黎卻不會太油膩，調味不濃反會突顯菇菌香味

我會用黎係食煙燻魚同凍肉時清清味蕾，唔怕太鹹鹹到食唔出味道

Egg Benedict完全係我再訪既原因

佢任食任拎呢樣已夠吸引

重點係質素都好好，唔係話任食就hea做

蛋汁香濃微稠，蛋香味濃郁得非筆墨所能描繪

腸仔都有唔同款式，肉種唔同，如豬、牛

脆皮是有的，煎完更有焦香味

肉腸肉香帶肉汁，每條都豐潤飽滿

個人會點茄汁黎解下膩，酸甜嘛

炒蛋就一般啦

是十分嫩清香口的

但佢既味道係同海外其中一個國家既相似

係帶微甜既

蛋香重，但感覺水左d，似係糊仔

佢既造法係冇問題既，只係我食唔慣呢種煮法姐

魚蛋麵其實幾特別

佢既魚蛋係好彈牙爽口，味道亦好重魚香好新鮮既感覺

麵底條條分明，有點韌性是有嚼勁的，吃著有麵香

湯底味道不濃，清湯稀身更能帶出食材味道

蝦餃外皮雖頗晶瑩，但尚嫌略厚

皮層厚卻太濕潤了，感覺底部有點糊掉

蝦肉餡彈牙鮮香，有淡淡鮮甜味，爽口不膩

Yogurt分幾隻味

有原味、藍莓及櫻桃等，差別在於有否加果醬

我自己就中意加果醬既，感覺甜d香d

同埋佢既果醬通常有果肉，加埋食冇原味咁寡

酥皮仲係好香酥薄脆，帶油香卻不油膩這點不錯

賣相也很美觀很吸引

加上莓果，帶來酸甜清新既果香果味，愈能解膩

水果有分淨水果同水果沙律

淨水果有藍莓真心正，平時買少少已經好貴

今次可以盡情食:^)仲要大大粒好香甜唔會勁酸咁

水果沙律有d似fruit punch

佢係水果切粒浸入鮮果汁，比單食水果會酸一點

但個感覺係更加清新開胃，視乎個人喜好啦

JC Cafe&Bar-平平食 [已結業]

某日去尖沙咀周圍行下搵野食

經過赫德道果時有個Staff就係門口promote

原來係做緊semi-buffet lunch，仲有再八折

冇所謂啦咁啱撞中，入去試下:^0

Semi-buffet Menu

Buffet既有沙律、前菜同埋多款甜品

蒜蓉包

外面脆身，帶焦香味

蒜蓉香氣偏淡，不過唔會食到有蒜蓉粒同油膩咁

餐湯

酸度適中，有點濃稠，亦幾足料既

前菜

煙三文魚不太油膩，鹹度亦不高，作為前菜唔會太overload

茄子沙律感覺軟綿及充滿水份，食落去又唔會太似泥，仲係有纖維既質感:^)

凍牛肉脂肪都多，不過凍食好易抿開，牛味都幾出既

mushroom salad應該係凍既炒菇菌，味道不濃，水分多

甜品

Crepe我本身以為係Bread Pudding，點知食落去佢係浸係漿入面

焦香重，賣相都不錯，酒味都算濃，crepe不油膩，厚薄度剛剛好:^)

Macaroon頗酥脆，食埋內餡也不至於好甜膩

Puff味道都ok，只係外皮有好多cream同朱古力等，令佢整體更甜，又有d油

Chocolate Mousse Cake好rich同creamy，食落朱古力味又唔係好濃

Cheese Tart芝士味好香，濃郁得黎唔會太鹹

面頭係蛋白餅唔係cream，加上chocolate chips，增甜卻不會過膩

Brownie軟硬度還好，甜中帶苦，食落唔過甜，多幾件都仲得:^0

Tai Tai Pie Pies-迷你撻

由以前Island East Market

去到Great

仲有而家新舖

我都係一直支持既忠實飯XDDDD

Tai Tai Pie Pies主售批撻，可能niche所以quality果d一路都不錯既

Apple Crumble Tart

首先拎上手唔覺好油過左第一關

crumble香脆可口，甜度適中

唔會太大粒或者太粉，帶有少少肉桂香味

蘋果餡清香解膩，味道偏淡既，有少許酒香提味

撻底厚度剛好，還是有點點脆

不過食落去味道微鹹，重牛油香

Pumpkin Tart

賣相似乎冇其他撻咁吸引，呢項可以改善下

南瓜蓉清甜軟綿，帶有微微酒香

撻底都係有脆度，牛油香都重

加上清清地既肉桂香味，唔會太甜膩

Kelly's Cape Bop-新嚐韓

某日路經灣仔
見到呢間新開既韓食小店派緊試食
雖然已經食得飽飽，但係都想一試

店內播放K-Pop MV

主要係小食外賣自取，有泡菜炸雞粒包飯果d

紫菜包飯

蔬菜條幾多，感覺幾新鮮爽脆

味道帶點酸甜，好開胃

紫菜都係濕軟既，不過冇咩麻油味亦未有膩感

佢卷得都實，因此切開黎俾人試食唔會散哂，食果陣都唔會跌到周圍都係

質素都ok既，起碼好過我之前食尖沙咀某間出名既，真係成口油咁:^|
下次有機會可以試下佢d炸雞粒既:^)

太平館餐廳-港西菜

成日見到d人post相

好想試太平館個巨型Souffle

不過一直都冇去試到

而今次同呀媽食晏終於有個機會可以食下

 

Weekend Set Lunch咁寫得出黎，好明顯Weekday有另一個menu啦XDDD（姐係又有藉口試

難得見到Weekend都有set（而家好多得番a la carte）

下次要試番鎮店既瑞士雞翼XDDD

環境好舒適又闊落，估唔到入面係咁既XDDDD，我仲以為似酒樓（見識少

餐包

好平常既餐包，甜甜地好鬆軟

而家好多餐廳都唔會供應呢d港式西餐餐包，勾起細個同屋企人出街食飯既回憶;^)

沙律

沙律醬既份量掌握得好，只是啱啱上到d味，唔會太濃味太溜

食材味道新鮮同搭配，味道都ok

很遺憾，呢個沙律雪得太勁，食落去好冰又好硬咁/___>

燒豬脾飯

豬脾好有肉香味，冇任何膻味雪味

肉質夠軟稔，熟透哂但唔會乾柴

豬脾原隻燒好之後先切片，每口都充滿有香草同酒香

燒汁有點似瑞士汁，稀d水d既:^)

焗葡國雞飯

一上桌已經聞到好濃烈既香氣

雞件好有肉香好入味，仲要佢係帶骨既，唔係雞球果種

黃薑同椰汁味帶得好出，不過唔會好油膩:^)

味道香濃，帶重重焦香，撈飯食一流

牛油蛋糕

蛋糕既cream好重牛油香，有傳統風味

令人諗起細個食小型家庭式餅店既生日蛋糕同牛油蛋糕:^)

好彩佢個份量剛剛好，因為始終牛油忌廉真係好油膩好劑既

即使有少少果醬酸甜味配襯，但都係牛油香味好突出

焗梳乎厘

太平館既呢道甜品真係遐邇聞名，想食好耐

實物真係好大喎，冇失場，即刻趁佢新鮮出爐影多幾張相先

蛋白味好香，外層帶點焦香同熟身，不過可能會鞋口同實左d

食到入面甜香綿密，入口有如棉花糖，輕身又軟滑

甜味係淡d既，我食幾多都唔劑

清哂底（月

講起佢服務其實不錯，好多都係年紀較大既伯伯，個個都好親切

佢地對餐廳既出品都好有信心，次次送餐點黎都會介紹一番:^)

下次想去下其他分店試哂set menu XDDD

韓雅林-煎香餅

又係同呀媽去食韓國野

呢間係佢心水

之前已經試過，但今次想食下佢既煎餅

前菜

呢度有成八款前菜

我中意小魚乾，香口得黎甜中帶辣，又有少少鹹味，有得咬下

佢既薯仔都唔錯，鹹甜得宜，薯仔綿密，可口不劑

炆牛肋骨

上次試過幾好食，今次翻兜

仲係甜甜地幾可口，仲係咁入味，仲係重牛味又軟稔……

可惜個份量似乎少左

就咁睇落去都已經少左五分一

重點係今次既佢係好多骨好大塊骨

基本上可以食既部份同份量都唔多/___\，感覺冇咁抵……

海鮮煎餅

一睇個樣焦焦地金黃色已經夠吸引

聞到食到真係好重焦香味

煎餅入面都幾多料，同埋厚度都OK，算抵食喎又

香蔥味清而不嗆，辣椒都只係微辣，原本味道係偏淡至普通既

點左醬油，有D芝麻更香口，鹹鹹地食落都冇咁易劑

紅棗茶

對身體幾好架，尤其係女性

清甜不膩，細細杯唔會Overload

The Sky Bar-天空吧

Salad Bar其實都幾多款揀架啦

有自己揀自己撈既，亦有拌好既，仲有麵包、湯、水果同甜品:^)

Menu列出不少選擇，似乎係會不時轉換款式既

Salad

南瓜沙律係我最推既:^)

面頭既醬汁帶點焦香味，好creamy

而南瓜十分鬆軟香甜，清新感覺中和番醬汁既膩感

海帶沙律感覺好清爽，因為唔會太油膩，冇咩麻油果d調味

加上有點辣味螺肉，有嚼勁又夠味，整體比想像中搭配

另外仲有好多款自選材料，如生菜、粟米、豆類等

以及生果沙律、蜆沙律同埋紅菜頭呢類配搭好既沙律

其實都幾多款式揀，講真就咁食沙律都飽

法式烤薄雞胸伴蘋果燒汁

主菜來了，睇個賣相似乎都有d擺盤既:^0

雞胸有點焦香味，可惜烤得太乾，似乎太老太柴了:^|

不過味道是可以的，冇雪味冇腥味之餘係好入味

蘋果部分似係蘋果醬，有粒粒果肉，味道都自然，但份量好少:^0］

燒汁偏稠，如果稀點點可以容易點食物

其他配菜及薯角都好重焦香味，但睇個外表又唔會焦黑:^)

整體黎講我覺得水準一般

味道ok既，但乾呢樣唔係個個接受到

（我個人係接受到，因為我中意熟d可以撕開既）

仲有蘋果部分

因為跟中文菜名佢應該係幾重要既，但佔量太少，作用不太明顯

餐盤甜品

食食下會有server捧住甜品出黎

每人可以選兩款

牛乳布丁好重奶香，滑嫩香口

不過我唔太中意佢既甜味，假假地:^(

栗子蓉太凍硬，食落去都冇咩味道同香氣

texture係rough果種，食到有顆粒，不過冇咩味真係唔知食緊咩……

Apple Crumble

呢個係salad bar出面可以任食既

Crumble酥脆不油膩，有點點鹹香

淋上一點雲尼拿汁（？），變得更滑，更重奶香

蘋果部分清甜不過酸，食到粒粒果肉甚是足料:^)

本身仲有啫喱糖同幾款水果任食既

但我對佢地既興趣不大就冇食到:^)

環境幾舒適

 如果早去既話都幾清靜架

另外佢係有靠窗位

約人一齊食訂位坐窗邊大概幾寫意

莎巴-地道味

聽聞莎巴係出名既馬來西亞菜

係香港黎講話係最地道

今次就黎試下咁地道既美食:^)

咖哩角（牛／羊）

外皮夠埋香脆，薄得黎又唔會油

餡料好足，我個人覺得羊味較出色，肉味香濃

不過講真我唔係好中意呢款咖哩角咁薄皮既造法:^(，都係印度果種三角錐我中意d

巴東牛肉

醬料十分香濃，椰味重之餘薑味更濃

香新之中，更有點點甜味，用包點醬仲好食

牛肉入味非常，仲好軟稔可口，真係夠哂惹味

冇咩脂肪，食落唔太膩，清爽少少

油鬆餅

抓得鬆軟，香口不油膩，同外面既油鬆餅完全唔同:^)

麵粉香味十分重，帶微微麵粉甜，仲有焦香味

麥卡莉汁燒雞

燒雞唔油膩，得好少脂肪，冇雪味腥味，仲有少少焦香

雞肉不老不柴，但好肯定係全熟，又幾入味

醬汁酸甜之中帶點新味，微稠好啱撈飯沾餅

瑪沙拉羊角豆

羊角豆好清新，即使沾滿醬汁，入面仲係有水份既

其他配菜都好新鮮清爽，食完真係解哂膩咁

瑪沙拉醬較溫和，都係啱配飯同包食

原味饟餅

同印度果種唔同，佢唔係爐燒唔係發起哂既

反而同pita bread有點相像，係薄身少少既

外表有焦香味，食落都有點麵粉香甜:^)

冇近距離睇過，但我諗open kitchen果個位應該係睇到廚師整呢d包餅

酥炸香蕉

估唔到咁大份，呢個一定要趁熱食

香蕉部分香甜清爽，唔會過稔咁軟爛，亦唔會太硬太青

外皮炸得脆口酥香，完全冇油膩感

外面好多椰絲、糖粒及花生碎，令我諗起糖不甩既味道:^)

拉咖啡

泡沫拉得高高，睇落好粗糙，點知原來係厚實既foam

拉咖啡可以揀半甜，味道比甜膩奶重既拉茶清爽d

感覺冇咁大負擔，可以一試

椰汁珍多冰

椰汁香濃，稀稠度剛好，唔會似椰漿咁膩口

綠粉條都多，彈性夠，唔會太粉爛